ប្រធានាធិបតីវេណេហ្ស៊ុយអេឡា Nicolás Maduro បានប្តេជ្ញាថានឹងកម្ចាត់ក្រុមប្រឆាំងភាគតិច ដែលចង់ទម្លាក់រូបលោកចេញពីតំណែង។
លោកក៏បានស្នើឲ្យមានការហែរក្បួនប្រឆាំងពួកចក្រពត្តិនិយមផងដែរ នៅថ្ងៃសៅរ៍នេះ ដើម្បីតទល់ជាមួយនឹងការធ្វើបាតុកម្មប្រឆាំងនឹងរដ្ឋាភិបាលដែលគ្រោងដឹកនាំដោយ មេដឹកនាំបក្សប្រឆាំង Juan Guaidó។
ការប្រកាសរបស់លោក Nicolás Maduro គឺកើតឡើងក្រោយពេល មេដឹកនាំបក្សប្រឆាំង មិនអើពើទៅនឹងការគំរាមរបស់លោក និងបានត្រឡប់ចូលក្នុងប្រទេសវិញ នៅថ្ងៃច័ន្ទដើមសប្តាហ៍នេះ។
ចំណែកអាមេរិចវិញ បាននិយាយថា ខ្លួនកំពុងពិចារណាដាក់ទណ្ឌកម្មថ្មីទៀត ដើម្បីដាក់សម្ពាធលើ លោក Nicolás Maduro ឲ្យបោះបង់ចោលអំណាច។
បេសកជនរបស់អាមេរិចប្រចាំប្រទេសវេណេហ្ស៊យអេឡា ឈ្មោះ Elliott Abrams បាននិយាយថា វាពិតជាពិបាកខ្លាំងក្នុងការមើលឃើញពីតួនាទីរបស់លោក Nicolás Maduro ក្នុងការបោះឆ្នោតបែបប្រជាធិបតេយ្យនៅពេលអនាគត។
លោក Nicolás Maduro បានចោទប្រកាន់មេដឹកនាំបក្សប្រឆាំងថាកំពុងព្យាយាមរៀបចំធ្វើរដ្ឋប្រហារ ដោយមានការជួយពីសហរដ្ឋអាមេរិច។
ថ្លែងនៅក្នុងព្រឹត្តិការណ៍រំលឹកខួបទី ៦នៃការស្លាប់របស់បុព្វការីជន Hugo Chávez លោក Maduro បាននិយាយថា “ខណៈពេលដែលក្រុមឆ្កួតភាគតិច បន្តសេចក្តីស្អប់ និងភាពជូរចត់របស់ពួកគេ វាគឺជាបញ្ហារបស់ពួកគេ។ ពួកយើងមិនខ្វល់នឹងពួកគេឡើយ ជនរួមជាតិទាំងឡាយ “។
នៅចំពោះមុខយោធា លោក Maduru បន្ថែមទៀតថា “ពួកយើងនឹងបញ្ឍប់ពួកគេនៅលើផ្លូវ បញ្ឍប់កិច្ចការរពួកគេ។ ពួកយើងនឹងកម្ចាត់ពួកគេ”។
សូមបញ្ជាក់ថា មេដឹកនាំបក្សប្រឆាំងបានប្រកាសខ្លួនជាប្រធានាធិបតីស្តីទីកាលពីខែមករា ក្រោយពេលអង្គការនិតិបញ្ញាតិបានប្រកាសថា ការបោះឆ្នោតកាលពីឆ្នាំមុនមិនស្របច្បាប់ឡើយ។
លោក Juan Guaidó ដែលជាមេដឹកនាំបក្សប្រឆាំង និងប្រធានរដ្ឋសភា បានទទូលស្គាល់ពីបណ្តាលមេដឹកនាំជាង ៥០ប្រទេស ខណៈ លោក Maduru ទទួលបានការគាំទ្រពី ប្រទេសរុស្សី ចិន និងគុយបា៕ សុភ័ក្ត្រ
ប្រភព៖ BBC