ភ្នំពេញ ៖ លោក ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា បានជួបពិភាក្សាការងារ ជាមួយ លោក Manfred Grund សមាជិកសភាអាល្លឺម៉ង់ នៅវិមានរដ្ឋសភា នៅរសៀលថ្ងៃទី៤ ខែមីនា ឆ្នាំ២០១៩។
លោក Manfred Grund បានជម្រាប លោក ឈាង វុន ថាដំណើរទស្សនកិច្ចនៅពេលនេះរបស់ឯកឧត្តម គឺដើម្បីសិក្សាស្វែងយល់ និងថ្លឹងថ្លែង បញ្ហា EBA ដើម្បីឲ្យមានការទទួលបានព័ត៌មានស្មើគ្នាពីគ្រប់ភាគីពាក់ព័ន្ធ។ ដំណើរទស្សនកិច្ចនេះ ក៏ដើម្បីពង្រឹងកិច្ចសហប្រតិបត្តិការរវាងសភា អាល្លឺម៉ង់ និងសភាកម្ពុជាឲ្យកាន់តែល្អប្រសើរឡើងថែមទៀតផងដែរ ។
លោក ឈាង វុន បានជម្រាបអំពីស្ថានការណ៍នយោបាយនៅកម្ពុជា ពិសេសសុខសន្តិភាព និងការអភិវឌ្ឍដល់ ឯកឧត្តម Manfred Grund។ ឯកឧត្តមលើកឡើថា កម្ពុជាបានអនុវត្តគោលនយោបាយដឹកនាំប្រទេសតាមបែបលទ្ធិប្រជាធិបតេយ្យសេរីពហុបក្ស។ កម្ពុជាបានរៀបចំការបោះឆ្នោត រៀងរាល់ប្រាំឆ្នាំម្តង ដោយមានគណបក្សជាច្រើនចូលរួមប្រកួតប្រជែងដោយសេរី និងយុត្តិធម៌។
លោក ប្រធានគណៈកម្មការបានលើកឡើងបន្តថា កម្ពុជាបានឆ្លងកាត់ភ្លើងសង្គ្រាមអស់រយៈពេល៤ទសវត្សរ៍។ សង្គ្រាមបានធ្វើអោយកម្ពុជាធ្លាក់ ចូលក្នុងភាពក្រីក្រ តែក្រោយពីមានកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ កម្ពុជាបានប្រែមុខមាត់ថ្មី មានការអភិវឌ្ឍរីកចម្រើន ជាពិសេសនៅ ក្រោមគោលនយោបាយឈ្នះៗរបស់ សម្តេចអគ្គមហាសេនាបតីតេជោ ហ៊ុន សែន កម្ពុជាទទួលបានទាំងសន្តិភាព និងការអភិវឌ្ឍ។
លោក ឈាង វុន បានលើកឡើងថា សហគមអឺរ៉ុបមិនគួរយកបញ្ហាEBA ដែលជាបញ្ហាពាណិជ្ជកម្មមកធ្វើជារឿងនយោបាយនៅកម្ពុជានោះទេ។ ឯកឧត្តមបានស្នើដល់សភាអាល្លឺម៉ង់បន្តជួយកម្ពុជាទៅលើគ្រប់វិស័យ និងការបណ្តុះបណ្តាលយុវជនជំនាន់ថ្មី ។
លោក Manfred Grund បានឯកភាពសំណើរបស់ ឯកឧត្តម ឈាង វុន និងបានអះអាងថា នឹងខិតខំពង្រឹងកិច្ចសហប្រតិបត្តិការរវាងសភា នៃប្រទេសទាំងពីរឲ្យកាន់តែប្រសើរឡើង។ ចំពោះបញ្ហា EBA ឯកឧត្តមបានសន្យាថា នឹងផ្តល់ព័ត៌មានពិតដល់ភាគីពាក់ព័ន្ធ៕ ដោយ ៖ កូឡាប