ភ្នំពេញ ៖ នាពេលកន្លងជនសង្ស័យជាក្មួយជីទួតមួយធ្លាប់បានចាប់រំលោភជនរងគ្រោះជាមីងរបស់ខ្លួនម្តងរួចមកហើយ តែជនរងគ្រោះពុំបានមកប្តឹងសមត្ថកិច្ចទេ ព្រោះខ្លាចខ្មាសគេ។ ប៉ុន្តែជនសង្ស័យជាជនប្រើប្រាស់គ្រឿងញៀនផងដែរនោះ បានមកលបលួច ចាប់រំលោភមីងម្តងទៀត ប៉ុន្តែត្រូវនាងស្រែកឲ្យគេជួយ និងឈានទៅដល់ការចាប់ខ្លួនជាក់ស្តែងតែម្តង។
លោកវរសេនីយ៍ទោ ម៉ៅ សឿត អធិការរងខណ្ឌច្បារអំពៅបញ្ជាក់ថា ពាក់ព័ន្ធករណីរំលោភសេពសន្ថវៈ កាលពីថ្ងៃទី១៦ ខែធ្នូ ឆ្នាំ២០១៧ វេលាម៉ោង២និង៣០នាទី រំលងអាធ្រាត្រ នៅភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ ហើយតាមការស្រាវជ្រាវ រហូតដល់ថ្ងៃទី១៨ ខែធ្នូ ឆ្នាំ២០១៧ ម៉ោង១១និង៣០នាទី សមត្ថកិច្ចឃាត់ខ្លួនជនសង្ស័យនៅភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ បញ្ជូនមកទីស្នាក់ការប៉ុស្តិ៍ធ្វើការសាកសួរ។ លោក បានឲ្យដឹងថា ជនរងគ្រោះឈ្មោះ ហ ស យ អាយុ៤៨ឆ្នាំ ជនជាតិខ្មែរឥស្លាម មុខរបរលក់ដូរ ស្នាក់នៅផ្ទះកើតហេតុ។ ចំណែកជនសង្ស័យឈ្មោះស្លេះ សារី ភេទប្រុស អាយុ៣៨ឆ្នាំ ជនជាតិខ្មែរឥស្លាម មុខរបរលក់ដូរ ស្នាក់នៅផ្ទះលេខ៥៧ភ៤ ភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ។
លោកអធិការរងបន្តថាមុនពេលកើតហេតុជនរងគ្រោះ ស្លៀករ៉ូបដេកនៅផ្ទះកើតហេតុខាងលើ ដោយប្តីមិននៅផ្ទះ ស្រាប់តែជនសង្ស័យត្រូវជាក្មួយជីទួតមួយជនរងគ្រោះ នៅផ្ទះទល់មុខគ្នា បានដើរចូលក្នុងផ្ទះជនរង គ្រោះ រួចចាប់អោបថើបជនរងគ្រោះ ហើយយកដៃរុកចូលប្រដាប់ភេទជនរងគ្រោះ ពេលនោះជនរងគ្រោះក៏ស្រែក ស្របពេលនោះប្តីជនរងគ្រោះមកទាន់ ជនសង្ស័យក៏រត់គេចខ្លួន។ លុះព្រឹកឡើង ជនរងគ្រោះ បានមករាយការប្រាប់សមត្ថកិច្ចប៉ុស្តិ៍ព្រែកប្រា។
កន្លងមកកាលពីថ្ងៃមិនចាំ ខែវិច្ឆិកា ឆ្នាំ ២០១៧ ម៉ោងប្រហែល២១និង៣០នាទី ជនសង្ស័យធ្លាប់ចាប់រំលោភជនរងគ្រោះម្តងរួចមកហើយ តែជនរងគ្រោះពុំបានមកប្តឹងសមត្ថកិច្ចទេ ព្រោះខ្លាចខ្មាសគេ។ ហើយជនសង្ស័យប្រើប្រាស់គ្រឿងញៀន៥ខែ។
បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌច្បារអំពៅដើម្បីចាត់ការតាមផ្លូវច្បាប់ ៕ ដោយ ៖ បញ្ញាស័ក្តិ
