ភ្នំពេញ ៖ ប្រធានសាខាកាកបាទក្រហមរាជធានីភ្នំពេញ លោកឃួង ស្រេង បានមានប្រសាសន៍ថា អំណោយមនុស្សធម៌ របស់សប្បុរសជននានា ដែលជួយឧបត្ថមមកកាកបាទក្រហមកម្ពុជារាជធានីភ្នំពេញត្រូវតែផ្តល់ជូនទៅជនរងគ្រោះ និងជនដែលងាយរងគ្រោះ មិនអាចយកថវិកា ឬអំណោយទាំងនេះ ទៅឧបត្ថម្ភសម្រាប់បុគ្គលិកនៃ កាកបាទក្រហមនោះទេ។ ចំពោះប្រាក់ឧបត្ថម្ភមន្ត្រីរបស់កបាទក្រហមដែលបម្រើ លើការងារនេះ ត្រូវរកចំណូលផ្សេងៗទៀត ដាច់ខាតមិនត្រូវប៉ះពាល់ ទៅលើប្រាក់របស់សប្បុរសជនឡើយ។ ការធ្វើបែបនេះ នឹងធ្វើឱ្យសប្បុរសជន ដែលគេជួយឧបត្ថម្ភមកយើង គេមានទំនុកចិត្តនិង និងអាចបន្តជួយដល់សកម្មភាព របស់កាកបាទក្រហមបន្តទៀត ។
នាព្រឹកថ្ងៃសុក្រ ទី២២ ខែកុម្ភៈ ឆ្នាំ២០១៩ សាខាកាកបាទក្រហមរាជធានីភ្នំពេញ បានបើកកិច្ចប្រជុំគណៈកម្មាធិការសាខាកាកបាទក្រហមកម្ពុជារាជធានីភ្នំពេញលើកទី១ ក្រោមអធិបតីភាព លោក ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជារាជធានីភ្នំពេញ ដើម្បីពិភាក្សាត្រួតពិនិត្យ និងអនុវត្តទិសដៅបន្តឱ្យមានប្រសិទ្ធភាព តម្លាភាព ស្របតាមគោលការណ៍គ្រឹះទាំង៧ប្រការ របស់ចលនា កាកបាទក្រហម អឌ្ឍចន្ទក្រហម គឺភាពមនុស្សធម៌ ភាពមិនលំអៀង អព្យាក្រិត្យភាព ឯករាជ្យភាព សេវាកម្មស្ម័គ្រចិត្ត ឯកភាព និងសកលភាព។
លោកឃួង ស្រេង បានធ្វើឡើងថា កិច្ចប្រជុំនោះក៏បានពិភាក្សា ទៅលើការចំណូលចំណាយ របស់កាកបាទក្រហម ការរៀបចំការបណ្ដុះបណ្ដាល ធនធានមនុស្សពិសេស ការបណ្ដុះបណ្ដាលយុវជនកាកបាទក្រហម ដែលក្នុងឆ្នាំ ២០១៩ នេះ យុវជនកាកបាទក្រហមរាជធានី នឹងត្រូវជ្រើសរើសឡើង ចំនួន៣០០០ នាក់ ដើម្បីបម្រើឲ្យសកម្មភាពមនុស្សធម៌ ដូចជាការសង្គ្រោះបឋម ការផ្សព្វផ្សាយនូវ ច្បាប់ចរាចរណ៍ផ្លូវគោក និងការអប់រំ ពាក់ព័ន្ធនឹងបញ្ហាគ្រឿងញៀនជាដើម ។
លោកឃួង ស្រេង បានបន្តទៀតថា ថវិកាដែលបម្រើដល់សកម្មភាពមនុស្សធម៌ ដាច់ខាតត្រូវតែប្រើប្រាស់ឲ្យចំគោលដៅ ដើម្បីឲ្យ សប្បុរសជនមានទំនុកចិត្ត តាមអនុសាសន៍ដ៏ខ្ពង់ខ្ពស់របស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា។
មន្ត្រីសាខាកាកបាទក្រហមរាជធានីភ្នំពេញ បានឲ្យដឹងថា កន្លងមកនេះ សាខាកាកបាទក្រហមរាជធានីភ្នំពេញ បានជួយបញ្ជូន ជនរងគ្រោះ ទៅកាន់មណ្ឌលសុខភាព ឬមន្ទីរពេទ្យ នៅជិតបំផុតបានទាន់ពេលវេលា បានចុះពិនិត្យតាមដាន សកម្មភាពការងារជាប់ជាប្រចាំ។ កាត់បន្ថយអត្រាឆ្លងមេរោគអេដស៍ ឱ្យនៅកម្រិតទាបបំផុត ការបង្ការទប់ស្កាត់ការរីករាលដាល មេរោគអេដស៍ បំបាត់ការរើសអើង អ្នកផ្ទុកមេរោគអេដស៍ជំងឺអេដស៍ ការទប់ស្កាត់ជំងឺឆ្លងផ្សេងៗ ដូចជាជំងឺគ្រុនឈាម គ្រុនចាញ់ គ្រុនផ្តាសាយបក្សីប្រភេទថ្មីៗជាដើម៕ ដោយ ៖ កូឡាប