ភ្នំពេញ៖ ជនសង្ស័យម្នាក់ ដែលជាឃាតកសម្លាប់នារី ខេរ៉ាអូខេដឹឃ្វីន ត្រូវសមត្ថកិច្ចចាប់បានហើយថ្ងៃអង្គារ ទី១៩ ខែធ្នូ ឆ្នាំ២០១៧ ដោយមានការសហការរវាងកម្លាំងនគរបាល ក្រុងដូនកែវ និងផែននគរបាលព្រហ្មទណ្ឌ នៃស្នងការដ្ឋាននគរបាលខេត្តតាកែវ កម្លាំងនគរបាល នៃអធិការដ្ឋាននគរបាលខណ្ឌសែនសុខ រាជធានីភ្នំពេញ ។
ជនសង្ស័យម្នាក់ឈ្មោះ ស៊ុយ មេសា ហៅលូ ភេទប្រុស អាយុ២២ឆ្នាំ មុខរបរលក់អាវជជុះ ស្នាក់នៅភូមិត្រាំ សង្កាត់រកាក្រៅ ក្រុងដូនកែវ ខេត្តតាកែវ ពីបទ ឃាតកម្ម ប្រព្រឹត្តកាលពី ថ្ងៃទី១៥ ខែធ្នូ ឆ្នាំ២០១៧ វេលាម៉ោង១១ និង៣០នាទីយប់ នៅផ្ទះជួលលេខ ១០២. ផ្លូវបេតុង ស្ថិតក្នុងភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ ។ បន្ទាប់ពីសកម្មភាពសម្លាប់ជនរងគ្រោះ ឃាតករូបបានគេចខ្លួនរហូតដល់ខេត្តតាកែវ។ ជនរងគ្រោះឈ្មោះ សេន ស៊ីយ៉ា ភេទស្រី អាយុ១៦ឆ្នាំ មុខរបរ បុគ្គលិក KTV ដឹឃ្វីន ស្នាក់នៅភូមិ សង្កាត់ កើតហេតុខាងលើ ។
បច្ចុប្បន្ន ជនសង្ស័យ បានប្រគល់ជូនទៅអធិការដ្ឋាននគរបាលខណ្ឌសែនសុខ ដើម្បីចាត់ការបន្ត។ ប៉ុន្តែទោះយ៉ាងណា សមត្ថកិច្ចមិនបានបញ្ជាក់អំពីមូលហេតុដែលឃាតកសម្លាប់ជនរងគ្រោះនោះទេ៕ ដោយ ៖ កូឡាប