ភ្នំពេញ ៖ ប្រជាពលរដ្ឋរស់នៅក្នុងសហគមន៍ស្ទឹងមានជ័យចំនួន១៥៣គ្រួសារ ដែលជាជំហានទី១ បានចាប់ផ្តើមរុះរើផ្ទះសំបែងចេញពីមាត់ប្រឡាយជាបណ្តើរៗហើយ ដើម្បីឲ្យក្រុមការងារបច្ចេកទេសដាក់គ្រឿងចក្រចូល បើកការដ្ឋានស្តារបុកស៊ីផាយ និងស្ថាបនាផ្លូវអមសងខាងប្រឡាយ។
លោកមាន ចាន់យ៉ាដា អភិបាលរងរាជធានីភ្នំពេញ ដែលចុះបំពេញលើការងារនេះ បានថ្លែងនូវការកោតសរសើដល់បងប្អូនសហគមន៍ស្ទឹងមានជ័យទាំង១៥៣គ្រួសារ ដែលបានចូលរួមសហការបានយ៉ាងល្អជាមួយរដ្ឋបាលរាជធានី ក្នុងការរុះរើផ្ទះរបស់ខ្លួនមកនៅកន្លែងបណ្តោះអាសន្ន ដើម្បីឲ្យគ្រឿងចក្រចាប់ផ្តើមការងារបច្ចេកទេសក្នុងរយៈពេល១ថ្ងៃទៀត។ លោកបញ្ជាក់ថា រាល់ការអភិវឌ្ឍចាំបាច់ត្រូវមានការចូលរួមពីគ្រប់ភាគី។
គួរបញ្ជាក់ថា ជាគម្រោងរបស់រដ្ឋបាលរាជធានីភ្នំពេញ នៅពេលដែលការស្ថាបនាប្រឡាយនិងផ្លូវអមសងខាងប្រឡាយនេះ រួចរាល់ រដ្ឋបាលរាជធានីភ្នំពេញ នឹងរៀបចំតបណ្តាញទឹកស្អាត ភ្លើងអគ្គីសនីចូលផ្ទះប្រជាពលរដ្ឋ រួមនឹងការដាក់បង្កោលភ្លើងសាធារណៈនៅលើផ្លូវនេះថែមទៀត ដើម្បីអោយតំបន់នេះក្លាយជាទីក្រុងស្ទឹងមានជ័យ ។
មន្ត្រីរដ្ឋបាលរាជធានីភ្នំពេញបានអោយដឹងថា ប្រឡាយស្ទឹងមានជ័យដែលរដ្ឋបាលរាជធានីភ្នំពេញគ្រោងនឹងធ្វើការអភិវឌ្ឍនេះមានប្រវែង១៣៥០ម៉ែត្រ ដោយឆ្លងកាត់ខណ្ឌចំនួន២ នោះគឺខណ្ឌមានជ័យនិងខណ្ឌសែន សុខ ដែលមានប្រជាពលរដ្ឋរស់នៅនិងរងផលប៉ះពាល់ប្រឡាយនេះចំនួន៥៦២គ្រួសារ ហើយប្រជាពលរដ្ឋទាំងអស់នេះនឹងទទួលបានដីទំហំ៤គុណនិង៦ម៉ែត្រជាកម្មសិទ្ធិស្របច្បាប់នៅហ្នឹងកន្លែងតែម្តង។
ប្រឡាយស្ទឹងមានជ័យនឹងត្រូវសាងសង់ឡើង ដោយបុកស៊ីផាយដូចនៅប្រឡាយបាក់ទូកដែរ ដោយត្រូវធ្វើផ្លូវ៦ម៉ែត្រជាប្រភេទផ្លូវបេតុង រៀបចំតបណ្តាញទឹក ភ្លើងអគ្គីសនីចូលផ្ទះប្រជាពលរដ្ឋ ដាក់បង្កោលភ្លើងសាធារណៈនៅលើផ្លូវនេះថែមទៀត ។ ប្រឡាយស្ទឹងមានជ័យនេះបានដើរតួយ៉ាងសំខាន់ ក្នុងការនាំទឹកទំលាក់ចូលទៅបឹងទំពុន។ ជាគម្រោងតួប្រឡាយស្ទឹងមានជ័យមានទំហំ៨ម៉ែត្រ ចិញ្វើម២ ម៉ែត្រ សាងសង់ផ្លូវបេតុងទទឹង៦ម៉ែត្រ ផ្លូវមុខផ្ទះ៥ម៉ែត្រ ដីនៅសល់មុខផ្ទះ១ម៉ែត្រកន្លះនិងក្រោយផ្ទះកន្លះម៉ែត្រ៕ ដោយ ៖ កូឡាប
