ភ្នំពេញ ៖ រសៀលថ្ងៃសុក្រ ទី៨ ខែមីនា ឆ្នាំ២០១៩ លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានទទួលជួបសម្ដែងការគួរសមជាមួយលោក ព្យែរ ប៊ៃយ៉េ អគ្គលេខាធិការអចិន្ត្រៃយ៍របស់សមាគមអន្តរជាតិនៃអភិបាលក្រុងប្រើប្រាស់ភាសាបារាំង ( AIMF ) ដើម្បីពិភាក្សាការងារមួយចំនួន ជាមួយរដ្ឋបាលរាជធានីភ្នំពេញ ដែលត្រូវធ្វើជាម្ចាស់ផ្ទះក្នុងកិច្ចប្រជុំសមាជិកគណៈកម្មការអចិន្ត្រៃយ៍របស់សមាគម AIMF នាចុងឆ្នាំនេះ និងបានចុះហត្ថលេខាលើកិច្ចព្រមព្រៀងផ្ដល់ជំនួយសម្រាប់គម្រោង ” ការពង្រឹងសមត្ថភាពរដ្ឋបាលថ្នាក់ក្រោមជាតិនៅព្រះរាជាណាចក្រកម្ពុជាក្នុងវិស័យរៀបចំក្រុងប្រកបដោយនិរន្តរភាព ដើម្បីរៀបចំតំបន់អាណាធិបតេយ្យឡើងវិញក្នុងទីក្រុង និងធានាផ្ដល់នូវលទ្ធភាពក្នុងការទទួលបានសេវាសំខាន់ៗ ផ្សេងៗសម្រាប់សហគមន៍ក្រីក្រ ” រវាងរដ្ឋបាលរាជធានីភ្នំពេញ និងសមាគមអន្តរជាតិនៃអភិបាលក្រុងប្រើប្រាស់ភាសាបារាំង ( AIMF )។
លោកឃួង ស្រេង បានជំរាបជូនលោកព្យែរ បៃយ៉េ ពីការផ្តល់កិច្ចសហការឲ្យបានល្អប្រសើរជាមួយ(AIMF)ក្នុងនាមទីក្រុងភ្នំពេញជាសមាជិកការិយាល័យ របស់(AIMF)និងត្រូវបានអង្គសន្និបាត
(AIMF)អនុមត័គាំទ្រជាឯកច្ឆ័នជូនរាជធានីភ្នំពេញធ្វើជាម្ចាស់ផ្ទះរៀបចំមហាសន្និបាតរបស់សមាគមលើកទី៣៩ស្របនឹងខួបទី៤០នៃការបង្កើតសមាគមហើយសន្និបាតឆ្នាំនេះ គឺបន្តការងារពីសន្និបាតឆ្នាំមុននៅទីក្រុងលីល ប្រទេសបារាំងដោយផ្តោតសំខាន់ទៅលើខ្លឹមសារការរស់នៅក្នុងទីក្រុង និងកីឡា។រាជធានីភ្នំពេញក៏គាំទ្រទៅនឹងគំរោងបង្កើតការិយាល័យ(AIMF)នៅរាជធានីភ្នំពេញសំរាប់តំណាងប្រចាំតំបន់ផងដែរ។
លោកព្យែរ បៃយ៉េ បានលើកឡើងថា សន្និបាតរបស់សមាគមអន្តរជាតិអភិបាលក្រុងប្រើប្រាស់ភាសាបារាំងនៅរាជធានីភ្នំពេញ គឺជាទ្វាមួយបើកទៅកាន់ពិភពលោក និង បង្ហាញពីអ្វីដែលសមគមបានធ្វើ ក៏ដូចជាការបង្ហាញពីសក្តានុពលវប្បធម៌,ការរីកចំរើនរបស់រាជធានីភ្នំពេញ ក៏ដូចជាវិស័យទេសចរ,កីឡា,បរិស្ថានជាដើម។
លោកថា យើងព្យាយាមដោះស្រាយបញ្ហាដែលកើតមានដូចជាបញ្ហាទឹកកខ្វក់,ការរស់នៅរបស់ប្រជាពលរដ្ឋនិងកីឡាជាដើមដោយលោកសុំការគាំទ្រពីរដ្ឋបាលរាជធានីភ្នំពេញ។
សម្តេចអគ្គមហាសេនាបតីតេជោហ៊ុន សែន ធ្លាប់មានប្រសាសន៏ថា រាជរដ្ឋាភិបាលត្រៀមខ្លួនផ្តល់បដិភាគជាមួយAIMFក្នុងការជួយអភិវឌ្ឍន៏រាជធានីភ្នំពេញ ហើយសម្តេចក៏បានលើកទឹកចិត្តដល់ទីក្រុងផ្សេងៗទៀតនៅកម្ពុជាសហការជាមួយ(AIMF)ដើម្បីបង្ហាញពីសក្ដានុពលខេត្ត ក្រុងរបស់ខ្លួននិមួយៗ។
នៅរសៀលថ្ងៃដដែលនេះដែរ លោកឃួង ស្រេងនិងលោកព្យែរ បៃយ៉េ ក៏បានចុះហត្ថលេខាលើកិច្ចព្រមព្រៀងផ្ដល់ជំនួយសម្រាប់គម្រោង ” ការពង្រឹងសមត្ថភាពរដ្ឋបាលថ្នាក់ក្រោមជាតិនៅព្រះរាជាណាចក្រកម្ពុជាក្នុងវិស័យរៀបចំក្រុងប្រកបដោយនិរន្តរភាព ដើម្បីរៀបចំតំបន់អាណាធិបតេយ្យឡើងវិញក្នុងទីក្រុង និងធានាផ្ដល់នូវលទ្ធភាពក្នុងការទទួលបានសេវាសំខាន់ៗ ផ្សេងៗសម្រាប់សហគមន៍ក្រីក្រ ” រវាងរដ្ឋបាលរាជធានីភ្នំពេញ និងសមាគមអន្តរជាតិនៃអភិបាលក្រុងប្រើប្រាស់ភាសាបារាំង ( AIMF )៕ ដោយ:កូឡាប
