ប្រធានាធិបតីអាមេរិច ដូណាល់ ត្រាំបាននិយាយថា ស្ត្រីម្នាក់ដែលបានចាកចេញពីអាមេរិច ដើម្បីទៅធ្វើជាអ្នកឃោសនាឲ្យក្រុមរដ្ឋអ៊ីស្លាមក្នុងប្រទេសស៊ីរី នឹងមិនត្រូវអនុញ្ញាតិឲ្យត្រឡប់ចូលក្នុងប្រទេសវិញឡើយ។
លោកត្រាំបានបង្ហោះសារនៅក្នុង Twitter របស់លោក ដោយបានធ្វើការណែនាំដល់រដ្ឋមន្ត្រីការបរទេសអាមេរិច Mike Pompeo ឲ្យអោយស្ត្រីឈ្មោះ Hoda Muthana ត្រឡប់ចូលក្នុងប្រទេសអាមេរិចវិញឡើយ។
រដ្ឋមន្ត្រីការបរទេសអាមេរិចបានធ្លាប់បញ្ជាក់ខាងដើមថា ស្ត្រីវ័យ ២៤ឆ្នាំខាងលើមិនមែនជាជនជាតិអាមេរិចទៀតឡើយ ដូច្នេះនាងនឹងមិនត្រូវបានអាមេរិចទទួលយកឡើយ។
ទោះយ៉ាងណា ក្រុមគ្រួសារ និងមេធាវីរបស់នាងអះអាងថា នាងមានសញ្ញជាតិអាមេរិច។
ស្ត្រី Hoda Muthana ដែលបានធំធាត់នៅក្នុងរដ្ឋ Alabama សហរដ្ឋអាមេរិច បានធ្វើដំណើរទៅកាន់ប្រទេសស៊ីរី ដើម្បីចូលរួមជាមួយក្រុមភេរវករ IS នៅពេលដែលនាងមានអាយុ ២០។ នៅពេលនោះ នាងបានប្រាប់ក្រុមគ្រួសារថា នាងទៅចូលរួមព្រឹត្តិការណ៍ដែលរៀបចំដោយសកលវិទ្យាល័យ នៅក្នុងប្រទេសតួកកី។
សូមបញ្ជាក់ថា ករណីរបស់ស្ត្រីខាងលើស្រដៀងគ្នាទៅនឹងករណីរបស់ស្ត្រីម្នាក់ឈ្មោះ Shamima Begum ដែលត្រូវបានអង់គ្លេសដកហូតសញ្ញាតិ ក្រោយពេលនាងបានចាកចេញពីទីក្រុងឡុងដើម្បីទៅចូលរួមជាមួយនឹងក្រុម IS។ នាងចង់ត្រឡប់មកអង់គ្លេសវិញ ប៉ុន្តែត្រូវរដ្ឋាភិបាលអង់គ្លេសដកហូតសញ្ញាតិ៕ សុភ័ក្ត្រ
ប្រភព៖ BBC