ស្ថាបនិករបស់ក្រុមហ៊ុនបច្ចេកវិទ្យាយក្សរបស់ចិន Huawei បានថ្លែងថា “គ្មានផ្លូវទេដែលអាមេរិចអាចកម្ទេចក្រុមហ៊ុនពួកយើងបាននោះ” ។
ថ្លែងនៅក្នុងកិច្ចសម្ភាន៍ផ្តាច់មុខជាមួយនឹង BBC លោក Ren Zhengfei បានពណ៌នាថា ការចាប់ខ្លួនកូនស្រីឈ្មោះ Meng Wanzhou គឺជារឿងនយោបាយ ។
បច្ចុប្បន្ន អាមេរិចបានធ្វើការចោទប្រកាន់អ្នកស្រី Meng Wanzhou ដែលជាប្រធានផ្នែកហិរញ្ញវត្ថុ Huawei ជាច្រើនករណី រួមមានការលាងលុយកខ្វក់ ការបន្លំធនាគារ និងការលួចការសម្ងាត់ផ្នែកពាណិជ្ជកម្ម។
ជុំវិញការចោទប្រកាន់នេះ ក្រុមហ៊ុន Huawei បានបដិសេធទាំងអស់។
ស្ថាបនិកក្រុមហ៊ុន បានបញ្ជាក់ថា “គ្មានផ្លូវទេដែលអាចមិចអាចកំទិចពួកយើងបាន។ ពិភពលោកមិនអាចចាកចេញពីពួកយើងបានទេ ពីព្រោះពួកយើងមានការអភិវឌ្ឍន៍ជាងគេ។ ទោះបីជាពួកគេបានបញ្ចុះបញ្ចូលប្រទេសកាន់តែច្រើនមិនឲ្យប្រើប្រាស់ពួកយើងបណ្តោះអាសន្ន ពួកយើងនៅតែអាចធ្វើឲ្យអ្វីៗបានដែរ”។
លោកថ្លែងថា “ប្រសិនជាភ្លើងរត់នៅភាគខាងលិច ភាគខាងកើតនៅភ្លឺ។ ប្រសិនជាភាគខាងជើងងងឹត នៅមានភាគខាងត្បូងវិញ។ អាមេរិចមិនតំណាងឲ្យពិភពលោកទាំងមូលនោះទេ។ អាមេរិចតំណាងឲ្យមួយភាគនៃពិភពលោកប៉ុណ្ណោះ”។
សូមបញ្ជាក់ថា ការអះអាងរបស់ស្ថាបនិកក្រុមហ៊ុន Huawei បានកើតឡើង បន្ទាប់ពីរដ្ឋមន្ត្រីការបរទេសអាមេរិច Mike Pompeo បានធ្វើការព្រមានប្រទេសសម្ព័ន្ធមិត្ត កុំឲ្យប្រើប្រាស់បច្ចេកវិទ្យារបស់ក្រុមហ៊ុនខាងលើ ដោយបញ្ជាក់ថា ប្រទេសទាំងនោះនឹងពិបាកមានទំនាក់ទំនងល្អជាមួយនឹងអាមេរិច បើពួកគេប្រើប្រាស់បច្ចេកវិទ្យា Huawei ៕ សុភ័ក្ត្រ
ប្រភព៖ BBC
