សៀមរាប៖ មន្ត្រីជាន់ខ្ពស់ក្រសួងសុខាភិបាល បានក្រើនរំលឹកដល់ក្រុមគ្រូពេទ្យ ឲ្យមានស្មារតីទទួលខុសត្រូវ និងការយកចិត្តទុកដាក់ខ្ពស់ ចំពោះអ្នកមកទទួលសេវាព្យាបាល និងរក្សាឲ្យបាននូវក្រមសីលធម៌គ្រូពេទ្យ និងបង្កើនស្មារតីក្នុងការជួយសង្គ្រោះអ្នករងគ្រោះ ជាមុនសិន ទើបគិតពីតម្លៃសេវាព្យាបាល ស្នាក់នៅជាក្រោយ ពីព្រោះថាអាយុជីវិតមនុស្សមិនមានដាក់លក់នៅតាមទីផ្សារនោះឡើយ។
នៅព្រឹកថ្ងៃទី៦ ខែ មីនា ឆ្នាំ២០១៩នេះ នៅសាលប្រជុំមន្ទីរពេទ្យជ័យវរ្ម័នទី៧ គន្ធបុប្ផាខេត្តសៀមរាបមានបើកអង្គសន្និបាតបូកសរុបការងារឆ្នាំ២០១៨ និងទិសដៅបន្តឆ្នាំ២០១៩ របស់មន្ទីរសុខាភិបាលខេត្តក្រោមអធិបតីភាពលោកវេជ្ជបណ្ឌិត តែ គុយស៊ាន រដ្ឋលេខាធិការក្រសួងសុខាភិបាល និងលោក ទៀ សីហា អភិបាលនៃគណៈអភិបាលខេត្តសៀមរាប ។
លោក ទៀ សីហា បានគូសបញ្ជាក់ថា ការចូលរួមក្នុងកិច្ចសហការ ពី សំណាក់មន្ទីរ ស្ថាប័ន អង្គភាព សប្បុរសជន និងអង្គការដៃគូសុខាភិបាល សំខាន់អាជ្ញាធរមូលដ្ឋាន ដែលបានចូលរួមសហការជម្រុញដល់អត្រានៃការយល់ដឹងពីបញ្ហាសុខភាពដើម្បីផ្សព្វផ្សាយជូនដល់ប្រជាពលរដ្ឋនៅទីប្រជុំជន និង នៅតាមតំបន់ដាច់ស្រយាល ស្របតាមយុទ្ធសាស្ត្រចតុកោណរបស់រាជរដ្ឋាភិបាលកម្ពុជា តាមរយៈការដាក់ចេញនូវចក្ខុវិស័យវែងឆ្ងាយ ដ៏ត្រឹមត្រូវ សម្រាប់ការអភិវឌ្ឍប្រទេសជាតិរួមជាមួយនិងគោលនយោបាយ និង យុទ្ធសាស្ត្រប្រកបដោយ ភាពជាក់ស្តែង និង ភាពម៉ឹងម៉ាត់ ដោយបានធ្វើឲ្យតំបន់ជនបទនៅកម្ពុជាមានការប្រែមុខមាត់ថ្មីក្នុងក្តីសង្ឃឹម គឺប្រជាពលរដ្ឋទទួលបាននូវចំណងដៃជាច្រើន ។ ក្នុងនោះលោកអភិបាលខេត្តក៏បានធ្វើការកោតសរសើរផងដែរ អំពីលទ្ធផល សកម្មភាពដែលមន្ទីរសុខាភិបាលខេត្តអនុវត្តក្នុងឆ្នាំ២០១៨ ។
លោកទៀ សីហា ក៏បានថ្លែងអំណរគុណចំពោះស្ថាប័នពាក់ព័ន្ធទាំងឡាយ អាជ្ញាធរដែនដីគ្រប់លំដាប់ថ្នាក់ ព្រមទាំងដៃគូអភិវឌ្ឍន៍ និងប្រជាពលរដ្ឋគ្រប់ទីកន្លែង ដែលបានចូលរួមចំណែក យ៉ាងសកម្ម និង ផ្តល់នូវការគាំទ្រ ចំពោះការខិតខំប្រឹងប្រែងយ៉ាងពេញទំហឹងរបស់ក្រសួងសុខាភិបាល ក៏ដូចមន្ទីរសុខាភិបាលខេត្ត ក្នុងការបំពេញបេសកកម្ម ដ៏លំបាកស្មុគស្មាញដើម្បីបម្រើជាតិមាតុភូមិយើង ។
ក្នុងនោះដែរ លោកវេជ្ជបណ្ឌិត តែ គុយស៊ាន ក៏បានធ្វើការណែនាំមួយចំនួន សម្រាប់ការលើកកម្ពស់តាមដាន និង ពិនិត្យ នូវលទ្ធផលសកម្មភាព ការលំបាកមួយចំនួន និង បញ្ហារាំងស្ទះនាពេលកន្លងមក ដើម្បីធ្វើការពិភាក្សា ដោះស្រាយ និង កំណត់ទិសដៅផែនការអនុវត្តបន្តសម្រាប់ឆ្នាំបន្ទាប់ទៀត ។ ម្យ៉ាងទៀតវិស័យសុខាភិបាលខេត្ត មានភាពប្រសើរឡើងពីមួយឆ្នាំទៅមួយឆ្នាំ ពិសេសហេដ្ឋារចនាសម្ព័ន្ធ វិស័យសុខាភិបាលសាធារណៈ មានការរីកចម្រើនគួរកត់សម្គាល់ ជាអាទិ៍មានមន្ទីរពេទ្យបង្អែកខេត្តសៀមរាប ដែលបានផ្តល់សេវានូវសកម្មភាពពេញលេញ និងគ្រប់ផ្នែកសម្រាប់ទទួលសង្គ្រោះបងប្អូនប្រជាពលរដ្ឋ ពិសេសមន្ទីរពេទ្យបង្អែកខេត្ត មានបំពាក់សម្ភារបរិក្ខារទំនើបៗ និងមានមន្ទីរពេទ្យបង្អែកស្រុកមានមណ្ឌលសុខភាព ដែលមានបន្ទប់រង់ចាំមុន នឹងក្រោយសម្រាល នៅគ្រប់មណ្ឌលសុខភាពទាំងអស់ ពីទីប្រជុំជនរហូតដល់តំបន់ដាច់ស្រយ៉ាលក្នុងខេត្ត ។
លោករដ្ឋលេខាធិការក្រសួងសុខាភិបាល ក៏ធ្វើការក្រើនរំលឹកដល់ក្រុមគ្រូពេទ្យ ឲ្យមានស្មារតីទទួលខុសត្រូវ និង ការយកចិត្តទុកដាក់ខ្ពស់ចំពោះអ្នកមកទទួលសេវាព្យាបាល និង រក្សាឲ្យបាននូវក្រមសីលធម៌ គ្រូពេទ្យផងដែរ ។ ម្យ៉ាងទៀតសូមឲ្យក្រុមគ្រូពេទ្យ បង្កើនស្មារតីក្នុងការជួយសង្គ្រោះ អ្នករងគ្រោះជាមុនសិន ទើបគិតពីតម្លៃសេវាព្យាបាល ស្នាក់នៅជាក្រោយ ពីព្រោះថា អាយុជីវិតមនុស្សមិនមានដាក់លក់នៅតាមទីផ្សារនោះឡើយ ហើយគ្រូពេទ្យ និង បុគ្គលិកសុខាភិបាលទាំងអស់ មិនត្រូវចាត់ទុកអ្នកជំងឺជាអតិថិជនរបស់ខ្លួនទេ គឺត្រូវចាត់ទុកអ្នកជំងឺ ជាជនរងគ្រោះ ដែលចាំបាច់ត្រូវ ទទួលបានការសង្គ្រោះជីវិត ព្យាបាល និង ថែទាំសុខភាពដោយយកចិត្តទុកដាក់បំផុត ដើម្បីឲ្យពួកគាត់មានក្តីសង្ឃឹម មានជំនឿទុកចិត្ត ចំពោះសេវាសុខាភិបាលសាធារណៈ នៅកម្ពុជា ។
លោកអភិបាលខេត្ត ក៏បានអំពាវនាវដល់អាជ្ញាធរគ្រប់ជាន់ថ្នាក ចូលរួមធ្វើ ការផ្សព្វផ្សាយ ពីការជូនដំណឹងរបស់ក្រសួងធនធានទឹក និងឧតុនិយម ពីការខ្វះខាតទឹកប្រើប្រាស់នៅតាមតំបន់មួយចំនួន ដើម្បីឲ្យបងប្អូន បានត្រៀមលក្ខណៈ និង ថែរក្សាទីតាំងប្រភពទឹកដែលមានព្រមទាំងត្រូវចូលរួមសហការជាមួយអាជ្ញាធរ សមត្ថកិច្ចគ្រប់ជាន់ ថ្នាក់ក្នុងការទប់ស្កាត់ បង្ក្រាបឲ្យខាងតែបាន ពីបញ្ហាគ្រឿងញៀននៅតាមមូលដ្ឋាន និង សូមឲ្យដៃគូអភិវឌ្ឍន៍ជាតិ អន្តរជាតិនានា មន្ទីរ-អង្គភាពពាក់ព័ន្ធ និងអាជ្ញាធរមូលដ្ឋានគ្រប់លំដាប់ថ្នាក់មេត្តាបន្តជួយគាំទ្រ ជ្រោមជ្រែង និង សហការឲ្យបានល្អ ដើម្បីបង្កើនប្រសិទ្ធភាព ក្នុងការផ្តល់សេវាសុខភាព របស់សហគមន៍ជនបទនៅក្នុងខេត្តសៀមរាប ឲ្យកាន់តែល្អប្រសើរ ឲ្យទទួលបានជោគជ័យប្រកប ដោយផ្លែផ្កា សំដៅកាត់បន្ថយអត្រាមរណៈ របស់ស្ត្រី និងកុមារ និងទប់ស្កាត់ បាននូវភាពងាយរងគ្រោះ ដោយជំងឺឆ្លងផ្សេងៗ ដែលកត្តានេះ នឹងរួមចំណែកកាត់បន្ថយភាពក្រីក្ររបស់ប្រជាពលរដ្ឋ៕ ដោយ៖កូឡាប