កោះកុង ៖ ស្នងការដ្ឋាននគរបាលខេត្តកោះកុង បានឲ្យដឹងថា កាលពីវេលាម៉ោង ២០និង០០នាទីយប់ នាថ្ងៃទី ១៨ ខែកុម្ភៈ ឆ្នាំ២០១៩ មានករណីហឹង្សាកាប់បង្ករបួសស្នាម ដោយកូនតិរច្ឆានខឹងនឹងឪពុកក្មេករបស់ខ្លួន ឃាត់មិនឲ្យវាយចៅ ក៏យកកាំបិតកាប់ ទៅលើឪពុកក្មេង ឲ្យរងរបួសធ្ងន់ កើតឡើងចំនួន ១ លើក នៅចំណុចភូមិ៤ សង្កាត់ដងទង់ ក្រុងខេមរភូមិន្ទ ខេត្ដកោះកុង ។
ករណីបង្កឡើងដោយ ឈ្មោះ រី លីម ភេទប្រុស អាយុ ២៩ឆ្នាំ ជនជាតិខ្មែរឥស្លាម មុខរបនេសាទ មានទីលំភូមិ៤ សង្កាត់ដងទង់ ក្រុងខេមរភូមិន្ទ ខេត្តកោះកុង បានយកកាំបិតខ្វែវ កាប់ទៅលើឈ្មោះ ឆៃ សាវ៉ាត ភេទប្រុស អាយុ ៥២ ឆ្នាំ ជនជាតិខ្មែរ មុខរបនេសាទ មានទីលំនៅដូចខាងលើ ជាជនរងគ្រោះ ត្រូវជាឳពុកក្មេក ចំពីលើក្បាលខាងក្រោយផ្នែកខាងស្តាំ បណ្ដាលឲ្យរបួសធ្ងន់ ដេរអស់ចំនួន ១៨ ថ្នេរ។
តាមការបញ្ជាក់ពីភរិយា និងប្រជាពលរដ្ឋនៅកន្លែងកើតហេតុបានឲ្យដឹងថា ដោយសារជនដៃដល់ ខឹងនឹងកូនរបស់ខ្លួន មិននៅដេកជាមួយ ហើយក៏បានវាយកូន ពេលនោះឈ្មោះ ឆៃ សាវ៉ាត (ឪពុកក្មេក) បានស្តីបន្ទោស និងបានឃាត់មិនឲ្យវាយចៅ ព្រមទាំងច្រានជនដៃដល់ចេញ ក្រោយមកជនដៃដល់ក៏ដើរទៅផ្ទះវិញ។ បានមួយសន្ទុះជនរងគ្រោះ ជាឳពុក្មេក បានដើរទៅតាមក្រោយ ព្រោះខ្លាចជនដៃដល់ទៅរករឿងប្រពន្ធ នៅពេលដើរទៅដល់ស្រាប់តែជននោះ បានទាញកាំបិតខ្វែវកាប់តែម្តង។
បច្ចុប្បន្ន ជនសង្ស័យត្រូវបានឃាត់ខ្លួន នៅអធិការដ្ឋាននគរបាលក្រុងខេមរភូមិន្ទ កំពុងសាកសួរ និងបំពេញសំណុំរឿង ចាត់ការទៅតាមនីតិវិធីច្បាប់ ៕ ដោយ ៖ កូឡាប
