កំពង់ស្ពឺ ៖ លោកឧត្តមសេនីយ៍ត្រី ជូ សារុន បានស្នើឲ្យមន្ត្រីអាវុធហត្ថទាំងអស់មិនអនុញ្ញាតិឱ្យពិសាគ្រឿងស្រវឹងក្នុងពេលបំពេញភារកិច្ច និងត្រូវស្លៀកពាក់ឯកសណ្ឋានឱ្យបានត្រឹមត្រូវ និងមានវិន័យ ការពារជូនថ្នាក់ដឹកនាំជាន់ខ្ពស់ ជូនភ្ញៀវជាតិ និងអន្តរជាតិ ដែលធ្វើដំណើរទៅចូលរួមក្នុងពិធីបុណ្យសមុទ្រនៅខេត្តកែប។
ព្រឹកថ្ងៃចន្ទ ទី១៨ ខែធ្នូ ឆ្នាំ២០១៧ លោកឧត្តមសេនីយ៍ត្រី ជូ សារុន មេបញ្ជាការកងរាជអាវុធហត្ថខេត្តកំពង់ស្ពឺ ដឹកនាំប្រជុំផ្សព្វផ្សាយផែនការការពារសន្តិសុខ សណ្តាប់ធ្នាប់ ក្នុងពិធីបុណ្យសមុទ្រ នៅខេត្តកែប ។ លោកមេបញ្ជាការបានលើកឡើងថា៖ ក្នុងនាមលោកជាមេបញ្ជាការអង្គភាពស្នើសុំមានសាមគ្គីភាពផ្ទៃក្នុងឱ្យបានល្អ មិនអនុញ្ញាតិឱ្យពិសាគ្រឿងស្រវឹងក្នុងពេលបំពេញភារកិច្ច ជាពិសេសស្នើនាយ នាយរងអាវុធហត្ថ មេបញ្ជាការរង នាយរងសេនាធិការ ប្រធាន-អនុប្រធានមន្ទីរ នាយ-នាយរងការិយាល័យ មេបញ្ជាការមូលដ្ឋានក្រុង-ស្រុក ស្នាក់ការសន្តិសុខ និងនាយ នាយរងអាវុធហត្ថទាំងអស់ត្រូវស្លៀកពាក់ឯកសណ្ឋានឱ្យបានត្រឹមត្រូវ មានវិន័យ សេចក្តីថ្លៃថ្នូរ សមស្របយើងជាមន្ត្រីអនុវត្តច្បាប់ ។
លោកមេបញ្ជាការបានបន្តថា ការដោះស្រាយធានាការហូបចុក ការស្នាក់នៅ មើលថែបញ្ហាសុខភាពជូននាយ នាយទាហានទាំងអស់ដែលកំពុងបំពេញភារកិច្ច ការពារជូនថ្នាក់ដឹកនាំជាន់ខ្ពស់ ជូនភ្ញៀវជាតិ និងអន្តរជាតិ ដែលធ្វើដំណើរទៅចូលរួមក្នុងពិធីបុណ្យសមុទ្រនៅខេត្តកែប នាថ្ងៃទី២២ ខែធ្នូ ឆ្នាំ២០១៧។
សូមបញ្ជាក់ថា ពិធីបុណ្យសមុទ្រឆ្នាំ២០១៧ និងធ្វើឡើងនៅខេត្តកែប ដោយមានថ្នាក់ដឹកនាំជាន់ខ្ពស់ ភ្ញៀវទេសចរណ៍ជាតិ អន្តរជាតិ ប្រជាពលរដ្ឋអញ្ជើញចូលរួមក្នុងពិធីបុណ្យសមុទ្រច្រើន ដូច្នេះតម្រូវឱ្យកងរាជអាវុធហត្ថខេត្តកំពង់ស្ពឺ ទទួលភារកិច្ចសហាការការពារសន្តិសុខ សុវត្តិភាព រក្សាសណ្តាប់ធ្នាប់សាធារណៈតាមដងផ្លូវជាតិលេខ៤ និងផ្លូវជាតិលេខ៤១ រហូតដល់ក្នុងពិធីផងដែរ ៕ ដោយ ៖ បញ្ញាស័ក្តិ
