ឧត្តរមានជ័យ ៖ នៅវេលាម៉ោង ១២ និង ៣០នាទី ថ្ងៃទី៣ ខែមីនា ឆ្នាំ២០១៩ កម្លាំងមូលដ្ឋាន កងរាជអាវុធហត្ថស្រុកអន្លង់វែង បង្ក្រាបគ្រឿងញៀនជាង កន្លះគីឡូក្រាម ដោយចាប់ជនសង្ស័យម្នាក់។
ការបង្ក្រាបគ្រឿងញៀនជាង កន្លះគីឡូក្រាមនេះដឹកនាំដោយ លោក វរសេនីយ៍ទោ ងួន ទ្ធីរិទ្ធ មេបញ្ជាការមូលដ្ឋានកងរាជអាវុធហត្ថស្រុក បានចុះបង្ក្រាបករណី ជួញដូរ ឬប្រើប្រាស់ដោយខុសច្បាប់នូវសារធាតុញៀន នៅចំណុចផ្ទះជួល ស្ថិតនៅក្នុងភូមិអភិវឌ្ឍន៍ ស្រុកអន្លង់វែង ខេត្តឧត្តរមានជ័យ ដោយឃាត់ខ្លួនជនសង្ស័យចំនួន ១នាក់ ឈ្មោះ គឹម នៀង ភេទប្រុស អាយុ ២៥ឆ្នាំ មុខរបរធ្វើស្រែ បច្ចុប្បន្នរស់នៅ ភូមិដីក្រហម ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។ វត្ថុតាងដកហូតរួមមានម្សៅក្រាមពណ៌សថ្លា ចំនួន ៥ថង់ធំ និង ១ថង់តូច ស្មើ ៥០០,៦៧ ក្រាម, ទូរស័ព្ទដៃចំនួន ១គ្រឿង, ទូរក្បាលគ្រែ(ទុកគ្រឿងញៀន)ចំនួន ១គ្រឿង,ប្រាក់រៀលចំនួន ១០០.០០០រៀល, ជញ្ជីងសម្រាប់ថ្លឹង ចំនួន១គ្រឿង និងពូថៅដៃ ចំនួន១ ។
បច្ចុប្បន្នមន្ត្រីជំនាញកងរាជអាវុធហត្ថ កំពុងកសាងសំណុំរឿងតាមនីតិវិធី ៕ ដោយ ៖ កូឡាប
