ភ្នំពេញ ៖ លោកសាន សុផាត ចៅក្រមសាលាដំបូងរាជធានីភ្នំពេញ កាលពីថ្ងៃអាទិត្យទី ១៧ធ្នូ ឆ្នាំ២០១៧ បានចេញដីកាសម្រេចឃុំខ្លួនបុរសស្បែកខ្មៅ៤នាក់និងនារីខ្មែរម្នាក់ដាក់ពន្ធនាគារជាបណ្ដោះអាសន្ន ក្រោមការចោទប្រកាន់ពីបទឆបោក ពាក់ព័ន្ធករណីលួងលោមអោយជនរងគ្រោះផ្ញើរប្រាក់តាមវិងដើម្បីបើកយកកញ្ចប់បញ្ញើពីបរទេស ។
ជនរងគ្រោះក្នុងអំពើឆបោកសម័យថ្មីនេះឈ្មោះ ម៉ុច ចាន់ណារី អាយុ២៤ឆ្នាំ ស្នាក់នៅសង្កាត់អូរបែកក្អម ខណ្ឌសែនសុខ រាជធានីភ្នំពេញ ។
ពាក្យបណ្តឹងរបស់ជនរងគ្រោះបានបញ្ជាក់ថាគេបានស្គាល់បុរសបរទេសម្នាក់តាមទូរស័ព្ទ តែមិនដែលជួបមុខគ្នាផ្ទាល់ទេ លុះថ្ងៃទី១១ ធ្នូ ២០១៧ មានមនុស្សស្រីម្នាក់បានទូរស័ព្ទប្រាប់នាងថា ៤.៥ថ្មុៃមុនជនបរទេសនោះបានទូរស័ព្ទប្រាប់មកថា គេបានផ្ញើកាដូរមួយចំនួនឲ្យមកអ្នកស្រី ដែលក្នុងកាដូនោះមាន Latop ១គ្រឿង ទូរស័ព្ទ iphone6s ១គ្រឿង កាបូបស្បែកជើង ៤ឈុត គ្រឿងអលង្ការ១ឈុត ។ កាដូនោះបានមកដល់ស្រុកខ្មែរ តែបានតម្រូវឲ្យជនរងគ្រោះផ្ញើប្រាក់១,០០០ដុល្លារអាមេរិក ទៅឲ្យគេដើម្បីបានបើកយកកាដូនោះបាន ។
ពាក្យបណ្តឹងបញ្ជាក់ទៀតថា បន្ទាប់ពីបានផ្ញើប្រាក់១,០០០ដុល្លារអាមេរិករួចហើយ ស្ត្រីម្នាក់នោះគេបានទូរស័ព្ទមកថា ឲ្យផ្ញើប្រាក់២,០០០ដុល្លារបន្ថែមទៀត ទើបបើកយកកាដូនោះបាន ។ ម្តងជាពីរដងជនរងគ្រោះក៏មានការសង្ស័យ ទើបដឹងថាត្រូវចាញ់បោកជនជាតិខ្មែរ និងជនបរទេសមួយក្រុមនោះ ក៏បានទៅដាក់ពាក្យបណ្ដឹង នៅសមត្តកិច្ចនគរបាលនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ ឲ្យជួយចាត់ការលើបទល្មើសនេះ ។
ក្រោយពីទទួលបានពាក្យបណ្ដឹងភ្លាម កម្លាំងសមត្តកិច្ចនគរបាលជំនាញព្រហ្មទណ្ឌ បានបើកការសើបអង្កេត និងស្រាវជ្រាវ ឈានដល់ការឃាត់ខ្លួនជនសង្ស័យ៥នាក់ ក្នុងនោះមានពួកបុរសស្នបែកខ្សមៅ៤នាក់និងស្រី្តខ្មែរម្នាក់កសាងសំណុំរឿងបញ្ជូនឡើងតុលាការនាថ្ងៃទី ១៤ធ្នូ ឆ្នាំ២០១៧នេះ ។
ជនសង្ស័យទាំង៥នាក់ មានឈ្មោះ ៖ ១. ស៊ុំ ពិសី ភេទស្រី អាយុ ៤១ឆ្នាំ ។ ២ ឈ្មោះ Ilooanya clancyemeka អាយុ៣០ឆ្នាំ ជនជាតិនីហ្សេរីយា ។ ៣ ឈ្មោះ Madura Uganda អាយុ២៥ឆ្នាំ ជនជាតិនីហ្សេរីយ៉ា ។ ៤ ឈ្មោះ Okwor goduan China អាយុ៣៥ឆ្នាំ ជនជាតិនីហ្សេរីយ៉ា ។ ៥ ឈ្មោះ chibxiiskemecahukwuy អាយុ៣៥ឆ្នាំ ជនជាតិនីហ្សេរីយ៉ា ។
ពាក់ព័ន្ធករណីនេះសមត្ថកិច្ចបានអោយដឹងថា ក្រោយពីបានទទួលពាក្យបណ្ដឹងរបស់ជនរងគ្រោះ នគរបាលបានឃាត់ខ្លួនឈ្មោះ ស៊ុំ ពិសី នៅភូមិព្រែកឬស្សី ក្រុងតាខ្មៅពេលកំពងដកប្រាក់ពីវីងរបស់ជនរងគ្រោះយកមកសាកសួរ ។ បន្ទាប់ពីបានទទួលចម្លើយឈ្មោះស៊ុំ ពិសីហើយ នគរបាលបានសហការជាមួយនគរបាលខណ្ឌដង្កោចុះទៅឃាត់ខ្លួនឈ្មោះ China និង clancymeka ។
បន្ទាប់មកក៏នាំពួកគេទៅឆែកផ្ទះនៅខណ្ឌពោធ៍សែនជ័យរកវត្ថុតាងក៏បានឃាត់ខ្លួនបក្សពួកបុរសស្បែកខ្មៅ២នាក់ថែមទៀតគឺឈ្មោះ Uganda និង chukwoy មកកាន់ក្រសួងមហាផ្ទៃដើម្បីសួរចម្លើយកសាងសំណុំរឿងបញ្ជូនមកតុលាការ ក្នុងនោះក្រោយពីសាកសួរជនសង្ស័យរួចមកតំណាងអយ្យការបានសម្រេចចោទប្រកាន់ពួនជនសង្ស័យពីបទឆបោក ហើយសំណុំរឿងនេះត្រូវបានចាត់អោយលោកចៅក្រម សាន សុផាត ជាចៅក្រមសើបសួរ និងបានចេញដីកាសម្រេចឃុំខ្លួនជនត្រូវចោទដាក់ពន្ធនាគារជាបណ្ដោះអាសន្ននៅពន្ធនាគារព្រៃស ៕ ដោយ ៖ បញ្ញាស័ក្តិ
