ខេត្តពោធិ៍សាត់ ៖ បុរសម្នាក់ បានប្រើប្រាសកាំបិតកាកុក កាប់លើគូរទំនាស បុរសម្នាក់បណ្តាលឲ្យស្លាប់ ក្រោយក្រុមគ្រួសារព្យាយាមបញ្ជូនទៅសង្គ្រោះរហូតដល់មន្ទីរពេទ្យឯរាជធានីភ្នំពេញ និងម្នាក់ទៀតបានរងរបួសធ្ងន់កំពុងសម្រាកព្យាបាលនៅមន្ទីរពេទ្យ។ ករណីហឹង្សាកើតឡើងដោយចេតនា នៅពេលដែលប្រពន្ធជនរងគ្រោះនិងប្រពន្ធជនដៃដល់ មានទំនាស់ពាក្យសម្ដីគ្នារឿងជំពាក់លុយ ៧០០០រៀល ហើយភាគីខាងប្តីៗ ចូលមកឈ្លោះដែរ ក៏កើតជាអំពើកាប់គ្នាតែម្តង។
ឃាតកម្មបណ្ដាលឲ្យមានមនុស្សស្លាប់ និងរងរបួសខាងលើ បានបង្កការភ្ញាក់ផ្អើលឡើងនៅវេលាម៉ោង៧ យប់ថ្ងៃទី១៨ ខែកុម្ភៈ ឆ្នាំ២០១៩ ក្នុងព្រៃរនាមដាច់ស្រយាលមាត់បឹងទន្លេសាប ត្រង់ចំណុចលាបភេ ស្ថិតក្នុងភូមិកំពង់ឡរ ឃុំកំពង់ពោធិ៍ ស្រុកក្រគរ ខេត្តពោធិ៍សាត់។
ស្នងការដ្ឋាននគរបាលខេត្តពោធិ៍សាត់ បានឲ្យដឹងថា ជនរងគ្រោះ(ស្លាប់)ឈ្មោះ ម៉ក់ ឡុញ ភេទប្រុស អាយុ ៣៨ឆ្នាំ បច្ចុប្បន្ន ស្នាក់នៅចំណុចកើតហេតុ មានមុខរបរនេសាទត្រី មានទីលំនៅភូមិកំពង់ឡរ ឃុំកំពង់ពោធិ៍ ស្រុកក្រគរ ខេត្តពោធិ៍សាត់ រងរបួសលើផ្ទៃមុខផ្នែកខាងឆ្វេង ហើយបាន ស្លាប់នៅមន្ទីរពេទ្យឯរាជធានីភ្នំពេញ នាថ្ងៃទី២០ ខែកុម្ភៈនេះ និងម្នាក់ទៀតឈ្មោះ ជិន ជឿន ភេទប្រុស អាយុ ៤១ឆ្នាំ បច្ចុប្បន្ន ស្នាក់នៅចំណុចកើតហេតុ ជាអ្នកនេសាទត្រី មានទីលំនៅភូមិ.ឃុំជាមួយគ្នា បានរបួសដៃ ១កាំបិត និងជើង ១កាំបិត កំពុងសម្រាកព្យាបាលនៅមន្ទីរពេទ្យនៅឡើយ។ ករណីហឹង្សាដោយចេតនាមានស្ថានទម្ងន់ទោស(ស្លាប់)នេះ បង្កឡើងដោយជនសង្ស័យឈ្មោះ ជុំ សុខុម ភេទប្រុស អាយុ ៥៥ឆ្នាំ បច្ចុប្បន្ន ស្នាក់នៅចំណុចកើតហេតុ ជាអ្នកនេសាទត្រីជាមួយគ្នា មានទីលំនៅភូមិចំការលើ ឃុំបឹងខ្នារ ស្រុកបាកាន ខេត្តពោធិ៍សាត់ បានប្រើប្រាសកាំបិតកាកុក ជាអាវុធកាប់លើគូរទំនាសស្លាប់ និងរងរបួស ក្រោយធ្វើសកម្មភាពរួចបានរត់គេចខ្លួនបាត់។
នគរបាលមូលដ្ឋាន បានបន្តទៀតថា អំពើហិង្សាដោយចេតនាខាងលើ ផ្ដើមចេញពីទំនាស់ពាក្យសម្ដីគ្នារវាងប្រពន្ធនិងប្រពន្ធ ដោយប្រពន្ធជនរងគ្រោះ ស្លាប់ ជំពាក់លុយប្រពន្ធជនសង្ស័យដៃដល់ចំនួន ៧០០០រៀល បង្កឲ្យកើតមានទំនាស់ឡើងបែកផ្សែង រហូតផ្ទុះហិង្សាបែបនេះ ហើយភ្លាមៗនោះ ភាគីខាងជនរងគ្រោះរវល់ពេក ពុំបានផ្ដល់ព័ត៌មានឬរាយការណ៍មកសមត្តកិច្ចមូលដ្ឋាននោះទេ លុះជនរងរបួសស្លាប់បញ្ជូនត្រឡប់មកពីរាជធានីភ្នំពេញ ទើបមកដាក់ពាក្យបណ្ដឹង ធ្វើឲ្យជនបង្កមានឱកាសរត់គេបាត់បែបនេះ៕ ដោយ ៖ បញ្ញាស័ក្តិ
