(ភ្នំពេញ)៖ ក្រសួងការបរទេស បានចេញសេចក្តីថ្លែងការណ៍ជំវិញស្ថានភាពតានតឹង រវាង កងកម្លាំង ប៉ាគីស្ថាន និង ឥណ្ឌា នៅតំបន់ការស្មៀរ ដោយស្នើឱ្យប្រទេសឥណ្ឌា និងប្រទេស ប៉ាគីស្ថាន រក្សាការអត់ធ្មត់ខ្ពស់បំផុត ដើម្បីចៀសវាងការប៉ះទង្គិចគ្នាដោយអាវុធបន្តទៀត ដែលនឹងនាំឱ្យមានអរិភាព ក្នុងចំណោមប្រជាជននៃប្រទេសទាំងពីរ។
បើតាមសេចក្តីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២៨ ខែកុម្ភៈ ឆ្នាំ២០១៩នេះ បានឱ្យដឹងថា កម្ពុជាជឿជាក់ថា ប្រទេសប៉ាគីស្ថាន និងឥណ្ឌា អាចធ្វើការចរចាគ្នា ដើម្បីកាត់បន្ថយភាពតានតឹងនាពេលបច្ចុប្បន្ន និង ស្វែងរកដំណោះស្រាយទំនាស់តាមមធ្យោបាយសន្តិវិធី។
ក្រសួងការបរទេសកម្ពុជា សូមបញ្ជាក់ជាថី្មអំពីការថ្កោលទោសចំពោះការវាយប្រហារភេរវកម្ម កាលពីថ្ងៃទី១៤កុម្ភៈ ឆ្នាំ២០១៩ នៅតំបន់ Pulwama និងការបេ្តជ្ញាចូលរួមចំណែកក្នុងកិច្ចប្រឹងប្រែង ដើម្បីប្រយុទ្ធប្រឆាំង នឹងអំពើភេរវកម្មគ្រប់ទម្រង់ និងគ្រប់រូបភាពទាំងអស់។ ជាមួយព្រឹត្តិការណ៍នេះយោធាប៉ាគីស្ថានបានបាញ់ទម្លាក់យន្តហោះចម្បាំងរបស់ឥណ្ឌាចំនួន 2 គ្រឿងហើយនឹងចាប់ខ្លួនអ្នកបើកយន្តហោះម្នាក់ ផងដែរ ដែលយន្តហោះទាំងពីរនេះ ហោះរំលោភដែនអាកាសរបស់ប៉ាគីស្ថាន ៕ ដោយ:កូឡាប