លោក Paul Manafort អតីតអ្នកគ្រប់គ្រងយុទ្ធនាការ របស់ប្រធានាធិបតីអាមេរិច ដូណាល់ ត្រាំ ត្រូវបានតុលាការកាត់ទោសឲ្យជាប់ពន្ធនាគាររយៈពេល ៤៧ខែពីបទបន្លំពន្ធ និងធនាគារ ។
គាត់ត្រូវបានកាត់ទោសកាលពីរដូវក្តៅ ក្រោយពេលបានលាក់ប្រាក់ចំណូលរាប់លានដុល្លា ដែលបានមកពីការប្រឹក្សាផ្នែកនយោបាយជុំវិញបញ្ហារបស់ប្រទេសអ៊ុយក្រែន។
គាត់ក៏នឹងត្រូវកាត់ទោសក្នុងករណីផ្សេងទៀតដែរនៅសប្តាហ៍ក្រោយជុំវិញការបញ្ចុះបញ្ចូលខុសច្បាប់។
ការចោទប្រកាន់លើលោក Paul Manafort កើតឡើងមកពីការស៊ើបអង្កេតលើសំណុំរឿង ថាតើយុទ្ធនាការរបស់លោក ដូណាល់ ត្រាំមានការរួមគំនិតជាមួយនឹងប្រទេសរុស្សីឬយ៉ាងណា ដើម្បីឈ្នះការបោះឆ្នោតកាលពីឆ្នាំ ២០១៦។
លោក Paul Manafort ក៏ត្រូវតុលាការឲ្យបង់ប្រាក់សំណងចំនួន ២៤លានដុល្លាផងដែរ និងប្រាក់ពិន័យចំនួន ៥០.០០០ដុល្លារ ។
លោក ត្រូវបានគេរកឃើញថា បានលាក់លុយចំនួន ៥៥លានដុល្លានៅធនាគារមួយនៅសាធារៈរដ្ឋស៊ីប្រូស (Cyprus) ដែលលុយទាំងនោះគាត់រកបានតាមរយៈការធ្វើជាអ្នកប្រឹក្សាផ្នែកនយោបាយអោយ អ្នកនយោបាយគាំទ្ររុស្សីអ៊ុយក្រែន (pro-Russian Ukrainian politicians) ។
ព្រះរាជអាជ្ញានិយាយថា លោក Paul Manafort មិនបានបង់ពន្ធចំនួនជាង ៦លានដុល្លារ ។
សូមបញ្ជាក់ថា លោក Paul Manafort ធ្លាប់បានធ្វើជាអ្នកគ្រប់គ្រងយុទ្ធនាការរបស់លោក ដូណាល់ ត្រាំបានរយៈពេល ៣ខែ ចាប់ពីខែមិថុនា ដល់ខែសីហា ឆ្នាំ ២០១៦ មុនពេលគាត់ត្រូវបានគេបង្ខំឲ្យលាលែងពីតំណែង ក្រោយមានការពិនិត្យឃើញពីការងារមុនរបស់លោក នៅក្នុងប្រទេសអ៊ុក្រែន ៕ សុភ័ក្ត្រ
ប្រភព៖ BBC