ស្វាយរៀង ៖ លោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ច នៅព្រឹកថ្ងៃទី១៨ ខែធ្នូ ឆ្នាំ២០១៧នេះ បានអញ្ជើញចូលរួមជាគណៈអធីបតី ក្នុងពិធីបញ្ចុះបឋមសិលាកសាងអគារមណ្ឌលសុខភាព ឃុំគគីរ ស្រុករមាសហែក ខេត្តស្វាយរៀង។
នៅក្នុងពិធីនេះមានអញ្ជើញអមដំណើរដោយលោកនាយឧត្តមសេនីយ៍ សៅ សុខា មេបញ្ជាកងរាជអាវុធហត្ថលើផ្ទៃប្រទេស និងលោកនាយឧត្តមសេនីយ៍ ជៀង អំ រដ្ឋលេខាធិការក្រសួងការពារជាតិ នាយឧត្តមសេនីយ៍ ជ័យ សុន អគ្គលេខាធិការអាជ្ញាធរគីមីសាស្ត្រ លោកស្រីតាំវួចឆេងរដ្ឋលេខាធិការក្រសួងសុខាភិបាល ព្រមទាំងអាជ្ញាធរដែនដី កងកំលាំងប្រដាប់អាវុធយ៉ាងច្រើនកុះករផងដែរ។
បើតាមប្រសាសន៍របស់លោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀងបានអោយដឹងថា ៖ អគារមណ្ឌលសុខភាពនេះមានប្រវែងបណ្តោយ ១២,៣ម៉ែត្រ ទទឹង៩,៥ម៉ែត្រ ដែលជាការកសាងឡើងដោយរាជរដ្ឋាភិបាលកម្ពុជា។
លោកជំទាវ ម៉ែន សំអន បានមានប្រសាសន៍ថា ៖ “ក្នុងនាមរាជរដ្ឋាភិបាល ខ្ញុំសូមសម្តែងនូវការកោតសសើរចំពោះអស់លោក លោកស្រី រដ្ឋមន្ត្រីក្រសួងសុខាភិបាល រដ្ឋបាលខេត្តស្វាយរៀង រដ្ឋបាលស្រុករមាសហែក ដែលបានខិតខំរួមគ្នាជាមួយមជ្ឈមណ្ឌលកំចាត់មីនកម្ពុជា(ស៊ីម៉ាក់) ជាពិសេស ក្រុមការងារប្រតិបត្តិការបោសសំអាតគ្រាប់បែកគីមី អាជ្ញាធរ អាវុធគីមីបានរកឃើញ និងវាយតម្លៃយកគ្រាប់បែកគីមីចំនួនមួយគ្រាប់ក្នុងបរិវេណវត្តគគីរ ហើយបានជួយសម្រួលក្នុងការជម្លៀសបងប្អូនពីកន្លែងបោសសំអាតគ្រាប់បែកគីមី មកកាន់ទីកន្លែងមានសុវត្ថិភាព និងបានពិនិត្យព្យាបាលជម្ងឺ ហើយបានសិក្សាស្រាវជ្រាវ និងវាយតម្លៃផលប៉ះពាល់សុខភាពដល់ប្រជាពលរដ្ឋ។
លោកជំទាវឧបនាយករដ្ឋមន្ត្រី បានបន្តទៀតថា ក្រសួងសុខាភិបាលបានយកចិត្តទុកដាក់ក្នុងការពិនិត្យសុខភាពជូនបងប្អូន និងបានចុះសិក្សាស្រាវជ្រាវជាបន្តបន្ទាប់បានរកឃើញអ្នកជំងឺរងផលប៉ះ ពាល់ដោយសារធាតុគីមី នៅក្នុងឃុំគគីនេះ រោគសញ្ញាទាំងនោះមាន ៖ រោគសញ្ញាមិនធម្មតាក្បាលធំ ស្វិតដៃ ស្វិតជើង ថប់ដង្ហើម អាឡាក់ស៊ីស្បែក និងរមាសជាដើម។ល។ ដោយពិនិត្យឃើញភាពចាំបាច់ពាក់ព័ន្ធនឹងសុខ ភាពប្រជាពលរដ្ឋនៅឃុំគគីនេះ ទើបសម្តេចតេជោនាយករដ្ឋមន្ត្រី បានណែនាំមកក្រសួងសុខាភិបាលឱ្យគិតគូរជាបន្ទាន់កសាងមណ្ឌលសុខភាពគគីនេះ ដើម្បីថែរក្សាសុខភាព និងពិនិត្យព្យាបាលជំងឺដែលកើតចេញពីផលប៉ះពាល់គ្រាប់បែកគីមីរបស់អាមេរិកនេះជូបបងប្អូនប្រជាពលរដ្ឋ។
តាមរបាយការណ៍ស៊ីម៉ាក់បានរកឃើញទីតាំងគ្រាប់បែកគីមីដែលទម្លាក់ ដោយអាមេរិកបានកើនឡើងដល់២២ទីតាំង នៅក្នុងស្រុករមាសហែក ខេត្តស្វាយរៀង និងចំការគ្រាប់បែកចង្កោមមួយចំនួនទៀត៕ វ៉ៃកូ
