ខេត្តស្វាយរៀង ៖ លោក តូច ប៉ូលីវ៉ា អភិបាលរងខេត្តស្វាយរៀងតំណាងលោកអភិបាលខេត្ត នៅព្រឹកថ្ងៃអង្គារ១៤រោច ខែមាឃ ឆ្នាំចសំរឹទ្ធិស័កព.ស.២៥៦២ ត្រូវនឹងថ្ងៃទី០៥ ខែមីនា ឆ្នាំ២០១៩ បានអំពាវនាវដល់បងប្អូនប្រជាពលរដ្ឋទាំងអស់ ត្រូវចូលរួមអនាម័យសំអាតបរិស្ថាន ដើម្បីឲ្យមានភាពស្រស់បំព្រងអោយដូចពាក្យស្លោកគេថា (ទីក្រុងស្អាត រមណីយដ្ឋានស្អាត សេវាល្អបដិសណ្ឋារកិច្ចល្អ) ដើម្បីអោយខេត្តស្វាយរៀងជាខេត្តមួយដែលមានភាពស្រស់បំព្រងព័របៃតង ដើម្បីប្រកួតប្រជែងយកពានរង្វាន់ទីក្រុងស្អាតប្រចាំឆ្នាំ។
លោកអភិបាលរងខេត្តបានមានប្រសាសន៍ដូច្នេះក្នុងឱកាសដែលលោកបានអញ្ជើញជាអធិបតីនៅក្នុងកម្មវិធីបញ្ជ្រាបការយល់ដឹង និងការសម្អាតទីក្រុងដើម្បីចូលរួមអបអរសាទរទិវាជាតិ ទីក្រុងស្អាតលើកទី៧ ឆ្នាំ២០១៩ ក្រោមប្រធានបទទីក្រុងស្អាត ទីក្រុងផ្ដល់ភាពកក់ក្ដៅ។
ពិធីនេះក៏មានការអញ្ជើញចូលរួមផងដែរពីសំណាក់់លោកណុប ចំរើន អភិបាលក្រុងស្វាយរៀង មន្ត្រីរាជការសាលាក្រុង មន្ទីរទេសចរណ៍ខេត្ត មន្ទ្ទីរបរិស្ថានខេត្ត កងកម្លាំងចំណុះសាលាក្រុងទាំង៣ លោក លោកស្រី ប្រធាន អនុប្រធានការិយាល័យ អង្គភាពចំណុះសាលាក្រុង លោក លោកស្រីប្រធានការិយាល័យជំនាញនានាជុំវិញក្រុង លោក លោកស្រីក្រុមប្រឹក្សាសង្កាត់ទាំង៧ ក្នុងក្រុង យុវជន ស ស យ ក ក្រុង និងសិស្សានុសិស្ស សរុបវត្តមានប្រមាណ៤០៧។
លោក តូច ប៉ូលីវ៉ា អភិបាលរងខេត្ត បានអានសារលិខិតរបស់សម្ដេចតេជោ ហ៊ុន សែន បានគូសបញ្ជាក់ឱ្យឃើញថាបច្ចុប្បន្ននេះកម្ពុជាមានសុខសន្តិភាព ស្ថិរភាពនយោបាយ សណ្ដាប់ធ្នាប់សាធារណៈ ប្រព័ន្ធហេដ្ឋារចនាសម្ព័ន្ធល្អប្រសើរ និងមានការអភិវឌ្ឍលើគ្រប់វិស័យ ជាមួយនឹងកំណើនសេដ្ឋកិច្ចខ្ពស់គួរឲ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ក្នុងនោះកម្ពុជាត្រូវបន្ត យកចិត្តទុកដាក់ខ្ពស់លើការងារសំខាន់សំខាន់ជាអាទិ៍៖ ការបន្តកាត់បន្ថយភាពក្រីក្រ, ការលើកកំពស់សុខភាព និងសុខមាលភាពប្រជាជន, ការគិតគូរពីចីរភាពនៅតាមបណ្ដាទីក្រុង, ការឆ្លើយតបនឹងបញ្ហាបម្រែបម្រួលអាកាសធាតុកិច្ចការពារ និងអភិរក្សធនធានធម្មជាតិជាដើម ។
លោកបានមានប្រសាសន៍បន្តថា គ្រប់ស្ថាប័នទាំងអស់ អាជ្ញាធរគ្រប់លំដាប់ថ្នាក់កងកម្លាំងប្រដាប់អាវុធ វិស័យឯកជន អង្គការសង្គមស៊ីវិល ដៃគូអភិវឌ្ឍន៍ពាក់ព័ន្ធ និងព្រះសង្ឃគ្រប់ព្រះអង្គ លោកគ្រូ អ្នកគ្រូ សិស្សានុសិស្ស និស្សិត យុវជន យុវនារី មន្ត្រីរាជការ បុគ្គលិកក្រុមហ៊ុនឯកជន/រោងចក្រ និងបងប្អូនជនរួមជាតិទាំងអស់មេត្តាផ្ដល់ ការគាំទ្រនិងចូលរួមអនុវត្តឲ្យបានផុសផុលប្រកបដោយស្មារតីទទួលខុសត្រូវ ខ្ពស់នូវចលនាប្រឡងប្រណាំង (ទីក្រុងស្អាត រមណីយដ្ឋានស្អាត សេវាល្អបដិសណ្ឋារកិច្ចល្អ) ឲ្យបានផុសផុលដើម្បីឲ្យកម្ពុជា ជាគោលដៅទេសចរណ៍ប្រកបដោយគុណភាពចីរភាព និងទាក់ទាញសម្រាប់ភ្ញៀវទេសចរណ៍ជាតិ និងអន្តរជាតិ សក្ដិសមនឹងកិត្តនាម (កម្ពុជា ព្រះរាជាណាចក្រអច្ឆរិយៈ) ៕ ដោយ ៖ វ៉ៃកូ
