ខេត្តស្វាយរៀង ៖ លោក ថោង សាមាន ទីប្រឹក្សាក្រសួងផែនការនិងជាប្រធានមន្ទីរផែនការខេត្តស្វាយរៀងនៅព្រឹកថ្ងៃទី ៣ ខែ មីនា ឆ្នាំ ២០១៩ នេះបានមានប្រសាសន៍ថា ៖ ការធ្វើជំរឿនទូទៅ ប្រជាជននៅក្នុងព្រះរាជាណាចក្រកម្ពុជាដោយអនុវត្តចាប់ពីថ្ងៃទី ៣ខែមីនា ដល់ថ្ងៃទី១៣ខែមីនាឆ្នាំ ២០១៩ ហើយការធ្វើជំរឿន គឺធ្វើក្នុងរយៈពេល១០ឆ្នាំម្តង ដោយឡែកនៅក្នុងខេត្តស្វាយរៀងមានប្រជាពលរដ្ឋចំនួនជាង១០ម៉ឺនគ្រួសារ ដែលត្រូវធ្វើជំរឿនសំរាប់ឆ្នាំ២០១៩នេះ ហើយលោកបានធ្វើការជំរុញដល់បងប្អូនប្រជាពលរដ្ឋទូទាំងខេត្តដើម្បីចុះឈ្មោះជំរឿនមិនអាច ខ្វះម្នាក់បាន។
លោកបានថ្លែងបែបនេះនៅពេលលោកបានដឹកនាំក្រុមការងារចុះផ្សព្វផ្សាយពន្យល់ណែនាំដល់បងប្អូនប្រជាពលរដ្ឋនឹងចុះស្រង់ស្ថិតិបងប្អូនប្រជាពលរដ្ឋនៅក្នុងក្រុងស្វាយរៀង ដោយមានក្រុមការងារចូលរួមយ៉ាងច្រើនកុះករផងដែរ ។
លោក ថោង សាមាន ក៏បានជំរុញដល់ឲ្យវិស័យឯកជនដូចជាសណ្ឋាគារផ្ទះសំណាក់កាស៊ីណូ ដែលមាននៅក្នុងរាជធានីខេត្តឲ្យចូលរួមសហការជាមួយមន្ត្រីជំរឿនភ្ញៀវស្នាក់ នៅក្នុងមូលដ្ឋានរបស់ខ្លួនចាប់ពីម៉ោងសូន្យថ្ងៃទី ៣ខែមីនាឆ្នាំ ២០១៩ អភិបាលក្រុង ស្រុក ខណ្ឌ ឃុំ ចៅសង្កាត់ ប្រធានការិយាល័យផែនការស្រុកខណ្ឌ ត្រូវទទួលខុសត្រូវការងារជំរឿនក្នុងតំបន់របស់ខ្លួន និងសហការជាមួយមន្ត្រីជំនាញរាជធានីខេត្តធ្វើការរាប់សម្ភាសន៍ប្រជាជនរស់នៅក្នុងដែនសមត្ថកិច្ចរបស់ខ្លួនអោយបានអស់មិនឲ្យរំលងចោលនរណាម្នាក់ឡើយ និងជាគោលដៅអភិវឌ្ឍប្រកបដោយចីរភាពនៃរបៀបវារៈឆ្នាំ ២០១៦-២០៣០ ។
លោកបានបញ្ជាក់ថា ៖ ទាក់ទិនករណីធ្វើជំរឿនខាងលើនេះគឺមិនទាក់ទងនឹងនយោបាយមិនបម្រើផលប្រយោជន៍គណបក្សនយោបាយណាមួយមិនធ្វើឲ្យប្រជាពលរដ្ឋខាតបង់ប្រាក់កាសទេតែជាការងារដើម្បីអនាគតដ៏សម្បូរសប្បាយភាពរីកចំរើនរបស់ប្រជាជនកម្ពុជាយើងទាំងអស់គ្នា។ ដើម្បីដំណើរការជំរឿនទូទៅ ប្រជាពលរដ្ឋ ក្នុងខេត្តស្វាយរៀងឆ្នាំ ២០១៩នេះប្រព្រឹត្តិទៅបានរលូននិងទទួលបានជោគជ័យសូមអស់លោកជាអភិបាលនៃគណៈអភិបាលក្រុងស្រុកដែលជាប្រធានគណៈកម្មការរៀបចំជំរឿនទូទៅប្រជាជនក្រុង.ស្រុកត្រូវយកចិត្តទុកដាក់ខិតខំបំពេញតួនាទីភារកិច្ចរបស់ខ្លួននៅក្នុងការងារជំរឿនឲ្យបានទទួលជោគជ័យពីព្រោះកាតព្វកិច្ចរបស់យើងទាំងអស់គ្នា៕ ដោយ ៖ វ៉ៃកូ