មេដឹកនាំបក្សប្រឆាំងវេណេហ្ស៊ុយអេឡា ដែលបានប្រកាសខ្លួនជាប្រធានាធិបតី Juan Guaidó បានត្រឡប់ចូលក្នុងរដ្ឋធានី Caracas វិញហើយ និងមានការទទួលពីអ្នកគាំទ្ររបស់លោករាប់ពាន់នាក់។
មេដឹកនាំរូបនេះ ប្រឈមនឹងការចាប់ខ្លួន ក្រោយពេលមិនគោរពតាមបំរាមរបស់តុលាការកំពូល ដែលហាមប្រាមគាត់មិនឲ្យចាកចេញពីប្រទេស និងស្វែងរកការជួយពីអន្តជាតិ។
ពេលត្រឡប់មកដល់ លោកបានថ្លែងប្រាប់អ្នកគាំទ្រថា “ពួកគេគំរាមយើង ហើយនេះពួកយើងនៅទីនេះ ដើម្បីប្រទេសវេណេហ្ស៊ុយអេឡា”។
លោកក៏បានស្នើឲ្យប្រធានាធិបតី Nicolás Maduro ចុះចេញពីតំណែងផងដែរ។
លោក Juan Guaidó ត្រូវបានទទួលនៅព្រលានយន្តហោះអន្តរជាតិ Simón Bolivar ដោយអ្នកការទូតរបស់អាមេរិច និងប្រទេសនៅសហភាពអ៊ឺរ៉ុប ព្រមទាំងអ្នកគាំទ្ររាប់ពាន់នាក់ ដែលពួកគេស្រែកឈ្មោះលោក Guaidó និងនិយាយថា ពួកយើងអាចធ្វើបាន។
ក្រោយពេលលោកថ្លែងថា លោកទទួលរងការគំរាមចាប់ដាក់គុក និងសម្លាប់មុនពេលការឡប់មកដល់ លោកក៏បានបញ្ជាក់ផងដែរថា លោកត្រូវបានគេទទួលយ៉ាងល្អនៅព្រលានយន្តហោះ។ លោកបញ្ជាក់ទៀតថា សូម្បីមន្ត្រីអន្តោប្រវេសន៍ក៏បានធ្វើការស្វាគមន៍គាត់ផងដែរ ដោយពួកគេនិយាយថា “សូមស្វាគមន៍លោកប្រធានាធិបតី”។
“នេះគឺជាភស្ថុតាងបញ្ជាក់ ក្រោយពេលមានការគំរាមកំហែងថាគ្មាននរណាម្នាក់ធ្វើតាមបញ្ជានោះទេ។ មនុស្សជាច្រើនមិនធ្វើតាមបញ្ជានោះទេ។ មេបញ្ជាការក្នុងកងកម្លាំងសន្តិសុខរដ្ឋាភិបាលកំពុងបែកបាក់ហើយ”។
លោក Juan Guaidó ក៏បានស្នើឲ្យមានការធ្វើការតវ៉ាទូទាំងប្រទេសងផងដែរនៅថ្ងៃសៅរិ៍នេះ។
សូមបញ្ជាក់ថា លោក Juan Guaidó ដែលជាមេដឹកនាំបក្សប្រឆាំង និងប្រធានរដ្ឋសភា បានប្រកាសខ្លួនឯងជាប្រធានាធិបតីស្តីទី ក្រោយពេលស្ថាប័ននិតិបញ្ញាតបានប្រកាសថា ការបោះឆ្នោតរបស់លោក Nicolás Maduro កាលពីខែឧសភា ឆ្នាំ ២០១៨មិនស្របច្បាប់។
លោក Juan Guaidó ទទួលបានការគាំទ្រពីមេដឹកនាំច្រើនជាង ៥០ប្រទេស ខណៈលោក Nicolás Maduro គាំទ្រដោយប្រទេសកុម្មនិស្តចិន រុស្សី និងគុយបាជាដើម៕ សុភ័ក្ត្រ
ប្រភព៖ BBC