ខេត្តស្វាយរៀង ៖ លោក ម៉ែន វិបុល អភិបាលខេត្តស្វាយរៀង និងជាប្រធានគណៈបញ្ជាការឯកភាពរដ្ឋបាលខេត្នាព្រឹកថ្ងៃពុធ ១កើត ខែផល្គុន ឆ្នាំច សំរឹទ្ធិស័ក ព.ស.២៥៦២ត្រូវនឹងថ្ងៃទី០៦ ខែមីនា ឆ្នាំ២០១៩នេះ បានធ្វើការជម្រុញឱ្យមន្ត្រីនានានៅក្រោមឱវាតត្រូវអនុវត្តផែនការចំនួន៥ចំណុចធ្វើយ៉ាងណាអនុត្តឱ្យមានប្រសិទ្ធភាពខ្ពស់។
លោកបានមានប្រសាសន៍ដូច្នេះក្នុងឱកាសដែលលោកបានអញ្ជើញជាអធិបតីនៅក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តស្វាយរៀងដែលបានប្រព្រឹត្តទៅនៅសាលប្រជុំនន្ទីអគារ ខ សាលាខេត្ត ។
អញ្ជើញចូលរួមក្នុងកិច្ចប្រជុំនេះមានតំណាងកងកម្លាំងទាំង៣ នាយករដ្ឋបាលសាលាខេត្ត លោក លោកស្រី ប្រធានមន្ទីរ/អង្គភាពនានា និងលោកអភិបាលក្រុង-ស្រុកទាំង៨ ។
មានប្រសាសន៍ក្នុងកិច្ចប្រជុំនេះ លោកអភិបាលខេត្តក៏បានធ្វើការផ្ដាំផ្ញើដល់មន្ទីរ-អង្គភាព រដ្ឋបាល ក្រុង ស្រុក កងកម្លាំងប្រដាប់អាវុធ និងអ្នកពាក់ព័ន្ធទាំងអស់ត្រូវបន្ត យកចិត្តទុកដាក់នូវកិច្ចការសំខាន់ៗ មួយចំនួនដូចខាងក្រោម ៖
ទី១.ត្រូវបន្តយកចិត្តទុកដាក់ថែរក្សាសន្តិសុខ សណ្តាប់ធ្នាប់សង្គម និងសុវត្ថិភាពនៅក្នុងខេត្តឲ្យបានល្អប្រសើរ ជាពិសេសក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ កម្មវិធី សង្ក្រាន្តស្វាយរៀង និងមានវិធានការការពារការបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក នាពេលខាងមុខឲ្យប្រព្រឹត្តទៅប្រកបដោយសន្តិសុខ សុវត្ថិភាព និងសណ្ដាប់ធ្នាប់ រលូនល្អប្រសើរស្របតាមគោលការណ៍លទ្ធិប្រជាធិបតេយ្យ សេរី ពហុបក្ស ។
ទី២. ត្រូវផ្សព្វផ្សាយដល់ប្រជាពលរដ្ឋឲ្យត្រៀមលក្ខណៈក្នុងការថែរក្សាទឹកទុកក្នុងរដូវប្រាំងឆ្នាំនេះ និងត្រៀមកម្លាំងក្នុងគណៈបញ្ជាការឯកភាពចុះអន្តរាគមន៍ដោះស្រាយបញ្ហាខ្វះខាតទឹកប្រើប្រាស់ដែលអាចកើតឡើងជាយថាហេតុ ។
ទី៣. ត្រូវបន្តពង្រឹងការអនុវត្តគោលនយោបាយភូមិឃុំមានសុវត្ថិភាព យុទ្ធនាការប្រយុទ្ធប្រឆាំងគ្រឿងញៀនខុសច្បាប់និងការអនុវត្តច្បាប់ចរាចរណ៍ផ្លូវគោកឲ្យបានតឹងរ៉ឹងបន្ថែមទៀត ។
ទី៤.រដ្ឋបាលក្រុង-ស្រុក និងអង្គភាពពាក់ព័ន្ធទាំងអស់ត្រូវបន្តទប់ស្កាត់ និងផ្សព្វផ្សាយអប់រំកុំឲ្យប្រជាពលរដ្ឋជួលដីនៅតាមតំបន់ព្រំដែនទៅឲ្យប្រជាពលរដ្ឋប្រទេសជិតខាង ។
និងទី៥.ទន្ទឹមនឹងពង្រឹងវិធានការបង្ការ ទប់ស្កាត់បទល្មើសគ្រប់ប្រភេទ គណៈបញ្ជាការឯកភាពរដ្ឋបាលគ្រប់ថ្នាក់ក៏ត្រូវបង្កើនការក្ដាប់សភាពការណ៍ និងត្រូវអន្តរាគមន៍ ស្រាវជ្រាវបង្ក្រាបឲ្យបាននូវរាល់បទល្មើសដែលបានកើតឡើងក្នុងភូមិសាស្ត្ររបស់ខ្លួន ៕ ដោយ ៖ វ៉ៃកូ
