ភ្នំពេញ ៖ នៅថ្ងៃទី ២ ខែមីនា ឆ្នាំ ២០១៩លោក វិល្លាម កាង បានបង្ហាញឯកសារទាក់ទង នឹងបញ្ហាដីធ្លី ស្ថិតនៅភូមិគគីរឃុំបិតត្រាងស្រុកព្រៃនប់ ខេត្តព្រះសីហនុ ដោយបានលើកឡើងថា លោក យន្ត មីន អភិបាលខេត្តព្រះសីហនុ មើលងាយសម្ដេចតេជោ ហ៊ុន សែន។
រហូតមកដល់ថ្ងៃទី ៣ ខែមីនា នេះ លោក វិល្លាម នៅតែបន្តបង្ហាញភស្តុតាង ជាបន្តបន្ទាប់ទៀត និងបានលើកឡើងបន្តទៀតថា៖
លោកអភិបាលខេត្តព្រះសីហនុ ថ្លើមធំពាសមេឃ មើលងាយអនុសាសន៍ណែនាំរបស់សម្ដេចតេជោ ហ៊ានចេញលិខិតអនុញ្ញាត ឲ្យឈូសឆាយធ្វើរបងលើដីទំនាស់ភូមិគគី ដែលជាដីរបស់រដ្ឋ ហើយស្ថិតក្រោមសាលដីកាខុសច្បាប់នៅឡើយ ខណៈដែលតុលាការ បានចេញសេចក្ដីសម្រេចទាំងខុសបែបបទគតិយុត្តិ លោកយន្ត មីន កំពុងបំពានលើមតិណែនាំរបស់សម្ដេចតេជោ និងបំពានលើសេចក្ដីជូនដំណឹងរបស់ក្រសួងកសិកម្មលេខ ១០៨២ កសក ។
លោកបន្តថា លិខិតរបស់លោក យន្តមីន ធ្វើមុនមួយថ្ងៃការប្រជុំរបស់ឧត្តមក្រុមប្រឹក្សាពិគ្រោះ និងផ្ដល់យោបល់ជាមួយសម្ដេចតេជោ ! ដែលសម្ដេច លោកបានបញ្ជាឲ្យឧបនាយករដ្ឋមន្ត្រី ជា សុផារ៉ា សើរើឡើងវិញហើយចំពោះបញ្ហាដីនេះ ។
ហើយជនពាក់ព័ន្ធផលប្រយោជន៍លើការ យកដីរដ្ឋមកកាត់ក្ដីចែកឯកជន គឺមិនរួចខ្លួនទេ ដីនេះជាដីរដ្ឋម្ដេចឲ្យឯកជនទៅបោះរបងវិញ ?
យោងលិខិតនេះខ្ញុំនិងធ្វើ របាយការណ៍ដាក់ជូនសម្ដេចភ្លាមឲ្យលោកមានវិធានការចំពោះអភិបាលខេត្តព្រហើនរូបនេះ។
ពាក់ព័ន្ធនឹងករណីនេះ រដ្ឋបាលខេត្តព្រះសីហនុ បានចេញលិខិតបំភ្លឺមួយ ដោយបានលើកឡើងថា រដ្ឋបាលខេត្តមិនមានសិទ្ធិទៅលូកលាន់កិច្ចការផ្ទៃក្នុងឬសេចក្តី សម្រេចរបស់តុលាការឡើយដោយលោកយន្ត មីន អភិបាលខត្តបញ្ជាក់ថា រដ្ឋបាលខេត្តមានសិទ្ធិ ត្រឹមតែអនុវត្តដីការបស់តុលាការតែប៉ុណ្ណោះ។ រដ្ឋបាលខេត្តព្រះសីហនុ បានបញ្ជាក់ថា ចំពោះមតិដែលបានលើកឡើងថា សាលដីការដែលបានយកទៅអនុវត្តន៍នោះ ជាសាលដីកាខុសច្បាប់ និងបានបញ្ជាក់ថា តុលាការបានចេញសេចក្តីសម្រេច ទាំងខុសបែបបទគតិយុត្តិ។ ចំពោះចំណុចនេះ រដ្ឋបាលខេត្តមិនមានសមត្ថកិច្ចគ្រប់គ្រាន់ក្នុងការបកស្រាយ ឬវាយតម្លៃលើសាលដីការបស់ស្ថាប័នតុលាការនោះទេ គឺមានតួនាទីអនុវត្តន៍ការងារតាមផ្លូវច្បាប់ និងការស្នើសុំរបស់ស្ថាប័នតុលាការតែប៉ុណ្ណោះ។
រដ្ឋបាលខេត្តនៅតែរក្សាជំហរយ៉ាងមុតមាំដើម្បីការពារទ្រព្យសម្បត្តិស្របច្បាប់របស់ឯកជន ទ្រព្យសម្បត្តិរដ្ឋពង្រឹងការអនុវត្តច្បាប់ឲ្យកាន់តែមានប្រសិទ្ធភាព។
ជាមួយនឹងការបំភ្លឺរបស់រដ្ឋបាលខេត្តនោះ លោកវីល្លាមក៏បានចេញសារមួយបន្ថែមទៀតថា ដោយវាយបកទៅសាលាខត្តវិញ ។
លោកថា បើខុសត្រូវទទួលខុស កុំខ្វះក្រមសីលធម៌ ចំណុចដែលសម្ដៅថាលោកយន្ត មីន ព្រហើននោះ គឺការចេញលិខិតបំពានលើលិខិតថ្នាក់ជាតិ របស់ក្រសួងកសិកម្មលេខ១០៨២ ដែលយោងតាមមតិណែនាំដ៏ខ្ពង់ខ្ពស់ របស់សម្ដេចតេជោ ចុះថ្ងៃទី៣១ មករា ២០១៩ ចំណុចនេះហើយជាភស្តុតាងបញ្ជាក់ថា លោក យន្ត មីន ព្រហើននោះ ។
ខណៈដែលលិខិតរបស់លោកយន្តមីន ចេញនៅថ្ងៃទី ២៧ កុម្ភៈ ឆ្នាំ ២០១៩ មានលក្ខណៈនិងអត្ថន័យផ្ទុយទាំងស្រុង និងលិខិតរបស់ថ្នាក់ជាតិ ។
ក្នុងនាមជាមន្ត្រីថ្នាក់ក្រោមជាតិ សុំកុំមានអត្តចរឹតខ្វះក្រមសីលធម៌រ មិនព្រមទទួលកំហុស បែរជាចេញលិខិតជូនដំណឹង វាយបហារមកមន្ត្រីថ្នាក់ជាតិបន្តទៅទៀត។
លោកបានបន្ថែថា សូមផ្ដាំទៅអស់លោកមួយចំនួន ! នៅពេលអស់លោករបូតដំណែង អស់លោកពិបាកចិត្ត ដេកមិនលក់អស់លោកមានអារម្មណ៍យ៉ាងម៉េច ! ចុះប្រជាពលរដ្ឋដែលត្រូវបានអស់លោកធ្វើបាបគាបសង្កត់ ពួកគាត់ក៏ដេកមិនលក់កើតទុក្ខ អ្នកខ្លះគ្មានទាំងផ្ទះដេកផង ដោយសារចិត្តតិរច្ឆានរបស់អស់លោកលួចដណ្ដើមដីរបស់ពួកគាត់តាមគ្រប់រូបភាព តើគ្នាមានអារម្មណ៍បែបណា ? ពេលនេះលោកទទួលបានហើយចំពោះអារម្មណ៍ដែលលោកធ្លាប់បង្កើតលើគេ ។ តែកុំភ្លេចថា អស់លោកនៅសល់អារម្មណ៍មហាភ័យមួយទៀត គឺមិនត្រឹមរបូតដំណែង វាអាចរបូតទាំងអនាគត ដោយប្រឈមនិងផ្លូវច្បាប់ទៀតផង ។
អូហ៍ភ្លេចកុំអាលភ័យ នៅមានអ្នកមួយចំនួនទៀតត្រូវទៅតាមបន្ត ។ អត់រួចខ្លួនទេ។
សូមបញ្ជាក់ថា លោកវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ កាលពីថ្ងៃទី៣១ខែមករា ឆ្នាំ២០១៩ បានចេញលិខិតមួយច្បាប់ ជម្រាបជូនលោកអភិបាលខេត្តព្រះសីហនុ ក្នុងករណីនិរាករណ៍លើលិខិតកាត់ឆ្វៀលផ្ទៃដី ចេញពីគម្របព្រៃឈើឆ្នាំ២០០២ របស់ក្រសួងកសិកម្មរុក្ខាប្រមាញ់ និងនេសាទ ដែលបានផ្តល់ជូនរដ្ឋបាលខេត្ត ដើម្បីអនុវត្តន៍នីតិវិធីបន្ត។ កន្លងមក ក្រសួងកសិកម្ម បានឯកភាពតាមសំណើរបស់លោកអភិបាលខេត្ត និងជាប្រធានគណៈកម្មាធិការគ្រប់គ្រងដីរដ្ឋថ្នាក់ខេត្ត លើការកាត់ឆ្វៀលផ្ទៃដីចេញពីគម្របព្រៃឈើឆ្នាំ២០០២ ចំនួន១៩ករណី ដើម្បីអនុវត្តន៍នីតិវិធីបន្ត។ ទន្ទឹមនឹងនេះ អនុវត្តតាមការណែនាំដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី បានសម្រេចឲ្យក្រសួងកសិកម្ម ស្នើសុំការសម្រេចពីរាជរដ្ឋាភិបាល លើការកាត់ឆ្វៀលផ្ទៃដីចេញពីគម្របព្រៃឈើឆ្នាំ២០០២ ជាមុនសិន។ ចំពោះមុខ ដើម្បីបញ្ចៀសបាននូវបញ្ហាភាពមិនប្រក្រតីនានា ដែលអាចកើតមានឡើងផ្ទុយនឹងបទដ្ឋានគតិយុត្តិក្រសួងសម្រេចនិរាករណ៍លើលិខិតកាត់ឆ្វៀលដីចេញពីគម្របព្រៃឈើឆ្នាំ២០០២ ទាំង១៩ករណី ដែលក្រសួងបានចេញរួច។
សូមបញ្ជាក់ថា រដ្ឋបាលខេត្តព្រះសីហនុ កាលពីថ្ងៃទី២៧ កុម្ភៈ ឆ្នាំ២០១៩ បានចេញលិខិតមួយច្បាប់ជម្រាបមក លោក ថាន ថាវរៈ មេធាវី តំណាងដោយអាណត្តិឲ្យឈ្មោះ គង់ វណ្ណា សៀន សុខ ទឹម យ៉ាន ស៊ឹង ស៊ាន អែម អ៊ិន ច្រឹង វុត្ថា និងឈ្មោះវិន ស៊ែ (ហៅអ៊ុំ សែ) ករណីសំណើសុំឈូសឆាយ កាយព្រំ ធ្វើរបងលើផ្ទៃដីទំហំ ៤៧៧.៥១៣ម៉ែត្រការ៉េ និងផ្ទៃដីទំហំ ១៤៩.១០៣ម៉ែត្រការ៉េ មានចំណុចនិយាមកាដូចក្នុងកម្មវត្ថុ ស្ថិតនៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ ដោយរដ្ឋបាលខេត្តព្រះសីហនុ ឯកភាពជាគោលការណ៍ ឲ្យធ្វើរបង។ ទន្ទឹមនឹងនោះ លោកត្រូវគោរព និងអនុវត្តតាមការណែនាំដូចជា ត្រូវធានាថា ការធ្វើរបងលើទីតាំងដីខាងលើ គឺអនុវត្តតាមចំណុចនិយាមកានៃការអនុវត្តសាលដីការស្ថាពរលេខ ៣៨៤ ឈ ចុះថ្ងៃទី២១ ខែវិច្ឆិកា ឆ្នាំ២០១៧ របស់តុលាការកំពូលនិងមិនបង្កផលប៉ះពាល់ដល់ដីអ្នកជាប់ព្រំ។ លោកយន្ត មីន បានបន្ថែមថា ក្នុងករណីមានការជំទាស់តវ៉ា ពីភាគីជាប់ព្រំ ដែលមានឯកសារត្រឹមត្រូវ តាមផ្លូវច្បាប់ ត្រូវផ្អាកការកសាងជាបណ្តោះអាសន្ន រង់ចាំការដោះស្រាយតាមនីតិវិធីបានចប់សព្វ គ្រប់៕ ដោយ ៖ បញ្ញាស័ក្តិ
