ខេត្តព្រះសីហនុ ៖ មន្ត្រីព័ត៌មានកងទ័ពជើងទឹកកម្ពុជា បានឲ្យដឹងថា កាលពីម៉ោងប្រមាណ ៩ព្រឹក ថ្ងៃទី២៥ ខែកុម្ភៈ ឆ្នាំ២០១៩ នាកំពង់ផែស្វយ័តក្រុងព្រះសីហនុ មាននាវាកងកម្លាំងស្វ័យការពារជប៉ុន ចំនួន ២គ្រឿង បានចូលចត ក្នុងដំណើរទស្សនកិច្ចជាផ្លូវការ នៅព្រះរាជាណាចក្រកម្ពុជា រយៈពេល៤ថ្ងៃ គឺគិតពីថ្ងៃទី២៥ ដល់២៨ ខែកុម្ភៈ ឆ្នាំ២០១៩។
មន្ត្រីកងទពជើងទឹកកម្ពុជា បន្តថា ដំណើរទស្សនកិច្ច របស់នាវាចម្បាំងជប៉ុន មកកម្ពុជាពេលនេះ ដើម្បីរិតចំណងសាមគ្គីភាព មិត្តភាព រវាងប្រទេសទាំងពីរ ជាពិសេស នឹងរៀបចំធ្វើការហ្វឹកហ្វឺន ដល់នាវិកកម្ពុជា ក្នុងការបំពេញការងារបើកបរនាវារយៈផ្លូវចម្ងាយឆ្ងាយផងដែរ។
កាលពីព្រឹកមិញនេះ មន្ត្រីកងទ័ពជើងទឹកកម្ពុជាជាច្រើននាក់ បានអញ្ជើញទៅទទួលបដិសណ្ឋារកិច្ច គណៈចប្រតិភូកងទ័ពជើងទឹកជប៉ុន ដល់កំពង់ផែស្វយ័តក្រុងព្រះសីហនុ។
នាឱកាសនោះដែរ ខាងភាគីកងទ័ពជើងទឹកកម្ពុជា បានបញ្ជាក់ថា ប្រតិភូកងទ័ពជើងទឹកជប៉ុនមកទស្សនកិច្ចការងារ៤ថ្ងៃនៅកម្ពុជាពេលនេះ គឺ តាមគម្រោង ក្រោយការចូលចត ប្រតិភូមេបញ្ជាការនាវាទាំង២ នឹងអញ្ជើញទៅទស្សនាព្រះបរមរាជវាំង សារមន្ទីរជាតិ វត្តអារាម សាលារៀន អង្គភាពមួយចំនួន ដាក់កម្រងផ្កា នៅវិមានឯករាជ្យ និងចូលជួបសំដែងការគួរសមជាមួយគណៈអភិបាលខេត្តព្រះសីហនុ និងមន្ត្រីយោធាជាន់ខ្ពស់ នៃកងយោធពលខេមរភូមិន្ទកម្ពុជាផងដែរ។
នាវាទាំងពីរគ្រឿង គឺនាវាទី១ មានឈ្មោះ SETOYUKI (TV-3518) មានបណ្តោយ ១៣០ម៉ែត្រ ទទឹង១៣,៦០ម៉ែត្រ ជម្រៅទឹក៨ ,៥០ម៉ែត្រ ទំងន់ផ្ទុក ៣០៥០តោន មាននាវិក ប្រមាណ១៦៧នាក់ និងមេបញ្ជាការនាវា ឈ្មោះ លោកវរនាវីទោ NAOTO NAKADERA។
ចំណែក នាវាទី២ ឈ្មោះ SHIMAYUKI (TV-3513) មានបណ្តោយ ១៣០ម៉ែត្រ ទទឹង ១៣,៦០ម៉ែត្រ -ជម្រៅទឹក៨ ,៥០ម៉ែត្រ ទំងន់ផ្ទុក ៣០៥០តោន។ នាវានេះមាននាវិក ប្រមាណ ១៦៧នាក់ និងមេបញ្ជាការនាវាឈ្មោះ លោកវរនាវីទោ TAKEHIKO SAITO។
ប្រធានប្រតិភូដឹកនាំនាវាខាងលើ គឺ លោកវរនាវីឯក YOSHIYUKI NAKAGANA មេបញ្ជាការហ្វឹកហ្វឺនអង្គភាពលេខ ១ នៃកងកម្លាំងស្វ័យការពារជប៉ុន៕ ដោយ៖ ដែន សីមា