មនុស្សយ៉ាងតិចណាស់ ១៤នាក់ រួមមានកុមារ បានស្លាប់បាត់បង់ជីវិត ក្រោយពេលខ្យល់គួចកំណាច (Tornado) បានវាយប្រហារតំបន់ Lee County ស្ថិតក្នុងរដ្ឋ Alabama សហរដ្ឋអាមេរិច។
មន្ត្រីអាមេរិចប្រចាំតំបននោះ បានថ្លែងប្រាប់ពត៌មានប្រចាំតំបន់ថា ពួកគេកំពុងបន្តស្វែងរកមនុស្សនៅក្រោមគំនរបាក់បែក ហើយមានជាច្រើននាក់ត្រូវបានដឹកជញ្ជូនទៅកាន់មន្ទីរពេទ្យ ដោយសាររងរបួសធ្ងន់។
ចំណែកអភិបាលរដ្ឋ Alabama ឈ្មោះ Kay Ivey បានធ្វើការព្រមានថា អាចនឹងមានខ្យល់គួចកើតឡើងច្រើនទៀត។
ស្ថាប័នផ្នែកអាកាសធាតុជាតិបញ្ជាក់ថា ខ្យល់គួចលើកដំបូងនោះ មានល្បឿនចំនួន ២៦៦គីឡូម៉ែត្រក្នុងមួយម៉ោង។
ខ្យល់គួចកំណាច បានបំផ្លិចបំផ្លាញផ្ទះជាច្រើន និងធ្វើឲ្យដាច់បណ្តាញផ្គត់ផ្គងអគ្គិសនី ហើយមនុស្សជាង ១០.០០០នាក់កំពុងគ្មានអគ្គិសនីប្រើប្រាស់។
ស្ថាប័នផ្នែកអាកាសធាតុជាតិ និយាយថាខ្លួននឹងបញ្ជូនក្រុមស្ទង់មតិចំនួន ២ក្រុម ដើម្បីធ្វើការវាយតម្លៃពីការខូចខាត ដោយខ្យល់គួចនោះ នៅថ្ងៃច័ន្ទនេះ៕ សុភ័ក្ត្រ
ប្រភព៖ BBC