កំពង់ឆ្នាំង ៖ លោកថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្តរក្រសួង ដើម្បីត្រៀមរៀបចំពិធីបុណ្យទន្លេលើទី៥ នៅខេត្តកំពង់ឆ្នាំង បានជំរុញដាស់តឿន ក្រុមការងារគ្រប់អនុគណៈកម្មការទាំងអស់ ត្រូវខិតខំសម្រេចការងារត្រៀមរៀបចំ ពិធីបុណ្យទន្លេនេះឱ្យបាន ១០០ភាគរយ ខណៈគិតត្រឹមសប្ដាហ៍ទី៣ នៃខែកុម្ភៈនេះ ការងារទាំងឡាយសម្រេចបានប្រមាណពី ៧០-៨០ភាគរយ ហើយ។
ការជំរុញផែនការការងារនេះ ត្រូវបានធ្វើឡើងក្នុងកិច្ចប្រជុំត្រៀមរៀបចំពិធីបុណ្យទន្លេលើកទី៥ នៅសាលាខេត្តកំពង់ឆ្នាំង នាថ្ងៃទី១៦ខែកុម្ភៈ ឆ្នាំ២០១៩។ កិច្ចប្រជុំនេះ ត្រូវបានធ្វើឡើងក្រោមអធិបតីភាពលោក ថោង ខុន រដ្ឋមន្ត្រីក្រសួងទេសចរណ៍ លោកឈួរ ច័ន្ទឌឿន អភិបាលខេត្តកំពង់ឆ្នាំង និងលោកស្រីដោក សុទ្ធា ប្រធានក្រុមប្រឹក្សាខេត្តកំពង់ឆ្នាំង។
ទន្ទឹមនឹងកិច្ចខិតខំយ៉ាងសស្រាក់សស្រាំក្នុងការរៀបចំព្រឹត្តិការណ៍ទេសចរណ៍ដ៏ធំនេះ ដែលមកល់ពេលនេះបានប្រមាណ ៧០-៨០ភាគរយ ហើយនោះ ទិសដៅការងារមួយចំនួនទៀត ត្រូវបានលោក ថោង ខុន ណែនាំបញ្ជាក់បន្ថែម និងដាក់ឱ្យអនុវត្តបន្ត ដើម្បីសម្រេចឱ្យបាន ១០០ភាគរយ ក្នុង៣សប្តាហ៍ទៀត។ លោកបានបន្តថា ក្រុមការងារត្រូវចុះផ្សព្វផ្សាយអប់រំពីបញ្ហាសំរាមដល់អាជីវករ ដែលលក់ម្ហូបអាហារ នំចំណី និងទំនិញរបស់ខ្លួននៅក្នុងពិធីបុណ្យទន្លេខាងមុខនេះ ដើម្បីឱ្យកម្មវិធីនេះប្រព្រឹត្តទៅប្រកបដោយភាពសប្បាយរីករាយ ហើយពោរពេញដោយភាពស្អាតថែមទៀត។ រាល់ស្ដង់នីមួយៗត្រូវមានធុងសំរាម ហើយអាជីវករក៏ត្រូវចូលរួមសម្អាត អនាម័យនៅតាមស្ដង់របស់ខ្លួនផងដែរ។ ថ្វីដ្បិតការរៀបចំតុបតែងលម្អទូទាំងក្រុងកំពង់ឆ្នាំង កំពុងមានភាពមមាញឹក និងកំពុងលេចជារូបភាពបណ្ដើរក៏ពិតមែន ប៉ុន្តែលោករដ្ឋមន្ត្រីនៅតែដាស់តឿនជាប្រចាំ ដើម្បីឱ្យក្រុមការងារខាងរៀបចំតុបតែងសោភ័ណភាពនេះ ឱ្យបានលឿនឆាប់រហ័ស និងទាន់ពេលវេលា។ ចំពោះសកម្មភាពកីឡា ត្រូវបានលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានឱ្យដឹងថា ប្រភេទកីឡាដែលត្រៀមរៀបចំក្នុងពិធីបុណ្យទន្លេនៅខេត្តកំពង់ឆ្នាំង មានចំនួន១១ប្រភេទ ចែកចេញជា២ផ្នែក៖ ផ្នែកទី១៖ កីឡាបង្ហាញពីអត្តសញ្ញាណ (កីឡាបុរាណ) មានកីឡាចំបាប់បុរាណខ្មែរ ប្រដាល់គុនខ្មែរ កីឡាទាញព្រ័ត្រ ប្រណាំងសេះ ប្រណាំងទូកង និងកីឡាល្បុក្កតោ ផ្នែកទី២៖ កីឡាទំនើប មានបាល់ទាត់ បាល់ទះ បាល់បោះ រត់ប្រណាំង ជិះកង់។ ត្រូវបន្តការរៀបចំក្រុងកំពង់ឆ្នាំង ឱ្យបានស្អាតជាងមុន ដើម្បីឱ្យទីក្រុងដ៏សំខាន់នេះ ជាប់ជ័យលាភីទីក្រុងស្អាតអាស៊ាន។ ប្រសិនបើក្រុងកំពង់ឆ្នាំង ទទួលបានជ័យលាភីពីអាស៊ាននេះមែន វាគឺជាសមិទ្ធផលធំមួយទៀត ក្រោយពីការរៀបចំបុណ្យទន្លេនេះ។
ត្រូវរៀបចំកន្លែង ឬសួនដាំដើមឈើនៅក្នុងក្រុងឱ្យបានច្រើន និងត្រូវបំផុសចលនាយុវជន ចូលរួមដាំដើមឈើ យ៉ាងហោចណាស់ឱ្យបានម្នាក់មួយដើម និងគូស្រករមួយគូដើមឈើ ២ដើម នៅក្នុងសួនដែលយើងរៀបចំទុកនោះ ពិសេសត្រូវត្រៀមទុកកូនឈើឱ្យបានស្រេច និងត្រូវមានក្រុមការងារចាំជួយសម្រួលដល់អ្នកដែលទៅដាំដើមឈើ។ ត្រូវយកចិត្តទុកដាក់លើការដាក់ ពង្រាយបង្គន់អនាម័យសាធារណៈ ឱ្យបានច្រើន និងនៅទីតាំងដែលសមរម្យ ក្នុងពិធីបុណ្យទន្លេនេះ។ រាល់បង្គន់សាធារណៈ ត្រូវរៀបចំទៅតាមស្តង់ដារជាតិ និងអាស៊ាន និងត្រូវមានអ្នកចាំសម្អាតជាប្រចាំ។ លោករដ្ឋមន្ត្រី ក៏បានណែនាំដល់អាជ្ញាធរ និងអនុគណៈកម្មការទទួលបន្ទុក ត្រូវចុះទៅជួយរៀបចំជាមួយព្រះសង្ឃ នៅតាមវត្តអារាម និងគណៈកម្មការវត្ត ដើម្បីជួយរៀបចំការទទួលប្រជាជនមកពីចម្ងាយ ដែលមកទស្សនាបុណ្យទន្លេ ពិសេសរៀបចំកន្លែងសម្រាក អគ្គិសនី ទឹកស្អាតប្រើប្រាស់ ដោយលោកមរដ្ឋមន្ត្រីបានសង្កត់ធ្ងន់ថា “បុណ្យទន្លេក៏ជាការផ្លាស់ប្ដូរវប្បធម៌រវាងប្រជាជន និងប្រជាជន”។
លោករដ្ឋមន្ត្រី បានជំរុញលើកទឹកចិត្តឱ្យសិប្បកម្មក្នុងខេត្ត រៀបចំការតាំងពិព័រណ៍ក្នុងពិធីបុណ្យទន្លេឱ្យបានច្រើន ដើម្បីលើកស្ទួយវិស័យសិប្បកម្មក្នុងខេត្តឱ្យបានផុលផុសឡើង ពិសេសលោករដ្ឋមន្ត្រីបានលើកទឹកចិត្តឱ្យសហគមន៍ក្អមឆ្នាំង យកផលិតផលរបស់ខ្លួនមកតាំងពិព័រណ៍ឱ្យបានច្រើន ហើយលោកបានណែនាំទៅកាន់អនុគណៈកម្មការ ត្រូវផ្ដល់ស្ដង់ពិព័រណ៍ដល់ពួកគេចំនួន ៣ស្ដង់ ដើម្បីឱ្យការតាំងបង្ហាញធំទូលាយ។ លោករដ្ឋមន្ត្រីបានអះអាងថា លោកនឹងគោរពអញ្ជើញ សម្ដេចតេជោនាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ចូលទៅទស្សនាស្ដង់ពិព័រណ៍ក្អមឆ្នាំងនេះផងដែរ។
ចំពោះសកម្មភាពសិល្បៈ និងទស្សនីយភាពត្រូវបានលោក ប៉ាក់ សុខុម រដ្ឋលេខាធិការក្រសួងទេសចរណ៍ និងជាប្រធានអនុគណៈកម្មការរៀបចំទស្សនីយភាពសិល្បៈ រាយការណ៍ឱ្យដឹងថា ក្នុងពិធីបុណ្យទន្លេនៅខេត្តកំពង់ឆ្នាំង ខាងមុខនេះ មានការសម្ដែងសិល្បៈបុរាណសម័យច្រើនសម្បូរបែប និងប្លែកៗ ដោយមានការចូលរួមសម្ដែងពីក្រុមសិល្បៈមកពីខេត្តជិតខាង ពិសេសសិល្បៈធំក្នុងពិធីបុណ្យទន្លេនេះ គឺល្ខោនរឿង “ពុទ្ធិសែននាងកង្រី”៕ ដោយ ៖ បញ្ញាស័ក្តិ
