ភ្នំពេញ ៖ ក្រសួងសាធារណការ និងដឹកជញ្ជូន ទើបតែបានចេញនូវបទប្បញ្ញតិ្តដែលអនុញ្ញាតឲ្យមានការផ្តល់សេវាកម្មដឹកជញ្ជូនប្រភេទថ្មីGrab Cambodiaនៅកម្ពុជា តាមរយៈការផ្តល់សេវាចែករំលែកយានជំនិះធ្វើដំណើរដោយប្រើ ប្រាស់បច្ចេកវិទ្យាថ្មីឈានមុខគេក្នុងវិស័យដឹកជញ្ជូនក្នុងសតវត្សរ៍ទី២១នេះ និងហេដ្ឋារចនាសម្ព័ន្ធប្រព័ន្ធ ដឹកជញ្ជូនសកលនៅទីក្រុងនិងជនបទ។ ការដាក់ឱ្យដំណើរការ សេវាកម្មដឹកជញ្ជូនដែលប្រើប្រាស់បច្ចេកវិទ្យាថ្មីនៅលើទូរស័ព្ទ ដៃស្មាតហ្វូន សម្រាប់ផ្ដល់សេវាជូនដល់អតិថិជនកាន់តែឆាប់រហ័ស និងកាន់តែមានទំនុកចិត្ដនៅកម្ពុជា។
លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និង ដឹកជញ្ជូនដែល ជាអធិបតីក្នុងពិធីសម្ពោធបើកដំណើរការជាផ្លូវការនូវសេវាកម្មចែករំលែកយានជំនិះ Grab Cambodia នៅភោជនីយដ្ឋាន Topaz នៅថ្ងៃទី១៩ ខែធ្នូ ឆ្នាំ២០១៧ បានថ្លែងថា សេវាកម្មចែករំលែកយានជំនិះធ្វើដំណើរនេះ ជាមធ្យោបាយធ្វើដំណើរដែលមានលក្ខណៈថ្មីស្រឡាង មានភាពច្នៃប្រឌិត មានសុវត្ថិភាពនិងតម្លាភាព ដែលផ្តល់ឱកាសឲ្យប្រជាពលរដ្ឋអាចទទួលបានចំណូល បន្ថែម ដោយការប្រើប្រាស់យានយន្តឯកជន ឬសម្រាប់គ្រួសាររបស់ពួកគាត់ដើម្បីផ្តល់សេវាដឹកជញ្ជូន។
ក្រសួងសាធារណការ និងដឹកជញ្ជូនបានធ្វើការយ៉ាងសកម្មជាមួយក្រុមហ៊ុនអន្តរជាតិចែករំលែកយាន ជំនិះធ្វើដំណើរនេះចំនួនពីរ ដើម្បីចាប់ផ្តើមសេវាកម្មចែករំលែកយានជំនិះធ្វើដំណើរនេះនៅកម្ពុជា។ ក្រុមហ៊ុនទាំងពីរនេះគឺជាក្រុមហ៊ុនស្របច្បាប់យ៉ាងពេញលេញនៅក្នុងទីផ្សារអាស៊ាន ដែលពួកគេប្រតិបត្តិ ទាំងអស់ ដោយប្រកាន់ខ្ជាប់ក្រមសីលធម៌ខ្ពស់ក្នុងការធ្វើឱ្យការដឹកជញ្ជូនអាចប្រើប្រាស់បានសម្រាប់ ទាំងអស់គ្នា និងនាំអាស៊ីអាគ្នេយ៍ចូលទៅក្នុងសេដ្ឋកិច្ចឌីជីថល។
បច្ចុប្បន្ននេះកម្ពុជា ក្លាយជាប្រទេសទី៨នៅក្នុងតំបន់អាស៊ាន ដែលមានក្រុមហ៊ុន Grab បានផ្តល់ សេវាកម្ម ប្រភេទនេះ ហើយសព្វថ្ងៃក្រុមហ៊ុន Grab កំពុងប្រតិបត្តិការរបស់ខ្លួននៅក្នុងទីក្រុងរបស់អាស៊ាន ចំនួន១៥៦ ដោយមានអ្នកបើកបរជាង២.១ លាននាក់ ដែលធ្វើឱ្យពលរដ្ឋមានភាពងាយស្រួលនិងបង្កើត ការងារធ្វើដល់អ្នកបើកបរផងដែរ។
ក្រសួងសាធារណការ និងដឹកជញ្ជូនបានចុះអនុស្សរណៈយោគយល់ជាមួយក្រុមហ៊ុន GRAB ដើម្បីធ្វើ ការរួមគ្នាជួយវិភាគអំពីការគ្រប់គ្រងចរាចរណ៍ដោយប្រើចំណុចគោលដៅរថយន្តតាមប្រព័ន្ធ GPS របស់ ក្រុមហ៊ុនGrab ដើម្បីជួយដល់អាជ្ញាធរពាក់ព័ន្ធរបស់យើង។
GRAB និង UNDPកម្ពុជា កំពុងស្វែងយល់ផងដែរពីភាពជាដៃគូ ដែលមានសក្តានុពលដើម្បីលើកកម្ពស់ ប្រព័ន្ធ និងច្ចេកវិទ្យា និងវិធានការដឹកជញ្ជូនក្នុងទីក្រុងប្រកបដោយនិរន្តរភាព ក្នុងគោលបំណងកាត់បន្ថយ ការបំភាយឧស្ម័នផ្ទះកញ្ចក់(GHG) ទាក់ទងនឹងការដឹកជញ្ជូន និងលើកកម្ពស់ស្តង់ដារគុណភាពនៃការ រស់នៅក្នុងតំបន់ទីក្រុង។
លោក ស៊ុន ចាន់ថុលទេសរដ្ឋមន្ដ្រី រដ្ឋមន្ដ្រីក្រសួង សាធារណការ និងដឹកជញ្ជូន បានមានប្រសាសន៍ថា “ការបើកដំណើរការប្រព័ន្ធថ្មីនេះ ត្រូវបានប្រើប្រាស់ច្រើននៅទូទាំងពិភពលោក ដែលផ្ដល់សេវាលឿនឆាប់រហ័ស ហើយមានការ ត្រួតពិនិត្យលក្ខណៈបច្ចេកទេសត្រឹមត្រូវ ព្រមទាំងជួយកាត់បន្ថយការកកស្ទះ និងគ្រោះថ្នាក់ចរាចរណ៍ថែមទៀត”។លោក បានបន្ដថា ការសម្រេចចុះអនុស្សរណៈជាមួយក្រុមហ៊ុន Grabនេះ ដោយសារតែក្រុមហ៊ុនបានប្រើប្រាស់បច្ចេកវិទ្យាថ្មី និងសេវាកម្មថ្មីតាមអនឡាញ ដែលបានចូល រួមសន្សំសំចៃពេលវេលា ការផ្ដល់នូវទំនុកចិត្តដល់ ប្រជាពលរដ្ឋ កាត់បន្ថយការ ចំណាយថវិកាផងដែរ។
លោក បានបន្ថែមទៀតថា សេវាកម្មដឹកជញ្ជូនថ្មីនេះ ក៏ផ្តល់ភាពងាយ ស្រួលផងដែរ ដែលអាចឱ្យអ្នកធ្វើ ដំណើរកក់សេវាកម្មដោយប្រើប្រាស់កម្ម វិធីបច្ចេកវិទ្យា នៅ លើទូរស័ព្ទ ស្មាតហ្វូន ដែលធ្វើឱ្យចំណេញទាំងថវិកា និងពេលវេលាថែមទៀត។
លោក Wee Tang Yee នាយកក្រុមហ៊ុន Grab ប្រចាំកម្ពុជា និងថៃ បានឱ្យដឹងថា ការពង្រីកសេវា ដឹកជញ្ជូនតាមអនឡាញនៅកម្ពុជានេះ ក្នុងគោលបំណងជួយដោះស្រាយបញ្ហា ដែលបណ្ដាលមកពីមធ្យោបាយធ្វើដំណើរ និងផ្ដល់ភាពងាយស្រួលប្រកបដោយ សុវត្ថិភាព ដើម្បីផ្ដល់ជាជម្រើសដល់ប្រជាជនកម្ពុជា ក៏ដូចជាក្នុងតំបន់ផងដែរ៕ ដោយ ៖ បញ្ញាស័ក្តិ
