ព្រំដែនកម្ពុជា -ថៃ ៖ ករណីប្រជាការពារថៃឃាត់ម៉ូតូ១២គ្រឿង, ពលករខ្មែរ១៥នាក់ បង្កើតបទចោទ “លួចម៉ូទ័របូមទឹក” ត្រូវបានដោះស្រាយ គឺបញ្ជួនមនុស្ស និងម៉ូតូមកវិញ។ មន្ត្រីអាជ្ញាធរនិងកងកម្លាំងកម្ពុជាធានាទិញសងដើម្បីបានដោះលែងនេះ។កម្លាំងនគរបាលវរៈសេនាតូចការពារព្រំដែនគោលលេខ៩១១ ក្នុងភូមិសាស្ត្រស្រុកអូរជ្រៅឱ្យដឹងថា ៖ កាលពីម៉ោង៨និង៣០ នាទីព្រឹកថ្ងៃទី១៨ ខែធ្នូ ឆ្នាំ២០១៧ មានពលករខ្មែរចំនួន១៥នាក់ និងម៉ូតូ១២គ្រឿងត្រូវបានប្រជាការពារថៃចាប់ឃាត់ខ្លួននិងចាប់ម៉ូតូទុកខណៈដែលពលករខ្មែរ(ពលករតាមរដូវ) បានជិះម៉ូតូចូលទៅធ្វើការងារទៅព្រឹកវិលល្ងាច។ គឺចេញចូល តាមច្រករបៀងតំបន់៥ ស្ថិតក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ឈមនិងភូមិចាក់សាំង ឃុំគោកធ្យូង ស្រុកគោកធ្យូង ខេត្តស្រះកែវ ប្រទេសថៃ។
ពលករ និង មន្ត្រីនគរបាលនោះប្រាប់សារព័ត៍មានថា ៖ “ការចាប់ខ្លួនពលករខ្មែរនោះអត់ទំនងទេ។ ពួកគេបង្កើតបទចោទប្រកាន់ថា ពលករខ្មែរទាំងនោះបានលួចម៉ូទ័របូមទឹកជនជាតិថៃ១គ្រឿងកាលពីថ្ងៃទី១៥ ខែធ្នូ ឆ្នាំ២០១៧។ ប៉ុន្តែពលករបានប្រកែក ហើយខាងថៃក៏គ្មានភស្តុតាងសមរម្យ”។ ករណីនេះ មន្ត្រីនគរបាលការពារព្រដែននៃវរៈសេនាតូច៩១១ ប្រចាំប៉ុស្ថិ៍ព្រំដែនរិទ្ធីសែន និងយោធាការពារព្រំដែនលេខ៥០៣ សហការជាមួយនិងអាជ្ញាធរមូលដ្ឋាន បានចូលទៅដោះស្រាយបញ្ហានោះជាមួយភាគីថៃ។ ជាលទ្ធផល ភាគីថៃគេបានអនុញ្ញាតដោយដោះលែងពលករខ្មែរទាំង១៥នាក់ត្រឡប់មកផ្ទះវិញ។ ប៉ុន្តែគេឃាត់ម៉ូតូទុកចំនួន១២គ្រឿងសិន។
លុះនៅវេលាម៉ោង១២ និង៤០នាទីរសៀលថ្ងៃដដែល សមត្ថកិច្ចការពារព្រំដែនកម្ពុជា ក៏បានទៅចូលរួមដោះស្រាយលើកទី២ជាមួយភាគីថៃ ដើម្បីដោះយកម៉ូតូមកវិញថែមទៀត។ នៅពេលនោះភាគីថៃក៏បានប្រគល់ម៉ូតូឱ្យមកវិញ។ ពោលគឺពីសមត្ថកិច្ចកម្ពុជាបានធានជួយទិញម៉ូទ័របូមទឹកដែលចោទថាម បាត់នោះសងទៅភាគីថៃវិញ៕ ដោយ ៖ បន្ទាយ