ខេត្តកំពង់ឆ្នាំង ៖ រថយន្តខុសលក្ខណៈចំនួន៥គ្រឿង ត្រូវបានកម្លាំងសមត្ថកិច្ចចម្រុះ ចាប់ឃាត់ទុកក្រោយពីរថយន្តទាំង៥គ្រឿងនេះដឹកឈើ និងដឹកទំនិញសំពីងសំពោងខុសលក្ខណៈបច្ចេកទេស។
ប្រតិបត្តិការ ឃាត់រថយន្តដឹកសំពីសំពោងនេះក្រុមចម្រុះបាន ធ្វើឡើងនៅវេលាម៉ោង១យប់ឈានចូលថ្ងៃទី១៤ ខែកុម្ភៈ ឆ្នាំ២០១៩ នៅសង្កាត់ខ្សាម ក្រុងកំពង់ឆ្នាំង ។
លោកកែវ ពៅ ប្រធានមន្ទីរសាធារណការ និងដឹកជញ្ជូន ខេត្តកំពង់ឆ្នាំង បានបញ្ជាក់ថា ៖ ក្រុមចម្រុះធ្វើការឃាត់ទុកនេះ គឺតម្រូវ អោយម្ចាស់រថយន្តធ្វើការកែតម្រូវ ដែលកែច្នៃខុសលក្ខណៈបច្ចេកទេស ដូចជារថយន្តសាំយ៉ុងត្រូវតែដោះកង់រថយន្តចំនួន២ផ្នែកខាងក្រោយ កាត់ទ្រុងខាងក្រោយចេញ និង រើទំនិញ ដែលដាក់លើដំបូលសំពីងសំពោងចេញ ចំណែករថយន្តដែលដឹកលើសកំពស់ក៏ត្រូវអោយរើទំនិញចេញដែរ។ចំពោះម្ចាស់រថយន្តតម្រូវអោយធ្វើកិច្ចសន្យាបញ្ឈប់សកម្មភាពដឹកល្មើសច្បាប់ ។
លោក កែវ ពៅ បានអោយបញ្ជាក់ទៀតថាៈក្រុមលេខាធិការដ្ឋានសុវត្ថិភាពចរាចរណ៍ផ្លូវគោកខេត្តកំពង់ឆ្នាំង បានអនុវត្តតាមតួនាទីនិងភារកិច្ចរបស់ខ្លួនជាប្រចាំដើម្បីពង្រឹងការអនុវត្តច្បាប់ចរាចរណ៍ផ្លូវគោកដោយអនុវត្តយ៉ាងម៉ឺងម៉ាត់បំផុត ទប់ស្កាត់ការដឹកលើសទម្ងន់កំណត់ ការដឹកសំពីងសំពោង និង ទប់ស្កាត់រថយន្តដែលកែច្នៃខុសលក្ខណៈបច្ចេកទេសដើម្បីកាត់បន្ថយគ្រោះថ្នាក់ចរាចរណ៍អោយនៅកំរិតទាបបំផុត ៕ ដោយ ៖ បញ្ញាស័ក្តិ
