ប្រទេសប៉ាគីស្ថានបានធ្វើការព្រមានថា ខ្លួននឹងធ្វើការតបត ប្រសិនជាឥណ្ឌាចាត់វិធានការយោធាប្រឆាំងនឹងខ្លួន។
ការព្រមានរបស់ប៉ាគីស្ថាននេះកើតឡើង ក្រោយពេលមានការវាយប្រហារដោយក្រុមសកម្មប្រយុទ្ធទៅលើកងកម្លាំងរបស់ឥណ្ឌានៅតំបន់ Kashmir បណ្តាលឲ្យកងកម្លាំងឥណ្ឌាជាច្រើននាក់បានស្លាប់ និងរងរបួស។
នាយករដ្ឋមន្ត្រីប៉ាគីស្ថាន Imran Khan បានថ្លែងតាមកញ្ចក់ទូរទស្សន៍ ដោយស្នើឲ្យភាគីឥណ្ឌាផ្តល់ភស្ថុតាងដើម្បីគាំទ្រការអះអាងរបស់ខ្លួនដែលថា ប៉ាគីស្ថានជាប់ពាក់ព័ន្ធនឹងការវាយប្រហារនោះ។
ជុំវិញបញ្ហានេះ ភាគីខាងឥណ្ឌាបានឆ្លើយតបវិញថា លោក Imran Khan កំពុងធ្វើការដោះសារជាថ្មីម្តងទៀត។
កាលពីថ្ងៃព្រហស្បតិ៍សប្តាហ៍មុន មានការវាយប្រហារដោយបំផ្ទុះគ្រាប់បែកទៅលើកកងកម្លាំងឥណ្ឌា បណ្តាលឲ្យទាហ៊ានឥណ្ឌាជាង ៤០នាក់បានស្លាប់បាត់បង់ជីវិត។
ក្រោយការវាយប្រហារ ក្រុមសកម្មប្រយុទ្ធឈ្មោះ Jaish-e-Mohammad ដែលមានមូលដ្ឋាននៅប្រទេសប៉ាគីស្ថាន បានចេញមុខអះអាងថា វាគឺជាទំនួលខុសត្រូវរបស់ពួកគេ។
ការវាយប្រហារ បានធ្វើឲ្យមានភាពតានតឹងកាន់តែខ្លាំងរវាងប្រទេសទាំងពីរ។
នៅក្នុងការប្រកាសតាមកញ្ចក់ទូរទស្សន៍ នាយករដ្ឋមន្ត្រីប៉ាគីស្ថានបានថ្លែងថា “ឥណ្ឌាគួរឈប់ដាក់កំហុសលើប៉ាគីស្ថានដោយគ្មានភស្ថុតាង” ហើយលោកក៏បានជំរុញឲ្យអាជ្ញាធរឥណ្ឌាចែករំលែកការស៊ើបការណ៍ដែលចោទប្រកាន់ប៉ាគីស្ថាន។
គាត់ថ្លែងថា “ប្រសិនជាអ្នក (ឥណ្ឌា) គិតថាអ្នកនឹងធ្វើការវាយប្រហារលើប៉ាគីស្ថាន ប៉ាគីស្ថានមិនគិតពីការតបតនោះទេ តែប៉ាគីស្ថាននឹងធ្វើការតបតតែម្តង”។
លោកបន្ថែមថា មានតែការចរចារប៉ុណ្ណោះដែលអាចដោះស្រាយបញ្ហានៅតំបន់ Kashmir បាន៕ សុភ័ក្ត្រ
ប្រភព៖ BBC