ភ្នំពេញ : នៅថ្ងៃទី៦ ខែមីនា លិខិតប្តូរសារអំពីជំនួយឥតសំណងសម្រាប់ “គម្រោងគាំទ្រការរស់នៅក្នុងបរិស្ថានឲ្យប្រសើរឡើង និងកសាងសមត្ថភាពសម្រាប់ការពារគ្រោះមហន្តរាយនៅកម្ពុជា” ដែលមានទឹកប្រាក់១០០លានយ៉េន (ប្រមាណជា ៨៨២,០០០ ដុល្លារអាមេរិក) ត្រូវបានចុះហត្ថលេខាដោយលោក ឯកអគ្គរាជទូត ហូរីណូអ៊ុជិ និង លោក សុខ វណ្ណា ប្រធានកម្មវិធីអង្គការសហប្រជាជាតិសម្រាប់លំនៅឋានមនុស្សជាតិ ប្រចាំកម្ពុជា ក្រោមវត្តមានដ៏ខ្ពងខ្ពស់របស់លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ ជាសាក្សី។
នៅប្រទេសកម្ពុជា តាមរយៈកិច្ចសហការជាមួយUN-Habitat យើងអាចមើលឃើញនូវកិច្ចខិតខំប្រឹងប្រែងជាវិជ្ជមានរបស់រាជរដ្ឋាភិបាលកម្ពុជាទាក់ទងទៅនឹងការប្រែប្រួលអាកាសធាតុ និងការកាត់បន្ថយហានិភ័យគ្រោះមហន្តរាយ។ កាលពីខែកញ្ញា ឆ្នាំ 2018 រាជរដ្ឋាភិបាលកម្ពុជា បានដាក់ចេញនូវ”យុទ្ធសាស្ដ្រចតុកោណដំណាក់កាលទី 4″ ដែលកំពុងផ្តោតទៅលើការធានានិរន្តរភាពបរិស្ថាននិងប្រតិកម្មទុកជាមុនចំពោះការប្រែប្រួលអាកាសធាតុ។
យើងជឿជាក់ថាជំនួយនេះនឹងរួមចំណែកក្នុងការប្រយុទ្ធប្រឆាំងនឹងការប្រែប្រួលអាកាសធាតុនិងកាត់បន្ថយផលប៉ះពាល់ដែលកិច្ចការទាំងពីរនេះគឺចាំបាច់ណាស់សម្រាប់ការអភិវឌ្ឍ និងកំណើនសេដ្ឋកិច្ចប្រកបដោយចីរភាពនៅកម្ពុជា៕ ដោយ ៖ កូឡាប
