ខេត្តស្វាយរៀង ៖ លោក វេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ី អង្គការមូលនិធិថែទាំសុខភាពអ្នកជំងឺអេដស៍(AHF) អ្នកស្រី វេជ្ជបណ្ឌិត ហួយ ស៊ីខេង ប្រធានកម្មវិធីប្រចាំប្រទេសកម្ពុជា អង្គការមូលនិធិថែទាំសុខភាពអ្នកជំងឺអេដស៍(AHF)បានអញ្ជើញជាអធិបតីនៅក្នុងពិធីរំលឹកខួបលើកទី១០៨ នៃទិវាអន្តរជាតិ ៨ មីនា ឆ្នាំ ២០១៩ ក្រោមប្រធានបទ ការលើកកំពស់សមភាពយេនឌ័រដើម្បីអភិវឌ្ឍន៍ឬសមតុល្យភាពដើម្បីអភិវឌ្ឍន៍ ។ ពិធីនេះបានរៀបចំឡើងនៅសាលប្រជុំរបស់វិទ្យាល័យស្វាយរៀង។
ពិធីនេះក៏មានការអញ្ជើញចូលរួមផងដែរពីសំណាក់លោកវេជ្ជបណ្ឌិត អុឺង សឹងកង តំណាងមន្ទីរសុខាភិបាលខេត្ត តំណាងមន្ទីរអប់រំយុវជននិងកីឡាខេត្ត លោកប្រធានការិយាល័យអប់រំយុវជននិងកីឡាក្រុងស្វាយរៀង លោកនាយក នាយករងវិទ្យាល័យស្វាយរៀង ព្រមទាំងប្អូនៗសិស្សានុសិស្សវិទ្យាល័យស្វាយរៀងចំនួន៣០០នាក់។
អ្នកស្រី វេជ្ជបណ្ឌិត ហួយ ស៊ីខេង ប្រធានកម្មវិធីប្រចាំប្រទេសកម្ពុជា អង្គការមូលនិធិថែទាំសុខភាពអ្នកជំងឺអេដស៍(AHF)បានឱ្យដឹងថា ៖ សំរាប់ទិវាអន្តរជាតិនារីនាពេលនេះគឺចង់ឱ្យថ្នាក់ដឹកនាំមនុស្សទូទៅយល់ថាៈការផ្តល់ការគាំទ្រ ដល់ស្ត្រីនិងកុមារទទួលបានព័ត៍មានគ្រប់ជ្រុងជ្រោយពីការសម្រេចចិត្តនិងការថែទាំសុខភាពគឺជាគោលដៅចំបងក្នុងការអភិវឌ្ឍ។ ស្ត្រីត្រូវតែបានផ្តល់អំណាចនិងគាំទ្រគ្រប់ទីកន្លែងនិងគ្រប់លំដាប់ថ្នាក់ទាំងអស់ ហើយយើងកំពុងធ្វើការងារគ្រប់យ៉ាងដែលយើងអាចធ្វើបានដើម្បីធានាឱ្យបានថាស្ត្រីនិងកុមារមានលទ្ធភាពទទួលបានព័ត៍មានគ្រប់ជ្រុងជ្រោយពីការបង្ការមេរោគអេដស៍សេវាថែទាំលើការធ្វើតេស្ត ឈាមរកមេរោគអេដស៍ការបង្ការនិងការព្យាបាលដោយមិនគិតថ្លៃ។
លោក វេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ី អង្គការមូលនិធិថែទាំសុខភាពអ្នកជំងឺអេដស៍(AHF)បានមានប្រសាសន៍ឱ្យដឹងថាៈ ទិវាអន្តរជាតិនារី៨មីនាជារៀងរាល់ឆ្នាំត្រូវបានប្រារព្ធធ្វើឡើងដើម្បីរំលឹកពីវីរភាពនៃការតស៊ូរបស់នារីទូទាំងសកលលោកក្នុងការទាមទារឱ្យមានការលើកកម្ពស់សិទ្ធសេរីភាពប្រជាធិបតេយ្យនិងការអនុវត្តសិទ្ធិស្មើភាពរវាងបុរសនិងស្ត្រីនៅក្នុងសង្គម។
លោកវេជ្ជបណ្ឌិតបានមានប្រសាសន៍បន្តទៀតថា ៖ អង្គការមូលនិធិថែទាំសុខភាពអ្នកជំងឺអេដស៍ (AHF) ដែលជាអង្គការប្រយុទ្ធប្រឆាំងនឹងជំងឺអេដស៍សកលដ៏ធំដែលប្រតិបត្តិការនៅក្នុង៤៣ប្រទេសកំពុងរៀបចំដើម្បីអបអរទិវាអន្តរជាតិ៨មីនា (IWD) ដែលជាការរួមបញ្ចូលគ្នានៃថ្ងៃឈប់សំរាកទូទាំងពិភពលោកជាមួយនិងយុទ្ធនាការជំរុញនិងរំលឹកដសមិទ្ធផលដែលទទួលបានពីវិស័យសង្គម សេដ្ឋកិច្ច វប្បធម៍និងនយោបាយរបស់ស្ត្រី។ ជារៀងរាល់ឆ្នាំនៅថ្ងៃទី៨ខែមីនាការតស៊ូមតិរួមគ្នាជុំវិញទិវាអន្តរជាតិនារីរបស់រដ្ឋាភិបាលអង្គការនិងស្ថាប័ននានាត្រូវបានធ្វើឡើងដើម្បីជំរុញដល់ការផ្លាស់ប្តូរពីសមភាពយេនឌ័រ។ សមភាពយេនឌ័រការពង្រឹងភាពអង់់់់់អាច
ដល់ស្ត្រីនិងក្មេងស្រីនិងក្រុមងាយរងគ្រោះគឺជាកត្តាដ៏ចាំបាច់បំផុតដើម្បីធានាបាននូវភាពរីកចំរើនរបស់សង្គមជាតិទាំងមូល។
មានស្ត្រីនិងក្មេងស្រីជិត១៩លាននាក់នៅលើសកលលោកដែលកំពុងតែរស់នៅជាមួយមេរោគអេដស៍ហើយក្នុងនោះមានអ្នកឆ្លងមេរោគអេដស៍ថ្មីចំនួន៨៧មុឺននាក់ជារៀងរាល់ឆ្នាំហេតុដូច្នេះហើយទើបអង្គការមូលនិធិថែទាំសុខភាពអ្នកជំងឺអេដស៍(AHF)ដែលបានសហការយ៉ាងជិតស្និទ្ធជាមួយរាជរដ្ឋាភិបាលនិងជាមួយអង្គការជាដៃគូរបានយកចិត្តទុកដាក់ទៅលើស្ត្រីនិងក្មេងស្រីដែលកំពុងតែរងគ្រោះនិងប្រឈមមុខទៅនិងការឆ្លងមេរោគអេដស៍និងជំងឺអេដស៍ដើម្បីឱ្យពួកគាត់មានសិទ្ធិស្មើគ្នានិងមានសិទ្ធិក្នុងការទទួលបានសេវាថែទាំសុខភាពដែលពួកគេត្រូវការក៏ដូចជាធានាឱ្យស្ត្រីនិងក្មេងស្ត្រីទាំងនោះមានសុវត្ថិភាពនិងលទ្ធភាពទទួលបាននូវសេវាធ្វើតេស្ត រកមេរោគអេដស៍ ការបង្ការនិងព្យាបាលដោយមិនគិតថ្លៃ។ដូច្នេះហើយសូមប្អូនៗទាំងអស់គ្នាយកចំណេះដឹងដែលទទួលបាននៅក្នុងថ្ងៃនេះក៏ដូចជាថ្ងៃកន្លងមកដើម្បីធ្វើការចែករំលែកដល់មិត្តភក្តិក៏ដូចជាស្ត្រីនិងក្មេងស្រីផ្សេងៗទៀតផងដែរ ៕ ដោយ ៖ វ៉ៃកូ