ភ្នំពេញ ៖ កម្ពុជាបានក្លាយជាសមាជិក នៃអង្គការអន្តរជាតិខាងការងារ(ILO) តាំងពីឆ្នាំ១៩៦៩ ប៉ុន្តែដោយសារជម្លោះផ្ទៃក្នុង និងសង្គ្រាមស៊ីវិល អស់រយៈពេលជិត ៣០ឆ្នាំ កិច្ចសហការទាំងឡាយ ក៏លែងមាន។ នៅត្រឹមដើមទស្សវត្សរ៍ឆ្នាំ១៩៩០ ប៉ុណ្ណោះដែលអង្គការអាយឡូ បានក្លាយជាដៃគូដ៏គួរឲ្យទុកចិត្ត ក្នុងការស្តារសេដ្ឋកិច្ច និងប្រជាធិបតេយ្យនៅកម្ពុជា។
នាទីស្តីការក្រសួងការងារ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានដឹកនាំកិច្ចប្រជុំ ដើម្បីត្រៀមរៀបចំព្រឹត្តិការណ៍គម្រប់ខួប១០០ឆ្នាំ នៃការបង្កើតអង្គការអន្តរជាតិខាងការងារ (ILO) និងខួប៥០ឆ្នាំ នៃសមាជិកភាពកម្ពុជានៅអង្គការអន្តរជាតិខាងការងារ នៅព្រឹកថ្ងៃទី២៥ ខែកុម្ភៈ ឆ្នាំ២០១៩។
លោក អ៊ិត សំហេង បានថ្លែងថា ព្រឹត្តិការណ៍នេះពិតជាមានសារសំខាន់ណាស់សម្រាប់កម្ពុជា ដើម្បីបង្ហាញពីភាពជាដៃគូអំពីវឌ្ឍនភាពនៃកិច្ចសហប្រតិបត្តិការរវាងអង្គការអាយឡូ និងកម្ពុជានាពេលកន្លងមក ដែលតួនាទីនេះបានចូលរួមចំណែកក្នុងការអភិវឌ្ឍសេដ្ឋកិច្ចសង្គម ជាពិសេសសិទ្ធិស្តីពីការងារ។
លោកបានបន្ថែមថា មកទល់បច្ចុប្បន្ននេះ កម្ពុជាបានផ្តល់សច្ចាប័នលើអនុសញ្ញារបស់អង្គការ ILO ចំនួន១៣ ដែលក្នុងនោះរួមមាន អនុសញ្ញាស្នូល៨ ផងដែរ។ កម្ពុជាបានបន្តបំពេញភារកិច្ចរបស់ខ្លួន ក្នុងការអនុវត្តអនុសញ្ញាអន្តរជាតិ ឲ្យស្របតាមបទដ្ឋានអន្តរជាតិខាងការងារ និងបន្តការចូលរួមកិច្ចប្រជុំក្រុមប្រឹក្សាភិបាល(GB) សន្និសិទអន្តរជាតិខាងការងារ (ILC) និងកិច្ចប្រជុំថ្នាក់តំបន់ Asia-Pacific ៕ ដោយ ៖ កូលាប
