ខេត្តព្រះសីហនុ ៖ លោកឧកញ៉ា ទៀ វិចិត្រ ប្រធានក្រុមហ៊ុន ជី.ធី.វី.ស៊ី, ស្ពីដបូតកម្ពុជា (G.T.V.C, SPEED BOAD CAMBODIA) មានប្រសាសន៍ថា នឹងបន្តសកម្មភាព ជម្រុញលើការងារអភិរក្សសត្វកម្រផ្សេងៗ ជាពិសេសសត្វអណ្តើសមុទ្រ ឬសត្វល្មិច ឲ្យបានច្រើនថែមទៀតនាថ្ងៃខាងមុខ។
លោកឧកញ៉ា ទៀ វិចិត្រ ដែលជាប្រធានក្រុមមនុស្សធ៌មអូរបីផងនោះ បានប្តេជ្ញាដូច្នេះ គឺកើតឡើងជាថ្មីទៀត នៅរសៀលថ្ងៃទី១៤ ខែកុម្ភៈ ឆ្នាំ២០១៩នេះ។
ព្រមជាមួយគ្នានេះ លោកឧកញ៉ា ទៀ វិចិត្រ ក៏បានអំពាវនាវដល់ប្រជានេសាទសមុទ្រ និងប្រជាពលរដ្ឋទូទៅ ឲ្យចូលរួមគាំទ្រការងារអភិរក្សសត្វកម្រ ជាពិសេសសត្វអណ្ដើកសមុទ្រ ឬសត្វល្មិច ឲ្យបានទាំងអស់គ្នា ។
ទាក់ទិនបញ្ហានេះ ក្រុមអ្នកស្រឡាញ់ និងអភិរក្សសត្វអណ្តើកហ្លួងព្រមទាំងសត្វកម្រផ្សេងៗទៀត នៅប្រទេសកម្ពុជា បានជួបប្រជុំគ្នានៅរាជធានីភ្នំពេញ កាលពីរសៀលថ្ងៃទី១៤ ខែកុម្ភៈ ឆ្នាំ២០១៩ ដែលជាជំនួបដ៏សំខាន់ សម្រាប់ការពង្រីកសកម្មភាពការងារអភិរក្ស ឱ្យបានច្រើនថែមទៀត។
ជំនួបនេះមានការចូលរួមពីមន្ត្រីអង្គការសមាគមអភិរក្សសត្វព្រៃកម្ពុជា WCS (Wildlife Conservation Society) ក្នុងនោះក៏មានវត្តមាន លោកឧកញ៉ា ទៀ វិចិត្រ ដែលមហាជនស្គាល់ថា ជាអ្នកនិយមចូលចិត្តជួយការពារអភិរក្សសត្វអណ្តើកហ្លួង សត្វល្មិច ឬអណ្តើកសមុទ្រ ក៏ដូចជាសត្វព្រៃជាច្រើនប្រភេទទៀត នាមូលដ្ឋានខេត្តព្រះសីហនុ ក៏ត្រូវបានអញ្ជើញចូលរួមជាកិត្តិយសផងដែរ។
កិច្ចប្រជុំនោះ មន្ត្រីអង្កការសមាគមអភិរក្សសត្វព្រៃកម្ពុជា WCS បានគាំទ្រ និងលើកទឹកចិត្តដល់ អ្នកដែលស្រឡាញ់ និងអ្នកធ្លាប់បានធ្វើសកម្មភាព ជួយអភិរក្សធនធានធម្មជាតិ ក៏ដូចជាសត្វកម្រផ្សេងៗ ដែលមាននៅក្នុងប្រទេសកម្ពុជា។
នៅក្នុងជំនួបប្រជុំនោះដែរ លោក COLINPOOLE នាយកអង្កការ WCS ប្រចាំតំបន់ មេគង្គ និងលោក កែន សេរីរដ្ឋា នាយកកម្មវិធីប្រចាំកម្ពុជា បានប្រកាសថ្លែងអំណរគុណចំពោះ លោកឧកញ៉ា ទៀ វិចិត្រ ហើយបានប្រកាសគាំទ្រយ៉ាងពេញទំហឹង ចំពោះសកម្មភាពរបស់លោកឧកញ៉ា ទៀ វិចិត្រ ដែលបានចូលរួមក្នុងការងារអភិរក្ស ផ្សព្វផ្សាយ និងជួយជម្រុញអោយមានសកម្មភាពអភិរក្សសត្វកម្រៗជាច្រើនប្រភេទនៅកម្ពុជា ជាពិសេសនៅមូលដ្ឋានខេត្តព្រះសីហនុ ដែលជាធនធានធម្មជាតិ ជិតផុតពូជ អោយមានជីវិតបន្តពូជជាបន្តទៀត សម្រាប់ប្រទេសកម្ពុជា ឲ្យសម្បូរបែបឡើង។
ទាក់ទិនបញ្ហាខាងលើនេះ លោកឧកញ៉ា ទៀ វិចិត្រ មានប្រសាសន៍ថា នឹងបន្តសកម្មភាពលើការងារអភិរក្សសត្វកម្រ ឬសត្វព្រៃគ្រប់ប្រភេទ ជាពិសេសសត្វអណ្តើកសមុទ្រ ឲ្យបានច្រើនថែមទៀតនាថ្ងៃខាងមុខ។
លោកឧកញ៉ា ទៀ វិចិត្រ បានប្តេជ្ញាចិត្តថា នឹងមិនរាថយទេ ចំពោះសកម្មភាពការងារអភិរក្សសត្វកម្រនៅកម្ពុជា ជាពិសេសនាមូលដ្ឋានខេត្តព្រះសីហនុ៕ ដោយ៖ ដែន សីមា
