រាជធានីភ្នំពេញ ៖ នាយឧត្ដមសេនីយ៍ សន្តិបណ្ឌិត នេត សាវឿន បានលេីកឡេីងពីសភាពការណ៍បទល្មេីស ក្នុងឆ្នាំ២០១៨ចំនួន ២.៩៦៩លេីក ក្នុងនោះ បទល្មេីសឧក្រិដ្ឋ ៦២១លេីក និងបទល្មេីសមជ្ឈឹម២.៣៤៨លេីក ដែល សភាពការណ៍ទាំងនោះបានបណ្ដាលអោយមនុស្សស្លាប់ចំនួន ២៣៨នាក់ របួស ៨៤៤នាក់ រងគ្រោះ ៦១៩នាក់ បាត់ម៉ូតូ ៣៥៣គ្រឿង រថយន្ត ៤៩គ្រឿង និងសម្ភារៈ មាសប្រាក់មួយចំនួន។
នៅព្រឹក ថ្ងៃទី២១ ខែកុម្ភ: ឆ្នាំ២០១៩ នៅសាលប្រជុំក្រសួងមហាផ្ទៃ មានរៀបចំពិធី សន្និបាតបូកសរុបវាយតម្លៃសភាពការណ៍ និងលទ្ធផលកិច្ចប្រតិបត្តិការឆ្នាំ២០១៨ របស់អគ្គស្នងការដ្ឋាននគរបាលជាតិ និងផ្សព្វផ្សាយទិសដៅរបស់ក្រសួងមហាផ្ទៃឆ្នាំ២០១៩ ក្ក្រោមអធិបតីភាពលោក នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ តំណាងដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃដោយមានការអញ្ជេីញចូលរួមពី ឯកឧត្ដម នាយឧត្ដមសេនីយ៍ ឧត្ដមសេនីយ៍ ជាប្រធាន-អនុប្រធាននាយកដ្ឋាន លោកស្នងការ-ស្នងការរងនគរបាលជាតិទាំង២៥ រាជធានី-ខេត្ត សរុប ៣៥៥រូប។
ជាជាកិច្ចចាប់ផ្ដេីមលោក នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិបានសម្ដែងនូវការ កោតសរសេីរចំពោះកងកម្លាំងនគរបាលជាតិទូទាំងបទេស ដែលបានខិតខំប្រឹងប្រែងក្នុងការអនុវត្តន៍ការងារយ៉ាងម៉ឺងម៉ាត់ ក្នុងរយៈពេល១ឆ្នាំកន្លងមក ឆ្នាំ២០១៨ ដោយគ្រប់គ្រងបាននូវសន្តិសុខ សណ្ដាប់ធ្នាប់ សុខសុវត្ថិភាព នៅក្នុងផ្ទៃប្រទេសបានយ៉ាងល្អប្រសេីរ ដោយទប់ស្កាត់ និងបញ្ជៀសបាននូវអំពេីភេរវកម្ម ការពារបាននូវបូរណភាពទឹកដី អធិបតេយ្យជាតិ ការពាររឹងមាំនូវឯករាជ្យជាតិ សាមគ្គីភាព ឯកភាពផ្ទៃក្នុង ស្របពេលដែលស្ថានការណ៍ក្នុងតំបន់មួយចំនួនកំពុងជួបវិបត្តិ ។ ក្នុងនោះដែរលោក នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិបានលេីកឡើងពីសភាពការណ៍បទល្មេីស ដោយបទល្មេីសជារួមកេីនឡេីង ១២៥លេីក ស្មេី៥% (២.៩៦៩/២.៨១៧លេីក) ក្នុងនោះ បទល្មេីសឧក្រិដ្ឋកេីន ៧លេីក ស្មេី១% (៦២១/៦១៤លេីក) និងបទល្មេីសមជ្ឈឹមកើន ១៤៥លេីក ស្មេី៧% (២.៣៤៨/២.២០៣លេីក) សភាពការណ៍ទាំងនោះបានបណ្ដាលអោយមនុស្សស្លាប់ចំនួន ២៣៨នាក់ របួស ៨៤៤នាក់ រងគ្រោះ ៦១៩នាក់ បាត់ម៉ូតូ ៣៥៣គ្រឿង រថយន្ត ៤៩គ្រឿង និងសម្ភារៈ-មាសប្រាក់មួយចំនួន។ ដោយក្នុងនោះកត់សម្គាល់ឃេីញ ៖
-បទល្មេីសដែលកើនឡេីងរួមមាន ៖ ឆក់ លួច ឆបោក រំលោភសេពសន្ថវៈ ហិង្សាដោចេតនា បង្ខាំងមនុស្សខុសច្បាប់ ប្រេីប្រាស់អាវុធខុសច្បាប់ រំលោភសម្លាប់ និងគម្រាមយកប្រាក់។
-បទល្មេីសដែលថយចុះរួមមាន ៖ លួចមានស្ថានទម្ងន់ បំពានខាងផ្លូវភេទដ៏ទៃទៀត ឃាតកម្ម បោក និងបង្កៃគ្រាប់បែក មនុស្សឃាតអចេតនា។
ចំណែកទិសដៅការងារដែលអគ្គស្នងការនគរបាលជាតិ បានកំណត់ និងដាក់ចេញនូវវិធានការសម្រាប់អនុវត្តន៍ឆ្នាំ២០១៩ រួមមាន ៖
-ការពារបូរណភាពទឹកដីអោយបានគង់វង្ស ពង្រឹងខឿនសន្តិសុខអោយបានរឹងមាំ ដែលជាបុព្វបទស្នូលសម្រាប់ការអភិវឌ្ឍន៍ជាតិ និងកាត់បន្ថយភាពក្រីក្រ ពិេសសការធានាបានបរិយាកាសល្អប្រសេីរ ដើម្បីដំណេីរការការបោះឆ្នោតជ្រេីសរេីសក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ នៅថ្ងៃទី ២៦ ខែឧសភា ឆ្នាំ២០១៩ អោយប្រព្រឹត្តិទៅដោយរលូន។
-ការពារជាតិសាសនា ព្រះមហាក្សត្យ និងរាជរដ្ឋាភិបាលស្របច្បាប់ ធានាប្រក្រតីភាពស្ថាប័នទាំងបី របស់រដ្ឋអោយដំណេីរការជាប្រក្រតី រក្សា និងលេីកស្ទួយគោលនយោបាយសុខដុមនីយកម្ម ពង្រឹងសាមគ្គីភាព ឯកភាពជាតិ ទប់ស្កាត់កម្លាំងអមិត្តដែលមានបំណងបំផ្លាញសមិទ្ធផលសង្គមជាតិ។
-យកចិត្តទុកដាក់ពង្រឹងកងជួរនគរបាលគ្រប់ផ្នែក គ្រប់ថ្នាក់ អោយមានសមត្ថភាពក្នុងការរ៉ាប់រងភារកិច្ច អប់រំ បំពាក់បប៉នស្មារតី សតិអារម្មណ៍ ស្មោះត្រង់ការងារ បម្រេីប្រជាជនអោយអស់ពីចិត្តពីថ្លើម ប្រកបដោយគុណធម៌ សីលធម៌ និងមានមនសិការវិជ្ជាជីវៈ។
-គ្រប់នាយកដ្ឋាន-អង្គភាព និងស្នងការដ្ឋាននគរបាលរាជធានី-ខេត្ត ត្រូវរៀបចំក្រុមតាមដានព័ត៌មានបច្ចេកវិទ្យា (បណ្ដាញទំនាក់ ទំនងសង្គម) ដែលជាសំណូមពរប្រជាពលរដ្ឋ ឬការទិទៀន ឬជាព័ត៌មានដែលបំពុលសភាពការណ៍ បង្កចលាចលសង្គម ឬវាយ ប្រហារមកលេីអង្គភាពរបស់ខ្លួន ដើម្បីធ្វេីការបកស្រាយ បំភ្លឺជូនប្រជាពលរដ្ឋផង និងប្រតិកម្មវាយបកអោយទាន់ពេលវេលា ការពារកិត្តិយសនគរបាលជាតិផង៕ ដោយ ៖ កូឡាប
