ត្បូងឃ្មុំ: អធិការនគរបាលស្រុកមេមត់ បានប្រាប់ទៅកម្លាំងនគរបាលប៉ុស្តិ៍រដ្ឋបាលទាំង១៤ ថាកុំលាក់លៀមទុក្ខកង្វល់របស់ខ្លួន ឬទុក្ខកង្វល់របស់ប្រជាពលរដ្ឋ ព្រោះលោកទទួលបានព័ត៌មានយ៉ាងលឿនបំផុតរយៈបណ្តាយសង្គម Facebook ទាំងព័ត៌មានពិត និងក្លែងក្លាយ។
នៅរសៀលម៉ោង ១៤ ថ្ងៃទី ២៨ កុម្ភៈ ២០១៩ លោកវរសេនីយ៍ឯក ហុង គឹមហឿន អធិការនគរបាលស្រុកមេមត់ បានដឹកនាំប្រជុំបូកសរុបការងារជំនាញប្រចាំខែ កុម្ភៈ និងលើកទិសដៅអនុវត្តបន្តខែមីនា ជាមួយផែនជំនាញទាំង៧ និងប៉ុស្តិ៍ទាំង១៤ ដែលសមាសភាពចូលរួមលោកអធិការរងទទួលផែនការងារគ្រប់ជំនាញ លោកនាយ-នាយរងផ្នែក និងលោកនាយប៉ុស្តិ៍នគរបាលរដ្ឋបាលទាំង១៤ ។
ក្នុងឱកាសនោះផងដែរ លោកអធិការនគរបាលស្រុកមេមត់ បានបញ្ជាក់ប្រាប់ទៅកម្លាំងនគរបាលប៉ុស្តិ៍រដ្ឋបាលទាំង១៤ ថាកុំលាក់លៀមទុក្ខកង្វល់របស់ខ្លួន ឬទុក្ខកង្វល់របស់ប្រជាពលរដ្ឋ ព្រោះលោកទទួលបានព័ត៌មានយ៉ាងលឿនបំផុតរយៈបណ្តាយសង្គម Facebook ទាំងព័ត៌មានពិត និងមិនពិត ។ ទុក្ខកង្វល់ដែលចោទជាបញ្ហានៅក្នុងមូលដ្ឋានឃុំនីមួយៗ ដែលទទួលបាននោះគឺ បញ្ហាអត្តសញ្ញាណប័ណ្ណសញ្ជាតិខ្មែរ សៀវភៅស្នាក់នៅក២ សៀវភៅគ្រួសារក៤ ក្មេងទំនើង គ្រឿងញៀន ល្បែងស៊ីសង ….។ល។
លោកអធិការបន្ថែមទៀតថា ៖ មានព័ត៌មានមួយចំនួនទៀតដែលទទួលបាននោះជាព័ត៌មានមិនពិតប្រឌិត ដើរបោកប្រាស់ប្រជាពលរដ្ឋ បំពុលសង្គមបង្កឲ្យមានភាពចលាចល ដើម្បីកេងចំណេញនយោបាយបំពេញផលប្រយោជន៍ឲ្យខ្លួនឯង ។ ដូច្នេះហើយយើងមន្ត្រីនគរបាលជាតិ ពិសេសកម្លាំងនគរបាលប៉ុស្តិ៍រដ្ឋបាលដែលគៀកប្រជាពលរដ្ឋបំផុតនោះ ត្រូវក្តាប់ឲ្យបានរាល់សភាពការណ៍ព័ត៌មានទាំងឡាយណាបង្ហោះលើសង្គម Facebook នោះចង់វាយប្រហារមកលើអង្គភាពក្នុងន័យជាន់ពន្លិច ។ ចំណុចមួយទៀតមើលលើការបង្ហោះរបស់ពួកជនឆ្លៀតឱកាសក្នុងបំណងបោកបញ្ឆោតប្រជាពលរដ្ឋឲ្យធ្លាក់ក្នុងការខាតបង់ទ្រព្យសម្បត្តិ ។
ចុងបញ្ចប់លោកបានផ្តាំផ្ញើដល់កម្លាំងទាំងអស់ឲ្យបន្តធ្វើការផ្សព្វផ្សាយណែនាំបងប្អូនប្រជាពលរដ្ឋនៅមូលដ្ឋានភូមិ.ឃុំខ្លួនគ្រប់គ្រងចូលរួមសហការជាមួយនគរបាលយើងដោយអនុវត្តនូវគោលនយោបាយភូមិ.ឃុំមានសុវត្តិភាពទាំង ០៩ ចំណុច ដើម្បីឲ្យភូមិផងរបងរបស់ខ្លួនទទួលបាននូវសន្តិសុខសុវត្ថិភាពល្អប្រសើរ និងជូនពរឲ្យកងកម្លាំងយើងទាំងទទួលបានជោគជ័យគ្រប់ភារកិច្ចដែលថ្នាក់លើដាក់ជូន ៕ ដោយ:កូឡាប
