អាជ្ញាធរប្រទេសអូស្ត្រាលីបានចាប់បុរសម្នាក់ អាយុ ៥៩ឆ្នាំ ដែលដើរតួជាភ្នាក់ងារសេដ្ឋកិច្ចឲ្យ កូរ៉េខាងជើង ក្នុងគោលបំណងរកចំណូលឲ្យរដ្ឋាភិបាលព្យុងយ៉ាង។ នេះបើតាមការចេញផ្សាយរបស់សារព៌តមាន CNN ដ៏ល្បីរបស់អាមេរិច នៅថ្ងៃច័ន្ទនេះ។
ប៉ូលីសសហព័ន្ធរុស្សីបានបញ្ជាក់ថា បុរសម្នាក់នោះមានឈ្មោះ Chan Han Choi។ គាត់គឺជាជនជាតិអូស្ត្រាលី មានដើមកំណើតកូរ៉េខាងត្បូង និងបានរស់នៅក្នុងទីក្រុងស៊ីតនី។
ប៉ូលីសបាននិយាយថា បុរសរូបនោះបានគួកគេ (ធ្វើឈ្មួញកណ្តាល) លក់មីស៊ីល ធាតុផ្សំសំរាប់ផលិតមីស៊ីល និងបច្ចេកទេសជំនាញ ពីកូរ៉េខាងជើងទៅឲ្យស្ថាប័នអន្តរជាតិជាច្រើន និងបានពិភាក្សាគ្នាពីការផ្គត់ផ្គងអាវុធដ៏គ្រោះថ្នាក់។
ប៉ូលីសបញ្ជាក់ទៀតថា បុរសដដែលក៏មានគំរោងផ្ទេររំលែក ធ្យូងថ្មពីកូរ៉េខាងជើង ទៅកាន់ក្រុមហ៊ុនជាច្រើនក្នុងប្រទេសវៀតណាម និងឥណ្ឌូនេស៊ី។ ប៉ុន្តែមិនមានភស្ថុតាងបញ្ជាក់ថា រដ្ឋាភិបាលនៃប្រទេសទាំងពីរនេះបានដឹងពីគំរោងនោះទេ។
សកម្មភាពរបស់បុរសខាងលើ បានល្មើសទៅនឹងទណ្ឌកម្មរបស់អង្គការសហប្រជាជាតិ និងអូស្ត្រាលីប្រឆាំងនឹងកូរ៉េខាងជើង។ បើតាមទណ្ឌកម្មថ្មីៗរបស់អង្គការសហប្រជាជាតិ បានហាមប្រាមមិនឲ្យមានការនាំចូលអ្វីៗគ្រប់យ៉ាងពីកូរ៉េខាងជើង រាប់តាំងពី គ្រឿងសមុទ្រ កំលាំងពលកម្ម ព្រមទាំងការដាក់ហ៊ុនរួមគ្នាជាមួយកូរ៉េខាងជើង។
បុរសដែលត្រូវចាប់ខ្លួននោះ កំពុងប្រឈមនឹងការចោទប្រកាន់ចំនួន ៦ករណីទាក់ទងនឹងការប្រព្រឹត្តរបស់គាត់។
ជំនួយការស្នងការប៉ូលីសសហព័ន្ធអូស្ត្រាលី ឈ្មោះ Neil Gaughan បាននិយាយថា “ករណីនេះគឺជាករណីដែលពួកយើងមិនធ្លាប់ឃើញពីមុនមកនៅអូស្ត្រាលី”៕ សុភ័ក្ត្រ