ខេត្តស្វាយរៀង ៖ មន្ទីរសាធារណការ និងដឹកជញ្ជូនខេត្តស្វាយរៀង នាព្រឹកថ្ងៃចន្ទ ៦រោច ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៥ ខែកុម្ភៈ ឆ្នាំ២០១៩ បានសហការជាមួយមន្ទីរ ទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចខេត្ត បានរៀបចំកម្មវិធីចុះអប់រំ ផ្សព្វផ្សាយ ច្បាប់ស្តីពីចរាចរណ៍ផ្លូវគោក ដល់សិស្សានុសិស្សនៃវិទ្យាល័យ ហ៊ុនសែនកំពង់ចក ដោយមានការចូលរួមពី លោកនាយកវិទ្យាល័យ ហ៊ុនសែនកំពង់ចក លោកអធិការរងស្រុករំដួល លោកនាយបុស្តិ៍នគរបាលរដ្ឋបាល លោកគ្រូ អ្នកគ្រូ និងសិស្សានុសិស្ស សរុបចំនួន ៧០៨នាក់ (ស្រី ៣៨៥នាក់) ។
សូមបញ្ជាក់ផងដែរថាៈកម្មវិធីអប់រំផ្សព្វផ្សាយនាពេលនេះ រៀបចំឡើងដើម្បីផ្តល់នូវចំណេះដឹងបន្ថែម ស្តីពីសុវត្ថិភាព ចរាចរណ៍ ដល់អ្នកប្រើប្រាស់ផ្លូវ ជាពិសេស សិស្សានុសិស្ស ដែលស្ថិតក្នុងវ័យប្រើប្រាស់កង់ ឬម៉ូតូ ជាមធ្យោបាយធ្វើដំណើរ និងជាជនងាយរងគ្រោះថ្នាក់ដោយសារគ្រោះថ្នាក់ចរាចរណ៍ ឱ្យមានការយល់ដឹងកាន់តែច្បាស់ ក៏ដូចជាការពញ្ញាក់ស្មារតីឱ្យមានការប្រុងប្រយ័ត្ន និងត្រូវ គោរពច្បាប់ចរាចរណ៍ផ្លូវគោកទាំងអស់គ្នា ឱ្យបានខ្ជាប់ខ្ជួន ហើយយកចំណេះដឹងដែលខ្លួន ទទួលបានទៅអប់រំ និងផ្សព្វផ្សាយបន្តដល់ក្រុមគ្រួសារ និងមិត្តភក្តិ ។
នៅក្នុងកម្មវិធីអប់រំផ្សព្វផ្សាយនេះ មានការចែកជូននូវឯកសារពាក់ព័ន្ធ ស្តីពីសុវត្ថិភាពចរាចរណ៍ផ្លូវគោក រួមមាន ៖
ទី១-សៀវភៅអ្នកបើកបរទោចក្រយានយន្តត្រូវយល់ដឹង ចំនួន ១៨០ក្បាល
ទី២-សៀវភៅច្បាប់ ស្តីពីចរាចរណ៍ផ្លូវគោក ចំនួន ៥០ក្បាល
ទី៣-ផ្ទាំងសញ្ញាចរាចរណ៍សំខាន់ៗ ចំនួន ១០ផ្ទាំង
ទី-ផ្ទាំងសិទ្ធិអាទិភាព នៅត្រង់ផ្លូវប្រសព្វ ចំនួន ១០ផ្ទាំង
ទី៥-ផ្ទាំងសំរាប់អ្នកថ្មើរជើង ចំនួន១០ផ្ទាំង
ទី៦ជំនួយស្មារតី ស្ដីពីច្បាប់ចរាចរណ៍ផ្លូវគោក ចំនួន ៥០សន្លឹក និងបិតស្ទីកឃ័រសុវត្ថិភាពកង់ និងម៉ូតូ ចំនួន ២០០សន្លឹក៕ ដោយ ៖ វ៉ៃកូ
