ខេត្តស្វាយរៀង ៖ លោក ម៉ែន វិបុល អភិបាល នៃគណៈអភិបាលខេត្ត និងជាប្រធានគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តនៅព្រឹកថ្ងៃពុធ ៨រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៧ ខែកុម្ភៈ ឆ្នាំ២០១៩នេះ
បានមានប្រសាសន៍ថា ៖ អំពើរជួញដូរមនុស្សគឺជាការគំរាមកំហែងដោយផ្ទាល់ទៅលើ គ្រួសារ វប្បធម៌ ប្រពៃណី និងតម្លៃសង្គម។
លោកអភិបាលខេត្តបានមានប្រសាសន៍ដូច្នេះនៅក្នុងឱកាសដែលលោកបានអញ្ជើញជាអធិបតីនៅក្នុងកិច្ចប្រជុំបូកសរុបលទ្ធផលការងារប្រចាំឆ្នាំ២០១៨ និងលើកទិសដៅការងារឆ្នាំ២០១៩ របស់គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត ដែលកិច្ចប្រជុំនេះរៀបចំនៅសាលប្រជុំ អគារ ឃ សាលាខេត្ត ព្រមទាំងមានការអញ្ជើញចូលរួមផងដែរពីសំណាក់លោកស្រីជាអភិបាលរងខេត្តលោកប្រធានសាលាដំបូងខេត្ត លោកព្រះរាជអាជ្ញាខេត្ត តំណាងកងកម្លាំងទាំងបី លោក លោកស្រីប្រធានមន្ទីរ-អង្គភាព លោកអភិបាលក្រុង ស្រុក លោក លោកស្រី ប្រធាន អនុប្រធាន និងសមាជិក លេខាធិការដ្ឋានខេត្ត ក្រុមការងារប្រយុទ្ធប្រឆាំងអំពើជួញដូរមនុស្ស អធិការនគរបាល មេឃុំ ចៅសង្កាត់ នាយប៉ុស្ដិ៍នគរបាលរដ្ឋបាល កងកម្លាំង និងសមត្ថកិច្ចនៅតាមច្រកទ្វារព្រំដែន សរុបចំនួនប្រមាណជាង ២០០នាក់ ក្នុងគោលបំណងដើម្បីពិនិត្យ និងកែសម្រួលរបាយការណ៍ប្រចាំឆ្នាំ២០១៨ និងលើកទិសដៅការងារឆ្នាំ២០១៩ របស់គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត ដើម្បីជំរុញការចូលរួមឲ្យកាន់តែសកម្ម និងផុលផុស គាំទ្រការអនុវត្តគោលនយោបាយជាអាទិភាពរបស់រាជរដ្ឋាភិបាលកម្ពុជា ក្នុងការដឹកនាំប្រយុទ្ធប្រឆាំងការជួញដូរមនុស្សខេត្តស្វាយរៀង។
លោក ម៉ែន វិបុល បានលើកឡើងពីចំណុចសំខាន់ៗ ដែលធ្វើឲ្យការងារប្រយុទ្ធប្រឆាំងជួញដូរមនុស្សមានដំណើរការល្អ និងផ្តល់នូវមតិណែនាំបន្ថែម ទៅដល់សមត្ថកិច្ចពាក់ព័ន្ធទាំងអស់ត្រូវបន្តពិនិត្យមើលទៅលើយន្តការនៃរចនាសម្ព័ន្ធគ្រប់ថ្នាក់ ទៅលើប្រព័ន្ធនីតិវីធីនៃការអនុវត្តលិខិតបទដ្ឋានគតិយុត្ត និងគោលនយោបាយ យុទ្ធសាស្ត្រនានា ពាក់ព័ន្ធនឹងការប្រយុទ្ធប្រឆាំងការជួញដូរមនុស្ស ត្រូវមានផែនការសកម្មភាពស្របតាមបរិបទសង្គមនៅតាមមូលដ្ឋាន ត្រូវប្រើមធ្យោបាយសរុប កម្លាំងសរុប វិធានការសរុប ដើម្បីជំរុញផែនការសកម្មភាពអនុវត្តការងារនេះឲ្យមានប្រសិទ្ធភាព និងទទួលបានជោគជ័យ ។
អាស្រ័យដោយ អំពើជួញដូរនេះ បានបង្កនូវការគំរាមកំហែង ដោយផ្ទាល់ទៅលើវប្បធម៌ និងប្រពៃណី គ្រួសារ តម្លៃសង្គមកម្ពុជា ដូច្នេះឯកឧត្ដមអភិបាលខេត្តក៏បានផ្ដាំផ្ញើដល់អាជ្ញាធរពាក់ព័ន្ធទាំងអស់ ត្រូវបន្តពង្រឹងគោលនយោបាយភូមិឃុំមានសុវត្ថិភាពដែលបានអនុវត្តជាប្រចាំបន្ថែមទៀត ដើម្បីតាមដាននូវសកម្មភាពបទល្មើសជួញដូរមនុស្ស និងត្រូវដាក់ផែនការតាមដានគ្រប់ ក្រុង ស្រុក និងតាមច្រកទ្វាព្រំដែននានាជាប់ប្រទេសជិតខាង ក្នុងការទប់ស្កាត់ ការបង្ក្រាបការជួញដូរ មនុស្សឲ្យមានប្រសិទ្ធភាពខ្ពស់ ទន្ទឹមនេះ ក៏ត្រូវជួយផ្សព្វផ្សាយឲ្យប្រជាពលរដ្ឋបានជ្រួតជ្រាបអំពីកិច្ចខិតខំប្រឹងប្រែងរបស់រាជរដ្ឋាភិបាល ក្នុងការកៀរគរបង្កើតការងារធ្វើ និងលើកទឹកចិត្តពួកគាត់ឲ្យស្វែងរកការងារធ្វើនៅក្នុងស្រុក ហើយក្នុងករណីត្រូវស្វែងរកការងារនៅក្រៅស្រុក ត្រូវធ្វើតាមរយៈក្រុមហ៊ុនស្របច្បាប់ ឬភ្នាក់ងារនាំពលករចេញទៅក្រៅប្រទេសដែលមានអាជ្ញាបណ្ណត្រឹមត្រូវ ចៀសវាងការឆ្លងដែនដោយប្រថុយប្រថាយ តាមរយៈមេខ្យល់ ដែលជាប្រភព នៃការជួញដូរមនុស្ស ៕ ដោយ ៖ វ៉ៃកូ
