ខេត្តព្រះសីហនុ៖ លោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក នៅថ្ងៃសៅរ៍ ទី២ ខែមីនា ឆ្នាំ២០១៩នេះ បានផ្ញើសារតាមបណ្តាញសង្គម ហ្វេសប៊ុក ផ្ទាល់ខ្លួនរបស់លោក ដោយបានរិះគន់ និងចោទ លោក យន្ត មីន អភិបាលខេត្តព្រះសីហនុ ថាព្រហើនថ្លើមធំពាសមេឃ ហ៊ានប្រមាថមើលងាយដល់ អនុសាសន៍ណែនាំ របស់សម្ដេចតេជោ ហ៊ុន សែន ហ៊ានចេញលិខិតអនុញ្ញាត ឲ្យបុគ្គលមួយចំនួន ចូលទៅឈូសឆាយធ្វេីរបងលេីដីទំនាស់ មានទីតាំងនៅភូមិគគី ដែលជាដីរបស់រដ្ឋ ហើយឋិតក្រោមសាលដីកាខុសច្បាប់នៅឡើយ ខណៈតុលាការបានចេញសេចក្ដីសម្រេចទាំងខុសបែបបទគតិយុត្តិ។
បន្ថែមលើនេះ លោក សាប៊ុង ប្រធានគណបក្សខ្មែរក្រោក ក៏បានចោទ លោក យន្ត មីន ថាកំពុងបំពានលើមតិណែនាំ របស់សម្ដេចតេជោ និងបំពានលើសេចក្ដីជូនដំណឹង របស់ក្រសួងកសិកម្ម រុក្ខាប្រមាញ់ និងនេសាទ លេខ ១០៨២ កសក ។
លោក សាប៊ុង បានបញ្ជាក់ថា លិខិតរបស់លោក យន្ត មីន បានធ្វេីមុនមួយថ្ងៃ បន្ទាប់ពីមានកិច្ចប្រជុំ របស់ឧត្តមក្រុមប្រឹក្សាពិគ្រោះ និងផ្ដល់យោបល់ជាមួយសម្ដេចតេជោ..!។ លោកថា កិច្ចប្រជុំនោះដែរ សម្ដេចតេជោ ហ៊ុន សែន បានបញ្ជាឲ្យ លោកឧបនាយករដ្ឋមន្ត្រី ជា សុផារ៉ា ត្រូវសេីររើឡេីងវិញ ចំពោះបញ្ហាដីនៅតំបន់ខាងលើនេះ..។ ហើយថា ជនដែលជាប់ពាក់ព័ន្ធផលប្រយោជន៍លេីការយកដីរដ្ឋ មកកាត់ចែកឲ្យឯកជនធ្វើកម្មសិទ្ធិ គឺមិនរួចខ្លួនទេ ព្រោះដីនេះជាដីរដ្ឋ ហេតុម្ដេចបានជាឲ្យឯកជន ទៅបោះរបងធ្វើកម្មសិទ្ធិទៅវិញ..?
ចំពោះលិខិតចុះហត្ថលេខា និងមានបោះត្រា ដោយលោក យន្ត មីន អភិបាលខេត្តព្រះសីហនុខាងលើនេះ លោក វឌ្ឍនាសាប៊ុង អះអាងថា នឹងធ្វេីរបាយការណ៍ដាក់ជូន សម្ដេចតេជោ ហ៊ុន សែន ដើម្បីស្នើឲ្យលោកជួយមានវិធានការ ទៅលើសកម្មភាព របស់អភិបាលខេត្តព្រហេីនរូបនេះ។
ចំណែកមន្ត្រីឃ្លាំមើលផែនការអភិវឌ្ឍន៍សង្គម ប្រចាំខេត្តព្រះសីហនុ មានអង្គការលីកាដូ និងសមាគមអាដហុកជាដើម ក៏បានស្នើដល់ លោក យន្ត មីន អភិបាលខេត្តព្រះសីហនុ ឲ្យពិចារណាឡើងវិញ ទៅលើការចេញលិខិត ចុះថ្ងៃទី២៧ ខែកុម្ភៈ ឆ្នាំ២០១៩ ដោយអនុញ្ញាតបើកផ្លូវ ឲ្យបុគ្គលមួយចំនួន អាចចូលទៅធ្វើសកម្មភាពឈូសឆាយកាយព្រំធ្វើរបង ភូមិគគី ឃុំបិតត្រាំង ស្រុកព្រៃនប់ ខេត្តព្រះសីហនុ ដែលបារម្ភខ្លាចកើតមានអំពើហិង្សាកើតឡើងដូចការចុះអនុវត្តសាលដីកា របស់តុលាការកំពូល កាលពីថ្ងៃទី២៤ ខែមករា ឆ្នាំ២០១៩ អញ្ចឹងដែរ។
ចំណុចនេះ អ្នកស្រី ជាប សុធារី អ្នកសម្របសម្រួលសមាគមអាដហុក ប្រចាំខេត្តព្រះសីហនុ សំណូមពរដល់លោកអភិបាលខេត្តព្រះសីហនុ និងថ្នាក់ដឹកនាំក្រសួងស្ថាប័នពាក់ព័ន្ធ ឲ្យពិចារណា ទៅលើការចេញលិខិត អនុញ្ញាតឲ្យបុគ្គលមួយចំនួន ចូលទៅឈូសឆាយធ្វើរបងព្រំដី ដែលអាចផ្ទុះអំពើហិង្សាកើតឡើង ដោយសារបញ្ហាដីធ្លីនៅតំបន់ខាងលើមានម្ចាស់កាន់កាប់ច្រើនគ្នាដើម..។
យ៉ាងនេះក្តី មិនទាន់មានការឆ្លើយតបបែបណាពី លោក យន្ត មីន អភិបាលខេត្តព្រះសីហនុ ចំពោះការចេញលិខិតអន្តរាគមន៍ របស់លោកបានទេ នៅថ្ងៃសៅរ៍ ទី២ ខែមីនា ឆ្នាំ២០១៩នេះ។
សូមអានលិខិត របស់លោក យន្ត មីន អភិបាលខេត្តព្រះសីហនុ ដូចខាងក្រោមនេះ..៕ ដោយ៖ ដែន សីមា
