ខេត្តព្រះសីហនុ ៖ ថ្នាក់ដឹកនាំស្នងការដ្ឋាននគរបាលខេត្តព្រះសីហនុ បន្តចុះអប់រំការអនុវត្តច្បាប់ចរាចរណ៍ផ្លូវគោក ដល់មន្ត្រីនគរបាលជំនាញ នៅតាមមូលដ្ឋាន ដើម្បីឈានទៅចុះអនុវត្តការងារអោយមានប្រសិទ្ធភាពថែមទៀតនាថ្ងៃអនាគត។
លោកឧត្តមសេនីយ៍ត្រី អ៉ី សុខា ស្នងការរងនគរបាលខេត្តព្រះសីហនុ ទទួលផែនសណ្ដាប់ធ្នាប់ បានឲ្យដឹងថា កាលពីថ្ងៃ ១៥រោច ខែមិគសិរ ឆ្នាំរកា ព.ស២៥៦១ ត្រូវនឹងថ្ងៃទី១៨ ខែធ្នូ ឆ្នាំ២០១៧ បានចុះផ្សព្វផ្សាយច្បាប់ចរាចរណ៍ផ្លូវគោក និងពង្រឹងការរឹតបន្តឹងអនុវត្តច្បាប់ស្ដីពីចរាចរណ៍ផ្លូវគោក ដល់ នាយ នាយរងប៉ុស្តិ៍ នៃអធិការដ្ឋាននគរបាលស្រុកព្រៃនប់ ចំនួន ៣៥នាក់។
លោកបន្តថា ខ្លឹមសារ នៃការផ្សព្វផ្សាយនោះរួមមាន៖
១-ផ្សព្វផ្សាយបទបញ្ជាលេខ ០០១បជក របស់ក្រសួងមហាផ្ទៃ ស្តីពីការជំរុញអនុវត្តច្បាប់ស្ដីពីចរាចរណ៍ផ្លូវគោក។
២-ផ្សព្វផ្សាយបទបញ្ជា និងផែនការ របស់ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត។
៣-ជំរុញសហការ ជាមួយអធិការរងទទួលបន្ទុក ចុះរឹតបន្តឹងអនុវត្តច្បាប់ស្ដីពីចរាចរណ៍ផ្លូវ និង ផ្សព្វផ្សាយច្បាប់ចរាចរណ៍ផ្លូវគោក ដល់ប្រជាពលរដ្ឋនៅក្នុងមូលដ្ឋាន ឲ្យគោរពច្បាប់ទាំងអស់គ្នា ។
៤-រាល់ពេលមានករណីគ្រោះថ្នាក់ចរាចរណ៍កើតឡើង សមត្ថកិច្ចមូលដ្ឋាន ត្រូវការពារកន្លែងកើតហេតុ ជួយសង្គ្រោះជនរងគ្រោះ និងរាយការណ៍បន្ទាន់នៅលោកអធិការ និងអធិការរង ទទួលបន្ទុក ដើម្បីឲ្យគាត់រាយការណ៍បន្ត។
លោក អ៉ី សុខា បន្ថែមថា គោលបំណង នៃការបន្តចុះពង្រឹងការអនុវត្តច្បាប់ចរាចរណ៍ផ្លូវគោកដល់កម្លាំងនគរបាលតាមមូលដ្ឋាននៅពេលនេះ ដើម្បីឈានទៅកាត់បន្ថយអត្រាគ្រោះថ្នាក់ចរាចរណ៍នាខេត្តព្រះសីហនុ ក៏ដូចជានៅទូទាំងប្រទេសកម្ពុជា អោយថយចុះចំនួននាបណ្តាឆ្នាំខាងមុខ៕ ដែន សីមា