មេដឹកនាំកូរ៉េខាងជើង គីម ជុងអ៊ុន បានធ្វើដំណើរមកដល់ប្រទេសវៀតណាមហើយ ដើម្បីត្រៀមចូលរួមកិច្ចប្រជុំកំពូលជាមួយនឹងមេដឹកនាំអាមេរិច ដូណាល់ ត្រាំនៅក្នុងសប្តាហ៍នេះ។
រថភ្លើងពណ៌បៃតង និងលឿងរបស់មេដឹកនាំផ្តាច់ការរូបនេះ បានធ្វើដំណើរមកដល់ស្ថាននីយ៍ Dong Dang ប្រទេសវៀតណាម ហើយ គីម ជុងអ៊ុនកំពុងធ្វើដំណើរតាមរថយន្តទៅកាន់ទីក្រុងហាណូយ ដែលជាកន្លែងនៃកិច្ចប្រជុំកំពូល។
គាត់ត្រូវបានគេជឿជាក់ថា បានធ្វើដំណើរមកជាមួយនឹងប្អូនស្រីឈ្មោះ Kim Yo-jong និងអ្នកសម្របសម្រួលដ៏សំខាន់ម្នាក់របស់លោក។
រថភ្លើងដែលបាញ់មិនធ្លុះរបស់មេដឹកនាំរូបនោះបានធ្វើដំណើរពីទីក្រុងព្យុងយ៉ាងមកកាន់វៀតណាម ដោយប្រើពេលច្រើនជាង ២ថ្ងៃ និងធ្វើដំណើរចំងាយប្រហែល ៤០០០គីឡូម៉ែត្រ ឆ្លងកាត់ប្រទេសចិន។
ក្រោយពេលធ្វើដំណើរមកដល់ស្ថាននីយ៍ Dong Dang ប្រទេសវៀតណាម លោកត្រូវធ្វើដំណើរតាមរថយន្ត ក្នុងចំងាយប្រមាណ ១៧០គីឡូម៉ែត្របន្តទៀត ដើម្បីទៅកាន់ទីក្រុងហាណូយ។
វាគឺជារឿងគួរឲ្យភ្ញាក់ផ្អើលមួយដែរ ដែលមេដឹកនាំវ័យក្មេងរូបនេះបានជ្រើសរើសការធ្វើដំណើរតាមរថភ្លើង ហើយនេះជាអ្វីដែលតារបស់លោក បានធ្វើផងដែរ នៅពេលធ្វើដំណើរទៅកាន់វៀតណាម និងអ៊ឺរ៉ុបខាងកើត។
ចំណែកលោក ដូណាល់ ត្រាំវិញគ្រោងនឹងធ្វើដំណើរមកដល់ប្រទេសវៀតណាមនៅថ្ងៃអង្គារនេះ។ សម្រាប់ជំនួបកំពូលវិញ លោក ត្រាំនឹងធ្វើការពិភាក្សាគ្នាមួយទល់នឹងមួយជាមួយនឹង គីម ជុងអ៊ុននៅថ្ងៃពុធស្អែក ពេលល្ងាច ព្រមទាំងទទួលទានអាហារពេលល្ងាចជាមួយគ្នាផងដែរ។ នេះបើតាមការបញ្ជក់របស់អ្នកនាំពាក្យសេតវិមាន៕ សុភ័ក្ត្រ
ប្រភព៖ BBC
