បុរសម្នាក់បានជួលឲ្យគេសាក់ អត្តសញ្ញាណប័ណ្ណរបស់ខ្លួននៅលើកំភួនដៃតែម្តង បង្ការក្រែងយប់អាធ្រាតស្រវឹងជ្រុលមានអ្នកជួយ ហើយក៏ចៀសផុតពីសមត្ថកិច្ច “នាំខ្លួន” ដើម្បីកំណត់…អត្តសញ្ញាណ ។
សាក់បែបនេះប្រាកដថាមិន…ជ្រុះ ឬភ្លេចយកតាម ។
អ្នកបង្ហោះរូបភាពនេះលើបណ្តាញសង្គមសរសេរថា ៖ “…នេះជារឿងរបស់អាម៉ាកខ្ញុំរស់នៅក្រុងព្រៃនគរ ។ វាជាជើងខ្លាំងខាង…ផឹក ហើយជាប្រចាំតែងវិលចូលផ្ទះនៅកណ្តាលអាធ្រាត ។ ពេលខ្លះត្រូវសមត្ថកិច្ចឆែករកលិខិតស្នាម ។ វាតែងតែភ្លេចយកតាមធ្វើឲ្យសមត្ថកិច្ចត្រូវនាំខ្លួនទៅសង្កាត់ជារឿយៗ ។
ឥឡូវវាខឹងណាស់ ! វាក៏នៅសាក់អត្តសញ្ញាណប័ណ្ណលើដៃតែម្តង… ឲ្យប្រាកដ! ។
ឃើញរូបសាក់នេះ គេពុំសូវខមិនបរិយាយពីមូលហេតុ នៃការសាក់អត្តសញ្ញាណប័ណ្ណទេ តែច្រើនសរសើរថា ៖ “ជាងសាក់ពិតជាមានទេពកោសល្យល្អ អក្សរតូចៗក៏មើលឃើញអស្ចារ្យណាស់!” ។
ខ្លះទៀតរំលឹកថា ៖ សូម្បីអត្តសញ្ញាណប័ណ្ណ copy គេមិនទទួលស្គាល់ផង ប្រឹងសាក់ធ្វើស្អី! មកផ្ទះឆាប់ឬឈប់ផឹកទៅប្រសើរជាង! ៕ ចន្ទ្រា