តាកែវ ៖ ដើម្បីជួយសង្គ្រោះស្រូវរបស់បងប្អូនប្រជាពលរដ្ឋ ឯកឧត្តម អ៊ូច ភា អភិបាលខេត្តតាកែវ ក៏បានណែនាំឲ្យលោក ប៊ុន ហួរ ប្រធានមន្ទីរធនធានទឹក និងឧតុនិយមខេត្ត ធ្វើការកាយប្រឡាយទឹក បើកផ្លូវនាំទឹកពីប្រឡាយសាមគ្គី មកសង្គ្រោះស្រូវប្រាំងរបស់ប្រជាកសិករឲ្យបានទាន់ពេលវេលា។
ការណែនាំអោយមន្ទីរជំនាញចេញយុទ្ធនាការស្តារនិងកាយប្រឡាយទឹកដើម្បីសង្គ្រោះស្រូវរបស់ប្រជាពលរដ្ឋនេះគឺបានធ្វើនៅថ្ងៃទី២១ ខែកុម្ភៈ ឆ្នាំ២០១៩ ដែលឯកឧត្តមអ៊ូច ភា និង លោក ទុយ សុភ័ក្រ អភិបាលស្រុកបុរីជុលសារ លោក ឈួន ផាន់នី អភិបាលស្រុកទ្រាំង លោក ប៊ុន ហួរ ប្រធានមន្ទីរធនធានទឹក និងឧតុនិយមខេត្តតាកែវ រួមជាមួយអាជ្ញាធរពាក់ព័ន្ធ បានអញ្ជើញចុះពិនិត្យមើលប្រឡាយទឹកសាមគ្គី ស្ថិតនៅស្រុកទ្រាំង ដើម្បីធ្វើការបូមទឹកជួយសង្គ្រោះស្រូវជូនប្រជាពលរដ្ឋស្ថិតនៅឃុំធ្លក ស្រុកទ្រាំង និងក្នុងឃុំគោកពោធិ៍ ស្រុកបុរីជលសារ ដែលមានស្រូវចំនួន ១៥០ហិកតា កំពុងរងគ្រោះ។
ជាមួយគ្នានេះដែរ ឯកឧត្តម អ៊ូច ភា ក៏បានណែនាំដល់អាជ្ញាធរដែនដី នឹងសហគមន៍ប្រើប្រាស់ទឹក ត្រូវអប់រំប្រជាពលរដ្ឋ កុំអោយធ្វើស្រូវប្រាំងជាលើកទី២ នៅរដូវប្រាំងឆ្នាំនេះ ពោលគឺអាកាសធាតុក្តៅ ដែលធ្វើអោយមានភាពរាំងស្ងួតខ្លាំង ជាហេតុនាំអោយខ្វះខាតទឹកប្រើប្រាស់ ដូច្នោះត្រូវសន្សំសំចៃទឹកទុកសម្រាប់ប្រើក្នុងរដូវប្រាំងនេះផង ជៀសវាងកើតឡើងនៅការខ្វះខាតទឹកក្នុងការប្រើប្រាស់ជាប្រចាំថ្ងៃ ៕ ដោយ ៖ តាកែវ
