ប្រទេសប៉ាគីស្ថាននឹងធ្វើការដោះលែងអ្នកបើកយន្តហោះចំបាំងឥណ្ឌាម្នាក់ នៅថ្ងៃសុក្រនេះ ដែលវាគឺជាកាយវិការសន្តិភាព។ នេះបើតាមការបញ្ជាក់របស់នាយករដ្ឋមន្ត្រីប៉ាគីស្ថាន Imran Khan។
នៅថ្ងៃពុធកន្លងទៅនេះ ប៉ាគីស្ថានបានបាញ់ទម្លាក់យន្តហោះចំបាំងឥណ្ឌាចំនួន ២គ្រឿងដែលបានហោះចូលដែនអាកាសរបស់ខ្លួននៅតំបន់ Kashmir ខណៈដែលភាពតានតឹងកំពុងតែឡើងខ្លាំងនៅតំបន់ជម្លោះ Kashsmir ដែលមួយផ្នែកគ្រប់គ្រងដោយឥណ្ឌា និងមួយផ្នែកទៀតដោយប៉ាគីស្ថាន។
ការបាញ់ទម្លាក់យន្តហោះឥណ្ឌាកើតឡើងក្រោយពេល ឥណ្ឌាបានធ្វើការវាយប្រហារលើជំរុំរបស់ក្រុមសកម្មប្រយុទ្ធ ដែលមានមូលដ្ឋានក្នុងប្រទេសប៉ាគីស្ថាន ដើម្បីជាការសងសឹកទៅដល់ក្រុមនោះ ដែលវាយប្រហារលើកងកម្លាំងឥណ្ឌា បណ្តាលឲ្យកងកម្លាំងឥណ្ឌាយ៉ាងតិច ៤០នាក់បានស្លាប់។
ក្រុមសកម្មប្រយុទ្ធចេញមុខអះអាងថា វាគឺជាការវាយប្រហាររបស់ពួកគេ ប៉ុន្តែប៉ាគីស្ថានបដិសេធពីការជាប់ពាក់ព័ន្ធ។
នៅថ្ងៃព្រហស្បតិ៍ម្សិលមិញនេះ នាយករដ្ឋមន្ត្រីប៉ាគីស្ថានបានថ្លែងប្រាប់សមាជិកភាថា “ប៉ាគីស្ថាននឹងដោះលែងអ្នកបើកយន្តហោះឥណ្ឌានៅថ្ងៃស្អែក (ថ្ងៃសុក្រ)”។
លោកក៏បានស្នើឲ្យមានការបន្ថយកម្តៅផងដែរ និងបានលើកឡើងថា ប៉ាគីស្ថាន និងឥណ្ឌាត្រូវតែរស់នៅក្នុងសន្តិភាព។
ចំណែកភាគីឥណ្ឌាវិញ រដ្ឋមន្ត្រីការបរទេស Sushma Swaraj បាននិយាយថា “ឥណ្ឌាមិនដែលមានបំណងចង់ឃើញស្ថានភាពក្តៅនោះទេ”៕ សុភ័ក្ត្រ
ប្រភព៖ BBC
