តាកែវ ៖ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុបានមានប្រសាសន៏បន្តថា ពីមួយឆ្នាំទៅមួយឆ្នាំការចំណាយរបស់រដ្ឋាភិបាលមានការកើនឡើងជាលំដាប់ ដូច្នោះមន្ត្រីគយដែលមានភារកិច្ចប្រមូលចំណូលពន្ធជូនរដ្ឋ ត្រូវធ្វើយ៉ាងណារកចំណូលចូលថវិការជាតិឲ្យបានកាន់តែច្រើនឡើង តាមរយៈការប្រមូលពន្ធលើទំនិញនាំចេញ នាំចូលតាមច្រកទ្វាអន្តរជាតិនេះប្រកបដោយតម្លាភាព គណេយ្យភាពនិងការប្រមូលពន្ធប្រកបទៅដោយស្តង់ដាវិជ្ជាជីវៈត្រឹមត្រូវ ជាពិសេសត្រូវធ្វើការទប់ស្កាត់រាល់ទំនិញគេចពន្ធដែលពួកឈ្មួញខិលខូចលួចនាំទំនិញចេញចូលតាមច្រករបៀងនានាឲ្យបានជាដាច់ខាត។
ថ្លែងបែបនេះនៅក្នុងពិធីកាត់ខ្សែរបូសម្ភោធអាគារស្នាក់នៅរបស់ការរិយាល័យគយនិងរដ្ឋាករច្រកទ្វាអន្តរជាតិភ្នំដិនខេត្តតាកែវ កាលពីថ្ងៃទី ៦ ខែ មិនា ឆ្នាំ ២០១៨ នេះ លោកបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រីនិងជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ បានធ្វើការណែនាំឲ្យមន្ត្រីគយប្រចាំច្រកទ្វាអន្តរជាតិភ្នំដិនត្រូវប្រឹងប្រែងប្រមូលចំណូលពន្ធជូនរដ្ឋឲ្យមានការកើនឡើងព្រោះគម្រោងចំណាយរបស់រដ្ឋាភិបាលបានកើនឡើងជារៀងរាល់ឆ្នាំផងដែរ។
ក្រៅពីបានណែនាំដល់មន្ត្រីគយឲ្យបន្តប្រឹងប្រែងប្រមូលចំណូលថវិការជាតិ លោកបណ្ឌិតសភាចារ្យ អូន មុនីរ័ត្ន ក៏បានធ្វើការណែនាំដល់មន្ត្រីគយដែលប្រចាំការនៅច្រកទ្វាព្រំដែនអន្តរជាតិភ្នំដិន ត្រូវចេះសហការជាមួយសមត្ថកិច្ច អាជ្ញាធមូលដ្ឋានជាពិសេសត្រូវសហការជាមួយមន្ត្រីវៀតណាមដែលនៅច្រកទ្វាព្រំដែនជិតគ្នា ព្រោះការចេះសហការគ្នាល្អវាក៏ជាប្រភពដែលនាំឲ្យមានការប្រមូលចំណូលពន្ធជូនជាតិបានកាន់តែច្រើនឡើងផងដែរ។ នៅក្នុងឱកាស់នោះលោករដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏បានជម្រុញឲ្យអង្គភាពគយនៅច្រកទ្វាអន្តរជាតិភ្នំដិន ត្រូវបន្តអភិវឌ្ឍន៏កន្លែងស្នាក់នៅរបស់មន្ត្រី កន្លែងធ្វើការរបស់មន្ត្រីឲ្យមានភាពសមរម្យជាពិសេសត្រូវបង្កលក្ខណៈងាយស្រួលដល់អ្នកចូលមកបង់ពន្ធកាន់តែរហ័ស ៕ ដោយ ៖ តាកែវ