ខេត្តព្រះសីហនុ ៖ បុគ្គលិកពេទ្យ និងអ្នកជំងឺ ដែលកំពុងសម្រាកព្យាបាលនៅមន្ទីរពេទ្យបង្អែកខេត្តព្រះសីហនុ បានអះអាងថារាល់ថ្ងៃនេះ ខាងមន្ទីរពេទ្យបង្អែក មិនមានទឹកប្រាស់ឲ្យបានគ្រប់ចំនួននោះទេ។
បញ្ហានេះ ទាំងក្រុមគ្រូពេទ្យ និងអ្នកជំងឺ ដែលកំពុងសម្រាក់ព្យាបាលនៅមន្ទីរពេទ្យបង្អែកខេត្តព្រះសីហនុ បានអំពាវនាវដល់លោក យន្ត មីន អភិបាលខេត្តព្រះសីហនុ និងថ្នាក់ដឹកនាំស្ថាប័នពាក់ព័ន្ធ ឲ្យជួយអន្តរាគមន៍ផ្គត់ផ្គង់ទឹកស្អាត ជូនមន្ទីរពេទ្យបង្អែកខេត្តព្រះសីហនុ ឲ្យមានទឹកប្រើប្រាស់ឲ្យបានគ្រប់ចំនួនឡើងវិញ។
ភ្លាមៗ មិនបង្អង់យូរ បន្ទាប់ពីទទួលបានព័ត៌មានខាងលើនេះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ក៏បានបញ្ចេញរថយន្តដឹកទឹកចំនួន ២គ្រឿង ដើម្បីដឹកទឹកនាំយកទៅផ្គត់ផ្គង់ដល់មន្ទីរពេទ្យបង្អែកខេត្តជាបន្ទាន់ ស្របពេលទាំងបុគ្គលិកពេទ្យ និងអ្នកជម្ងឺកំពុងសម្រាកព្យាបាលនៅក្នុងមន្ទីរពេទ្យនេះ កំពុងជួបប្រទះខ្វះខាតទឹកប្រើប្រាស់ជាចាំបាច់។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ មានប្រសាសន៍ថា ក្រោយទទួលបានព័ត៌មានពីប្រធានមន្ទីរពេទ្យបង្អែកខេត្តព្រះសីហនុ ផ្តល់ព័ត៌មានមកថា ខាងមន្ទីរពេទ្យនេះ មិនមានទឹកប្រើប្រាស់ទាំងបុគ្គលិកពេទ្យ ជាពិសេសអ្នកជំងឺ ដែលកំពុងសម្រាកព្យាបាលនៅមន្ទីរពេទ្យនេះ កាលពីថ្ងៃទី៦ ខែមីនា លោកក៏បានចាត់ឲ្យកម្លាំងនគរបាល នាំយកឡានទឹកចំនួន២រថយន្ត ដើម្បីទៅដឹកទឹកជូនមន្ទីរពេទ្យនេះ ឲ្យមានទឹកប្រើប្រាស់ឲ្យបានគ្រប់ចំនួនឡើងវិញ។ លោកបន្តថា រថយន្តដឹកទឹក របស់ស្នងការ បានដឹកទឹកចំនួន ១០ជើង ឬស្មើទឹកដប់រថយន្ត ដើម្បីយកទៅផ្គត់ផ្គង់សេចក្តីត្រូវការទឹកប្រើប្រាស់ នៅមន្ទីរពេទ្យបង្អែកខេត្តព្រះសីហនុ។
លោក ជួន ណារិន្ទ ថា លោកបាទទទួលការស្នើសុំអន្តរាគមន៍ ពីមន្ទីរពេទ្យបង្អែកខេត្តពីការខ្វះទឹកស្អាតប្រើប្រាស់ សម្រាប់បុគ្គលិកពេទ្យ និងអ្នកសម្រាកព្យាបាលជម្ងឺក្នុងមន្ទីរពេទ្យនេះ។ ភ្លាមៗលោកបានចាត់ចែងឲ្យកម្លាំងការិយាល័យនគរបាល បង្ការពន្លត់អគ្គិភ័យ និងសង្គ្រោះ បានចេញរថយន្ត ដើម្បីដឹកទឹកស្អាតយកទៅជូនមន្ទីរពេទ្យបង្អែកខេត្តព្រះសីហនុ ជាបន្ទាន់ ដែលខ្វះទឹកស្អាតប្រើប្រាស់។
លោកបន្តថា រថយន្ត២គ្រឿង បានដឹកជញ្ជូនទឹកយកទៅបញ្ចូលក្នុងអាងស្តុកទឹក របស់មន្ទីរពេទ្យបង្អែក បានចំនួន១០ឡាន ឬស្មើចំនួន៥០ម៉ែត្រគូប សម្រាប់ប្រើប្រាស់ក្នុងមន្ទីរពេទ្យទាំងមូល។
ប្រធានមន្ទីរពេទ្យបង្អែកខេត្តព្រះសីហនុ លោក សេង ណុង បានថ្លែងអំណរគុណ ដល់លោក ជួន ណារិន្ទ ស្នងការនគរបាលខេត្តព្រះសីហនុ ដែលបានដឹកទឹក មកផ្តល់ជូនមន្ទីរពេទ្យបង្អែកខេត្តព្រះសីហនុ បានទាន់ពេលវេលាចំនួន១០ឡាន ដោយប្រើប្រាស់រថយន្តចំនួន២គ្រឿង។
សូមបញ្ជាក់ថា រាល់ថ្ងៃនេះ សម្រាប់ទីប្រជុំជនក្នុងក្រុងព្រះសីហនុ គឺបញ្ហាតម្រូវការទឹកប្រើប្រាស់ គឺមិនទាន់អាចបំពេញតាមតម្រូវការ របស់ប្រជាពលរដ្ឋនៅឡើយទេ។ បើទោះបីអាជ្ញាធររដ្ឋបាលខេត្តព្រះសីហនុ និងមន្ត្រីរដ្ឋារករទឹកស្វយ័តខេត្តនេះ បានខិតខំប្រឹងប្រែងតភ្ជាប់បំពង់ចែកចាយទឹកមានទំហំធំ ឲ្យបានទូលំទូលាយបែបណាក្តី ក៏ប៉ុន្តែតម្រូវការទឹកស្អាតប្រើប្រាស់នៅក្នុងខេត្តព្រះសីហនុ មិនទាន់មានទឹកស្អាតប្រើប្រាស់គ្រប់ចំនួនទេ។
ត្រង់ចំណុចនេះ ប្រជាពលរដ្ឋរស់នៅខេត្តព្រះសីហនុ ជាពិសេសរស់នៅទីប្រជុំជនក្នុងក្រុងព្រះសីហនុ បានសំណូមពរដល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឲ្យជួយអន្តរាគមន៍ទៅក្រុមអានកូ ដែលមានប្រភពទឹកនៅតំបន់ក្បាលឆាយ ឲ្យបញ្ចេញទឹកចែកជូនប្រជាពលរដ្ឋ ឲ្យមានទឹកប្រើប្រាស់ឲ្យបានគ្រប់ចំនួនឡើងវិញ។
ពលរដ្ឋអះអាងថា រាល់ថ្ងៃនេះ ពួកគេឃើញមានការតភ្ជាប់បំពង់ចែកចាយទឹក ចេញពីក្រុមហ៊ុនអានកូ ចូលទៅកាន់ទីតាំងមានសំណង់អគារធំៗ ឬសណ្ឋាគារប្រណិតៗ មានសកម្មភាពយ៉ាងសកម្ម ប៉ុន្តែសម្រាប់ផ្ទះប្រជាពលរដ្ឋ ឬមូលដ្ឋាន របស់ប្រជាពលរដ្ឋរស់នៅវិញ មិនសូវឃើញមានការតភ្ជាប់បំពង់ចែកចាយទឹក ឲ្យបានទូលំទូលាយ ដូចក្រុមហ៊ុនអានកូ ជួយគិតគូរដល់ប្រជាពលរដ្ឋនោះទេ។
ផ្តើមពីបញ្ហានេះ ក្រុមប្រជាពលរដ្ឋ បានទទូចស្នើសុំដល់សម្តេចប្រមុខដឹកនាំ ឲ្យជួយអន្តរាគមន៍ទៅក្រុមហ៊ុនអានកូ ឲ្យបញ្ចេញទឹកឲ្យបានគ្រប់ចំនួន មកឲ្យ ស្ថាប័នរដ្ឋាករទឹកស្វយ័តខេត្តព្រះសីហនុ ឲ្យបានគ្រប់ចំនួន ដើម្បីមានទឹកចែកូនជូនប្រជាពលរដ្ឋ នៅតាមមូលដ្ឋានមានទឹកប្រើប្រាស់ ឲ្យបានគ្រប់ចំនួនឡើងវិញ៕ ដោយ៖ ដែន សីមា