មនុស្សយ៉ាងហោចណាស់ចំនួន ៣នាក់បានស្លាប់ និងជាង ១០០នាក់រងរបួស នៅពេលរថភ្លើងដឹកអ្នកដំណើរមួយគ្រឿងបានរត់ធ្លាក់ផ្លូវនៅក្នុងរដ្ឋវ៉ាស៊ីនតោន។ នេះបើតាមការចេញផ្សាយរបស់សារព៌តមាន CNN នៅព្រឹកថ្ងៃអង្គារនេះ។
រថភ្លើងឈ្មោះ Amtrak Cascades 501 បានកំពុងធ្វើដំណើរលើកដំបូងលើផ្លូវអាកាសថ្មី នៅពេលវាជួបហេតុការណ៏រត់ធ្លាក់ផ្លូវ បណ្តាលឲ្យទូរថភ្លើងចំនួន ១៣បានធ្លាក់ទៅលើផ្លូវរថយន្តនៅខាងក្រោមដែលកំពុងមមាញឹក។
អ្នកស្លាប់ទាំងអស់គឺជាអ្នកដំណើរក្នុងរថភ្លើង។ រថយន្តចំនួន ៧គ្រឿង និងឡានដឹកនទំនិញធនធំចំនួន ២គ្រឿង ត្រូវទូរថភ្លើងធ្លាក់ត្រូវនៅខាងក្រោម ប៉ុន្តែគេមិនបានដឹងច្បាស់ទេថា តើមាននរណាម្នាក់រងរបួសឬអត់នៅលើផ្លូវ។
រថភ្លើង Amtrak Cascades 501 បានចាក់ចេញពីតំបន់ Seattle និងកំពុងធ្វើដំណើរឆ្ពោះទៅកាន់តំបន់ Portland។ ហេតុការណ៏រត់ធ្លាក់ផ្លូវកើតឡើងនៅកន្លែងផ្លូវដែលកាលពីមុនគេប្រើសំរាប់ឲ្យរថភ្លើងដឹកទំនិញរត់លើ។
អ្នកនាំពាក្យរបស់រថភ្លើង បាននិយាយថា មានអ្នកដំណើរចំនួន ៧៧នាក់ ព្រមទាំងបុគ្គលិករថភ្លើងចំនួន ៧នាក់នៅលើរថភ្លើងមុនពេលវាជួបគ្រោះថ្នាក់៕ សុភ័ក្ត្រ
