ត្បូងឃ្មុំ ៖ អធិការដ្ឋាននគរបាលស្រុកមេមត់ បានឲ្យដឹងថា ប៉ុស្តិ៍នគរបាលរដ្ឋបាលរំចេក ចុះណែនាំ និងចុះកិច្ចសន្យា ឲ្យបញ្ឈប់ការផ្តល់ទីតាំង ឲ្យមានលេងល្បែងស៊ីសងខុសច្បាប់ ដល់ម្ចាស់ផ្ទះមួយកន្លែង នៅឃុំរំចេក ។
នៅថ្ងៃទី ២៤ កុម្ភៈ ២០១៩ វេលាម៉ោង ១៥ និង ២០ នាទី នាយប៉ុស្តិ៍នគរបាលរដ្ឋបាលរំចេក បានដឹកនាំកម្លាំង ចុះធ្វើស្រាវជ្រាវករណីផ្តល់ទីតាំង ឲ្យមានការល្បែងស៊ីសងខុសច្បាប់ នៅចំណុចគីឡូម៉ែត២៤ ស្ថិតក្នុងភូមិឃ្លៀច ឃុំរំចេក ស្រុកមេមត់ ខេត្តត្បូងឃ្មុំ ដោយទទួលបានព័ត៌មាន និងការបញ្ជា របស់លោកអធិការនគរបាលស្រុកមេមត់ ។
ការចុះស្រាវជ្រាវបានឲ្យដឹងថា ៖ កន្លែងផ្តល់ទីតាំងឲ្យមានការល្បែងស៊ីសងខុសច្បាប់ មានម្ចាស់ផ្ទះឈ្មោះ ហេង ដាណា ហៅ ឌីស្កូ ភេទប្រុស អាយុ ៣១ ឆ្នាំ បើកឲ្យលេងល្បែងស៊ីសង នៅពេលយប់ (ទាល់ភ្លឺៗ) ពិតប្រាកដមែន ។ ហើយនាយប៉ុស្តិ៍បានហៅឈ្មោះ ហេង ដាណា ហៅ ឌីស្កូ មកធ្វើកំណត់ហេតុ និងចុះកិច្ចសន្យាបញ្ឈប់ ឲ្យមានការផ្តល់ទីតាំង ឲ្យមានការល្បែងស៊ីសងខុសច្បាប់ នៅប៉ុស្តិ៍នគរបាលរដ្ឋបាលរំចេក ។
លោកអនុសេនីយ៍ឯក ថ្លាង សាវ៉ុន នាយប៉ុស្តិ៍នគរបាលរដ្ឋបាលរំចេក បានបញ្ជាក់បន្ថែមថា “ក្នុងករណីមិនរាងចាល គឺយើងត្រូវអនុវត្តទៅតាមនីតិវិធីច្បាប់ ចាប់ខ្លួនបញ្ជូនឲ្យទៅតុលាការផ្តន្ទាទោសដាក់ពន្ធនាគារ” ។
ម្ចាស់ផ្ទះឈ្មោះ ហេង ដាណា ហៅ ឌីស្កូ បាននិយាយពីដំណើររឿងថា ខ្ញុំបាទ សូមនិយាយតែពាក្យពិតទាំងអស់ ជូនសមត្ថកិច្ច ។ បច្ចុប្បន្ននៅខាងក្រោយផ្ទះរបស់ខ្លួន បានសង់រោងចំនួន១ ទទឹង៦ម៉ែត្រ បណ្តោយ១២ម៉ែត្រ ធ្វើសម្រាប់លក់ ស៊ុប សាច់គោអាំង និងម្អូបក្លែម ព្រមទាំងលក់ស្រាបៀរ និងភេសជ្ជៈគ្រប់មុខ ហើយដាក់ទូរទស្សន៍ សម្រាប់ភ្ញៀវមកទទួលទានអាហារមើល។ នៅកន្លែងរបស់ខ្ញុំលក់ដូរនេះ ពុំមានផ្តល់សេវា ឲ្យលេងល្បែងស៊ីសងខុសច្បាប់ដូចជា មាន់ជល់ អាប៉ោងទេ។ តែបើជាថ្ងៃសៅរ៍ និងថ្ងៃអាទិត្យ មានភ្ញៀវមកច្រើន គឺពួកគាត់មកមើលប្រដាល់ក្នុងទូរទស្សន៍។ ចំពោះភ្ញៀវមកហូបស្រា គឺមានដល់យប់ជ្រៅម្តងម្កាល៕ ដោយ៖បញ្ញាស័ក្តិ