តាកែវ ៖ សាងសង់សំណង់រឹងបិទផ្លូវបង្ហូរទឹកនៅក្បែរសាលាស្រុកគីរីវង់ ធ្វើអោយពលរដ្ឋរងគ្រោះជាង១០០គ្រួសារកំពុងកើតក្តីកង្វល់ខ្លាចមានការជនលិចទៀត អភិបាលស្រុកប្រាប់ថាទើបតែដឹង ខណៈដែលសំណង់រឹងបានចាក់គ្រឹះរួចរាល់ និងបិទលូរកាត់មុខផ្លូវជាតិលេខ២ រួចទៅហើយ ។
សំណង់ចាក់បិទផ្លូវបង្ហូរទឹកខាងលើនេះមានទីតាំងឋិតនៅភូមិ កំពង់ ឃុំព្រះបាទជាន់ជុំ ស្រុកគីរីវង់ ខេត្តតាកែវ ដែលបច្ចុប្បន្នសំណង់ខាងលើ បានកំពុងតែសាងសង់ជាធម្មតា បើទោះបីជាមានការប្តឹងតវ៉ាពីសំណាក់បងប្អូនប្រជាពលរដ្ឋ មួយភូមិ យ៉ាងណាក៏ដោយ ។
តាមសម្តីរបស់តំណាងអោយបងប្អូនប្រជាពលរដ្ឋ លោក មិញ សុភាព បាននិយាយថា ការធ្វើសំណង់នេះពិតជាធ្វើឲ្យប៉ះពាល់ធ្ងន់ធ្ងរទៅលើការរស់នៅរបស់បងប្អូនប្រជាពលរដ្ឋជាក់ជាមិនខាន ព្រោះកន្លងមក អូរបង្ហូរទឹកនេះជាផ្លូវទឹកមួយដ៏សំខាន់សម្រាប់បញ្ជៀសការជន់លិចផ្ទះសំបែងរបស់បងប្អូនប្រជាពលរដ្ឋរាប់រយគ្រួសារ និងសាលារៀន ។
លោកបានបន្តទៀតថា ចំពោះអូរប្រវត្តិសាស្ត្រនេះ ក្រុមប្រជាពលរដ្ឋធ្លាប់បានធ្វើការប្តឹងតវ៉ាជាច្រើនលើកច្រើនសារមកហើយ តែការប្តឹងផ្តល់នេះត្រូវបានតុលាការសម្រេចកាត់ក្តីឲ្យប្រជាពលរដ្ឋជាអ្នកចាញ់ទៅវិញ។ ទើបមកដល់ពេលនេះ លោក ម៉េង សុខុម ដែលជាអនុស្នាក់ការគណៈបក្សស្រុកគីរីវង់ ចាប់ផ្តើមសាងសង់និងបុកគ្រិះចាក់ថ្មធ្វើជាសំណង់រឹងនៅចំណុចពីមុខលូស្ពានឆ្លងកាត់ផ្លូវជាតិលេខ២នេះតែម្តង ធ្វើឲ្យបងប្អូនប្រជាពលរដ្ឋផ្ទុះការតវ៉ាសារជាថ្មីម្តងទៀត ដោយសារតែពួកគាត់មានកង្វល់កើតទុកមិនសុខចិត្តលើការសាងសង់សំណង់រឹងបិទមាត់លូបង្ហូរទឹកនេះ ដែលអាចបង្ករអោយមានការជនលិចសារថ្មីទៀត នៅពេលមានភ្លៀងធ្លាក់ម្តងៗ ដូច្នេះរូបលោកតំណាងអោយបងប្អូនប្រជាពលរដ្ឋមួយភូមិក្នុងភូមិកំពង់ សូមលើកដៃសំពះសុំអោយសម្តេចនាយករដ្ឋមន្ត្រីជួយអន្តរាគមន៍ជួយដល់ពលរដ្ឋទាំង ១១៧គ្រួសារនេះផង ។
ជុំវិញករណីនេះដែរ ក្រុមការងាររបស់យើងខ្ញុំបានធ្វើការទំនាក់ទំនងតាមទូរស័ព្ទរបស់លោក ស៊ុត ខុន អភិបាលស្រុកគីរីវង់ នៅព្រឹកថ្ងៃទី ១៦ ខែកុម្ភៈ ២០១៩ នេះដែរ តែទូរស័ព្ទរបស់លោកមិនអាចទាក់ទងបានទេ ៕ តាកែវ
